قازاقستان رەسپۋبليكاسى ۇلتتىق مۋزەيىندە «رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» ماقالاسىن جۇزەگە اسىرۋ اياسىندا قازاقستان رەسپۋبليكاسى ۇلتتىق مۋزەيى مەن قازاق ۇلتتىق ونەر ۋنيۆەرسيتەتىنىڭ كوركەم ونەر فاكۋلتەتى بىرلەسىپ ۇيىمداستىرعان ستۋدەنتتەردىڭ بەينەلەۋ ونەرى بويىنشا «ونەرلى قول – باقىتقا جول» اتتى كورمەسى اشىلدى. 

شارانىڭ سالتاناتتى اشىلۋىنا جينالعان جۇرت جاس تالانتتاردىڭ كورمەسىن ۇيىمداستىرۋداعى نەگىزگى ماقسات – حالقىمىزدىڭ ءداستۇرلى ونەرىن جاڭعىرتۋ جانە ەلىمىزدىڭ مادەني دەڭگەيىن جوعارى كوتەرۋ ەكەندىگىن اتاپ ءوتتى.

اباي ساتۋبالدين، قر ۇلتتىق مۋزەيى ديرەكتورىنىڭ ورىنباسارى:

- ەلباسىنىڭ ەل بولاشاعى – جاس ۇرپاققا دەگەن ۇلكەن ءارى ەرەكشە قامقورلىعىنىڭ كورىنىسى رەتىندە «قازاقستانداعى جاستار جىلى» باستالدى.

ەلىمىزدەگى جوعارعى وقۋ ورىندارىن جىل سايىن 200 مىڭعا جۋىق تۇلەك ءبىتىرىپ شىعادى ەكەن. ولار ومىرگە قانشالىقتى ءبىلىم قورىمەن قادام باسادى جانە ازاماتتىق ۇستانىمى قانشالىقتى بەلسەندى دەگەن سۇراق تۋادى. قوعام وسى باعىتتا جۇمىستار اتقارۋى كەرەك.

قازاقستان رەسپۋبليكاسى ۇلتتىق مۋزەيى قازاق ۇلتتىق ونەر ۋنيۆەرسيتەتى كوركەم ونەر فاكۋلتەتىمەن بىرلەسىپ وسى كورمەنى قولعا الىپ وتىر. بۇل، بىرىنشىدەن، ونەرلى جاستاردى قولداۋ، حالقىمىزدىڭ ءداستۇرلى ونەرىن ناسيحاتتاۋ بولىپ تابىلادى.

ەكىنشىدەن، «ونەرلى قول – باقىتقا جول»دەپ كورمەنىڭ اتى ايتىپ تۇرعانىنداي، ونەردى –كاسىپكە اينالدىرۋ. كورمە بارىسىندا ولاردىڭ شىن شەبەرلىگى مەن تالانت قارىمىن ايقىنداي الامىز.

الماگۇل سمەتوۆا، قازۇوۋ-ءدىڭ وقۋ جانە وقۋ-ادىستەمەلىك جۇمىستار بويىنشا پرورەكتورى:

- بۇگىن قازۇوۋ-ءدىڭ كوركەم ونەر فاكۋلتەتى ءۇشىن ەرەكشە كۇن. كورمەگە جاس تالانتتى سۋرەتشىلەردىڭ تۋىندىلارى ۇسىنىلدى. بيىلعى جىلدىڭ «جاستار جىلى» دەپ جاريالانۋى كەز-كەلگەن سالاداعى جاستاردىڭ جان-جاقتى دامۋىنا ۇلكەن مۇمكىندىك بەرمەك. وسىنى پايدالانىپ، كورمە سۋرەتشىلەرىنە شىعارماشىلىق تابىستارعا قول جەتكىزىپ، ءتيىمدى جوبالار، تىڭ يدەيالارمەن ەڭبەكتەنىڭدەر دەگىم كەلەدى.

Abai.kz