ارال اۋماعىندا ورنالاسقان «بارساكەلمەس» مەملەكەتتىك تابيعي قورىعىندا «قىزىل كىتاپقا» ەنگىزىلگەن اڭ-قۇستار مەكەن ەتەدى. سوندىقتان مۇندا قورعاۋعا الىنعان جانۋارلارعا ارنايى پيتومنيك سالىنعان،- دەپ حابارلايدى اباي-اقپارات.

وسى ۋاقىتقا دەيىن ارال وڭىرىندە بىرىككەن ۇلتتار ۇيىمى ارقىلى 18 جوبا جۇزەگە اسىرىلعان. بۇعان 300 مىڭ اقش دوللارى جۇمسالعان.

جالپى، ارال وڭىرىنە تۋريستەردىڭ ءجيى كەلەدى. مۇندا، ارال تەڭىزىنەن بولەك، قامباش كولىنىڭ مولدىرلىگى مەن تازالىعى كەلۋشىلەردىڭ قىزىعۋشىلىعىن ارتتىرۋدا. قامباش كولىنىڭ جاعاجايىندا دەمالۋشىلارعا جاعداي جاسالعان. دەگەنمەن، ءالى دە جەتىلدىرە ءتۇسۋ قاجەت. بۇعان قاراماستان، مۇندا تىنىعۋعا كەلەتىندەر سانى كوبەيگەن. سوندىقتان بۇل ايماقتى تۋريستىك ورتالىققا اينالدىرىپ، جۇمىسىن ودان ءارى جانداندىرۋعا نيەتتەلىر بار.

– قامباش كولىنىڭ جاعاسىن پايدالانىپ، جۇمىسىن جەتىلدىرۋ كەرەك. تەك عانا دەمالاتىن ورىن ەمەس، ينۆەستيتسيا، دونورلار تارتاتىن جانە ءتۇرلى عىلىمي-زەرتتەۋ جۇمىستارى جۇرگىزىلەتىن ورىنعا اينالۋى قاجەت، – دەيدى «بارساكەلمەس» مەملەكەتتىك قورىعىنىڭ ديرەكتورى ز.الىمبەتوۆا.

بۇگىنگى تاڭدا مۇندا ءتيىستى جۇمىستار باستالىپ تا كەتتى. ماماندار قامباش كولىنىڭ جاعاسىنا 4000 ءتۇپ اعاش وتىرعىزىپ، بولاشاقتا جاسىل بەلدەۋ قالىپتاستىرماق.

– تەڭىز تارتىلعالى بەرى «بارساكەلمەس» قورىعىنىڭ قۇندىلىعى بۇرىنعى قالپىندا ساقتالىپ قالدى دەۋ قيىنداۋ. سوعان وراي ءبىز كوپتەگەن جۇمىستار جاساۋىمىز قاجەت. ءدال قازىرگى ۋاقىتتا قورىقتا 298 وسىمدىك ءتۇرى مەن 256 اڭنىڭ ءتۇرى مەكەن ەتەدى. بىزدە تەك كيىك، انتيلوپا عانا ەمەس، 1950 جىلداردىڭ شاماسىندا گەپارد تا بولعان. جالپى، قازىر دە سول قابىلاننىڭ تۇقىمدارىن قورىققا الىپ كەلىپ، وسىندا ءوسىرۋ دە جوبادا بار، – دەيدى حالىقارالىق ارالدى قۇتقارۋ قورى ديرەكتسياسىنىڭ ديرەكتورى بولات بەكنيازوۆ.

قامباش كولىنىڭ جاعاسىندا 450 گەكتار جەرگە ەكوتۋريزم قالاشىعى سالىنادى دەپ جوسپارلانۋدا. سونداي-اق، اشىق اسپان استىنداعى زەرتحانا بوي كوتەرمەك.

Abai.kz