«اق جول» پارتياسىنان ۇمىتكەر دانيا ەسپاەۆا سايلاۋالدى ناۋقان بارىسىندا شورتاندى اۋىلىنا ات باسىن بۇردى.

ۇگىت شارالارى وبلىستىق ايماقتىق شتابتىڭ ۇيىمداستىرۋىمەن ءوتتى. وعان رەسپۋبليكالىق شتاب مۇشەلەرى دميتري ۆاسيلەۆ، مەرۋەرت قازبەكوۆا جانە پارتيانىڭ ايماقتىق بەلسەندىلەرى قاتىستى.

دانيا ەسپاەۆانىڭ سايلاۋالدى ۇگىت توبى ا.باراەۆ ات. استىق شارۋاشىلىعىنىڭ عىلىمي-ونەركاسىپ ورتالىعىنا باردى. ورتالىقتاعى سۇرىپتاۋ زەرتتەۋى ناتيجەسىندە بيداي، ارپا، تارى جانە باسقا دا داقىلداردىڭ 60-قا جۋىق جاڭا ءتۇرى شىعارىلدى. وتاندىق سۇرىپتاۋ سورتتارى كۇننەن-كۇنگە ءوز قولانۋ اياسىن كەڭەيتىپ كەلەدى.

دانيا ەسپاەۆا ورتالىقتىڭ سوڭعى جەتىستىكتەرىمەن تانىسىپ، جاڭا اشۋلار جاساۋ ءۇشىن عالىمدارعا نە قاجەت ەكەنىن سۇراپ ءبىلدى.

بۇدان سوڭ، «اق جول» پارتياسىنىڭ ۇمىتكەرى شورتاندى اۋدانىنىڭ بيۋدجەتتىك قىزمەتكەرلەرى جانە كاسىپكەرلەرىمەن كەزدەستى. اۋدانداعى 1300-دەي ادام شاعىن جانە ورتا بيزنەسپەن اينالىسادى. ولاردىڭ 40% نازىك جاندىلار قاۋىمى. اۋداندا قىزمەت كورسەتۋ سالاسى جاقسى دامىعان.

دانيا ەسپاەۆا سايلاۋشىلاردى سايلاۋالدى باعدارلاماسىمەن تانىستىرىپ، ەكونوميكانىڭ باسىم سالالارى ءۇشىن تومەندەتىلگەن قوسىمشا قۇن سالىعى مولشەرلەمەسىن ەنگىزۋ سىندى ۇسىنىستارىن ايتىپ ءوتتى.

«ءدال وسىنداي اۋىلدىق ەلدىمەكەندەردە بيزنەستى كوبىنە ايەلدەر اشادى. ناندى پىسىرەتىن كىم؟ شاشتاراز اشاتىن كىم؟ سۇلۋلىق سالونىن اشاتىن كىم؟ ارينە، ولار - دەدى دانيا ەسپاەۆا. – ءبىزدىڭ ۇگىت  كەزدەسۋلەرىمىزدە مەن سايلاۋشىلارعا باعدارلامامداعى نەگىزگى تۇستاردى اتاپ وتەمىن. مەن ءۇشىن، مىنا زالدا وتىرعان ايەلدەردىڭ مەنىڭ سايلاۋعا ۇسىنىلۋىمدى وڭ قابىلداعانى ماڭىزدى. ءوزىمدى ەلىمىزدىڭ باستى لاۋازىمىنا ۇسىنۋ ارقىلى – مەن ءوزىم ءۇشىن عانا ەمەس، بارلىق قازاقستاندىق ايەلدەر ءۇشىن باتىل قادام جاسادىم. بۇل دەموكراتياعا دەگەن قادام، ساياسي جانە ەكونوميكالىق سالادا ايەل ادامنىڭ مۇمكىندىگى ەر ادامدارمەن تەڭ ەكەندىگىنىڭ كورىنىسى».

ۇمىتكەر، سونداي-اق، جەرگىلىكتى تۇرعىنداردىڭ سۇراعىنا جاۋاپ بەردى. سۇراقتار جەمقورلىققا قارسى كۇرەس، قوعامنىڭ الەۋمەتتىك ماسەلەلەرى، كاسىپكەرلىكتى قولداۋ سىندى تاقىرىپتاردا بولدى.

ۇگىت شاراسى اقمولا وبلىسىنىڭ ورتالىعى كوكشەتاۋ قالاسىندا جالعاسادى.

Abai.kz