اسا قامقور، ەرەكشە مەيىرىمدى اللانىڭ اتىمەن باستايمىن!

 قادىرلى باۋىرلار، وتانداستار!

بارشاڭىزدى ءيسى مۇسىلمان قاۋىمى اسىعا كۇتكەن قاسيەتتى رامازان ايىنىڭ كەلۋىمەن قۇتتىقتايمىن. ورازاعا امان-ەسەن جەتكىزگەن اللا تاعالاعا سانسىز شۇكىرلەر مەن ماقتاۋ-ماداقتار بولسىن! ءار وتباسىنا اماندىق، باقىت پەن بەرەكە تىلەيمىن! جاراتۋشى اللا جار بولسىن!

ءبىزدىڭ حالقىمىز اۋىز بەكىتكەن ادامدى ايرىقشا قادىرلەپ، وعان اۋىزاشار بەرىپ، قۇرمەت كورسەتكەن.

رامازان – جاقسىلىقتا جارىساتىن اي. ورازادا ءاربىر يگى امالدىڭ ساۋابى ەسەلەنىپ جازىلادى. قۇدسي حاديستە اللا تاعالا: «ورازا – تەك مەن ءۇشىن. ونىڭ سىيىن (ساۋابىن) وزىم عانا بەرەمىن...» – دەپ ورازانىڭ قادىرى مەن قاسيەتىن، ءمانى مەن ماڭىزىن بايانداعان.

ال ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءوزىنىڭ حاديس-شاريفىندە: «ادام بالاسىنىڭ بارلىق يگى ىستەرىنىڭ ساۋابى ارتادى. ءاربىر جاقسىلىققا ون ەسەدەن جەتى ءجۇز ەسەگە دەيىن ساۋاپ جازىلادى», – دەپ ۇمبەتىنە ءسۇيىنشى حابار جەتكىزگەن.

وسى رەتتە وتانداستارىمدى قايىرىمدىلىق ءىس-شارالارعا بەلسەندى اتسالىسۋعا، كاسىپكەر ازاماتتاردى رامازاننىڭ قۇرمەتى ءۇشىن ازىق-تۇلىك پەن كۇندەلىكتى تۇرمىسقا قاجەتتى زاتتارعا ارنايى جەڭىلدىكتەر جاساۋعا شاقىرامىن. قۇدايى استار مەن ساداقالار اۋىزاشار ۋاقىتىندا ۇيىمداستىرىلسا دەگەن تىلەگىمدى بىلدىرەمىن.

وزدەرىڭىزگە بەلگىلى، ەلىمىزدە كوپبالالى وتباسىلار مەن جاستارعا كوڭىل ءبولىنىپ، بىرقاتار مەملەكەتتىك باعدارلامالار جۇزەگە اسۋدا. مەملەكەتتىڭ يگى باستامالارىنا ءۇن قوسۋ – بارشا ازاماتتىڭ اسىل بورىشى.

ىزگى امالدىڭ ساۋابى ەسەلەنىپ جازىلاتىن ايدا كوپبالالى جانۇيالارعا قولداۋ كورسەتىپ، قاريالار مەن مۇگەدەك جانداردىڭ، جالعىز باستى انالاردىڭ باتاسىن الىپ، العىسىنا بولەنۋگە ۇندەيمىن. جەتىمدەر مەن ناۋقاس ادامدارعا قامقورلىق جاسايىق!

ءبىر ادامدى قۋانىشقا بولەۋ – ساداقا. قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتتارىنىڭ ءبىرى – قايىرىمدىلىق شارالارعا ۇيىتقى بولۋ. قمدب قىزمەتى اياسىندا «يسلام جانە وتباسى» جىلى باستاماسى نەگىزىندە دەمەۋشى ازاماتتاردىڭ قولداۋىمەن باسپاناعا اسا مۇقتاج 15 جانۇياعا پاتەر كىلتى تابىستالدى. بۇل باعىتتا ىزگى شارالار جۇزەگە اسا بەرەدى.

بىردە سۇيىكتى پايعامبارىمىز مۇحاممەدتەن (وعان اللانىڭ سالاۋاتى مەن سالەمى بولسىن) ءبىر كىسى: «ۋا، اللانىڭ ەلشىسى، ەڭ جاقسى ادام كىم؟» – دەپ سۇراعاندا، ول: «ەڭ جاقسى ادام – قوعامعا، ەلگە پايداسى تيگەن پەندە», – دەپ جاۋاپ بەرگەن ەكەن.

زەكەت بەرۋ – جاعدايى كەلگەن (شاريعات بويىنشا نيساپ مولشەرىنە جەتكەن) مۇسىلمانعا پارىز. ال زەكەت بەرەكەلى رامازان ايىندا بەرىلسە، ونىڭ دا ساۋابى ەسەلەنىپ جازىلادى.

قۇرمەتتى جاماعات!

رامازان ايى قۇتتى بولسىن! قاسيەتتى ايدا ۇستاعان ورازالارىڭىز، جاسايتىن قۇلشىلىق، دۇعا-تىلەكتەرىڭىز قابىل بولسىن! العا قويعان ارمان-ماقساتتارىڭىز ورىندالىپ، ورازادان ورازاعا امان-ەسەن جەتە بەرۋىمىزدى اللا ءناسىپ ەتسىن! ەلىمىز امان، جۇرتىمىز تىنىش، تاۋەلسىزدىگىمىز باياندى بولعاي! ءاۋمين!

سەرىكباي قاجى وراز، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي

Abai.kz