بىرىككەن ۇلتتار ۇيىمىنىڭ لاڭكەستىككە قارسى كۇرەس جانە ادام قۇقىقتارى مەن بوستاندىقتارىن قورعاۋ جونىندەگى ارنايى بايانداماشىسى فيوننۋلا ني اولەين قازاقستانداعى ينتەرنەت جەلىسىنىڭ “اۋقىمدى تۇردە بۇعاتتالۋىنا” الاڭداۋشىلىق ءبىلدىردى دەپ حابارلايدى ورتالىق ازيا جاڭالىقتار قىزمەتى.

جۇما كۇنى نۇر-سۇلتان قالاسىندا وتكەن بريفينگتە بۇۇ حاتشىسى ءوز كومانداسىنىڭ مۇشەلەرى قازاقستانداعى ينتەرنەتكە كىرۋ ماسەلەسىنە كۋا بولعانىن ايتقان.

- بۇقارالىق سايتتار مەن ستريم – سەرۆيستەر جاپپاي بۇعاتتالدى.  دەمەك، مۇندا پروپورتسيونالدى كوزقاراستار بويىنشا ماسەلەلەر بار. بىراق، ءبىزدىڭ تۇسىنگەنىمىز، مۇنىڭ بارلىعى دا قاۋىپسىزدىكتى قامتاماسىز ەتۋ ءۇشىن جاسالعان. بەيبىت جيىندار مەن ءسوز بوستاندىعى دۇنيەجۇزىلىك ۇيىمدارمەن قورعالادى. بىراق، قاۋىپسىزدىكتى سىلتاۋ ەتىپ، ادامداردىڭ بەيبىت جينالۋىنا، پىكىرىن اشىق بىلدىرۋىنە شەكتەۋ قويۋ ءبىزدى الاڭداتادى، - دەدى ول.

اقپارات جانە قوعامدىق دامۋ ءمينيسترى داۋرەن اباەۆ ينتەرنەتتىڭ بۇعاتتالۋىنا مينيسترلىكتىڭ قاتىسى جوق ەكەنىن ايتقان.

ال، تسيفرلىق دامۋ، قورعانىس جانە اەروعارىش ونەركاسىبى ءمينيسترى اسقار جۇماعاليەۆ ءماجىلىس وتىرىسىندا ينتەرنەتتىڭ بۇعاتتالۋىنا قاتىستى سۇراق تۇسپەگەنىن ايتتى.

ايتا كەتەيىك، 9-مامىر كۇنى قازاقستاندا بىرنەشە سايتتار اشىلمادى. كوپشىلىك الەۋمەتتىك جەلىلەرگە كىرە المادى. ال، قازاقستاندىق پوليتسيانىڭ كەزەكشىلىك ءتارتىبى ادەتتەگىدەن كۇشەيتىلگەن رەجيمگە اۋىستى. 8 مامىردا باس پروكۋراتۋرا قازاقستان ازاماتتارىن رۇقسات ەتىلمەگەن نارازىلىق اكتسيالارىنا قاتىسپاۋ تۋرالى ەسكەرتۋ جاسادى.

Abai.kz