قاتەلەسۋدىڭ ءبارى تانىمنىڭ دۇرىس بولاۋىنان كەلىپ شىعادى. پەندە نەنى تانىسا، سونى سۇيەدى دەيدى. كىمدى سۇيسە سونىڭ سوڭىندا بولماق. باتىستا قىزمەت ەتكەنىمدە تۇرمە مەن سىرتتاعى ۋاحابيلەر تاريحي وقيعالاردى تاڭداي قاعىپ تىڭدايتىن ەدى. ارتىنان ولاردىڭ ۇلتتىق تاريحقا ماحابباتىن بايقادىم. ولاردىڭ بويىندا قالىپتاسقان تاريحي سانا، ولاردىڭ وتانعا، جەرگە، ۇلتقا دەگەن ماحابباتىنا سەبەپ بولدى. سالافيلەر تاريحتى سۇيمەيدى دەگەنگە كەلىسپەيمىن. تەگى پەندە عو ولاردىڭ. تانىتا الماي ءجۇرمىز.

ءوز تەگىنەن شىققان اتا-بابالارى تۋرالى ايتساڭ، ولاردىڭ جانى ەلەڭدەيتىنىن بايقادىم. ءسويتىپ، سولاي ولاردىڭ اتا باباسىنداعى ءبىر تۇلعاعا دەگەن ماحابباتىن وياتۋ ارقىلى، تۇتاس قازاققا جانىن بۇراسىڭ. ودان كەلىپ رۋحقا دەگەن ماحابباتى باستالادى ولاردىڭ. رۋحقا دەگەن ماحابباتتارى اللاعا دەگەن ماحابباتقا ۇلاسادى (سەبەبى قالىپقا سىيمايدى). ولار اللانى ءسۇيۋدىڭ ورنىنا، اللانى قاھارلى دەپ ۇرەيلەنىپ قاتەلەسەدى. نەگىزى بۇل ەكەۋى تەڭ بولۋى كەرەك سانا تارازىسىندا. ولاردىڭ اللاعا دەگەن تانىمىن ءبىز تاريح ارقىلى الىپ شىعامىز. ۋاحابيلەردىڭ ساناسىنداعى تارتىمدىلىق كەڭىستىگىن الماستىرۋ دەگەنىمىز وسى.

بىزگە ەشكىمگە ەلىكتەۋدىڭ قاجەتى جوق. تاريحي جولىمىز بار. سونى جاڭا كوزقاراسپەن جاڭعىرتساق بولدى. بىراق مەملەكەت ول جولعا عىلىمي جولمەن كەلۋ جاعىنان كەشەۋىلدەپ جاتىر. سول باياعى ەلدەن كەشىگۋ عو بىزدىكى. سودان باسقا جۇرتتاردىڭ مادەنيەتىن قابىلداپ. ولارمەن كۇرەسىپ كەتەمىز. سەبەبىمەن كۇرەسۋدىڭ ورنىنا، قايتادان سالدارىمەن كۇرەسىپ كەتەمىز. بۇل ءبىر ورىندا تۇرعان اربانىڭ دوڭگەلەگى سياقتى تىرلىك.

ەرىنشەكتىك اقىلدىڭ تونىنان وتە المايتىنىن بىلگەن سوڭ، ادامعا سابىردىڭ تونىن جامىلىپ كەلەدى دەيدى. وكىنىشكە وراي، بىزدە سابىر دەگەن ەرىنشەكتىك باسىم.

بىزگە ايتىس-تارتىستان گورى ورتاق يدەياعا قىزمەت ەتۋ ماڭىزدى.

جاراس احان

Abai.kz