قىزىلوردا وبلىسى، جاڭاقورعان اۋدانى قاراتاۋدىڭ باۋرايىندا ماۋسىم ايىنىڭ 1-2-ءسى كۇندەرى ءداستۇرلى مالشىلار سلەتى وتكىزىلەدى، - دەپ حابارلايدى اباي-اقپارات.

اتالعان شارا وبلىس كولەمىندە بيىل 5-ءشى رەت ۇيىمداستىرىلىپ وتىر. مالشىلار سلەتىنە قر اۋىل شارۋاشىلىعى مينيستىرلىگىنىڭ، اۋىل شارۋاشىلىعى قىزمەتكەرلەرىنىڭ سالالىق كاسىپتىك وداعىنىڭ، «قازاگرو» ۇلتتىق باسقارۋشى حولدينگىنىڭ وكىلدەرى، رەسپۋبليكامىزدىڭ بەلگىلى عالىمدارى، ءتورت تۇلىك مالدىڭ رەسپۋبليكالىق پالاتالارى، جابدىقتاۋشى كاسىپورىندار جانە ەلىمىزدىڭ بارلىق وڭىرىنەن دەلەگاتسيالار كەلەدى دەپ كۇتىلۋدە.

– مالشىلار سلەتىنىڭ نەگىزگى ماقساتى – ءتورت تۇلىك توڭىرەگىندەگى اتا كاسىپپەن شۇعىلداناتىن قاۋىمعا بۇل شارۋانىڭ جاڭا زامانداعى ءمانى مەن ماعىناسى تۋرالى وي سالۋ، وسى كاسىپتى كەڭەيتىپ، ونى ودان ءارى دامىتۋدىڭ جولدارى تۋرالى پىكىر الماسۋ. جىل بويىنا جازدىڭ ىستىعىنا، قىستىڭ سۋىعىنا قاراماستان ءتورت تۇلىك مالدى وسىرۋمەن اينالىسىپ جۇرگەن شارۋالاردىڭ ەڭبەكتەرى وراسان زور. وسىنداي ەڭبەك ازاماتتارىنىڭ جىل بويىنا اتقارعان ەڭبەگىن باعالاپ، جاقسى جەتىستىككە جەتكەن تۇلعالاردى ناسيحاتتاۋ،- دەدى قىزىلوردا وبلىسى اۋىل شارۋاشىلىعى باسقارماسى باسشىسىنىڭ ورىنباسارى سەيىلبەك سەرعازىۇلى.

ايتا كەتەيىك، شارادا 11 نوميناتسيا بويىنشا جىل قورىتىندىسىمەن ۇزدىك مالشىلار ماراپاتتالادى.

Abai.kz