فەستيۆالگە تۇركيا، ءازىربايجان، قىرعىزستان، تاتارستان رەسپۋبليكاسى (رف) جانە قازاقستاننىڭ 11 وڭىرىنەن قاتىسۋشىلار جينالدى. سونىمەن قاتار، شاراعا فاريزا وڭعارسىنوۆا مەن جاراسقان ابدراشەۆتىڭ تۋىستارى قاتىستى.

قىزىلوردا وبلىسىندا 27-29 مامىر ارالىعىندا اقىن، قازكسر مەملەكەتتىك سىيلىعىنىڭ لاۋرەاتى فاريزا وڭعارسىنوۆانىڭ 80 جىلدىعىنا جانە اقىن، ادەبي سىنشى، اۋدارماشى جاراسقان ابدراشەۆتىڭ شىعارماشىلىعىنا ارنالعان «پاراساتتى پوەزيا» اتتى ەكىنشى حالىقارالىق فەستيۆال ءوتتى.

فەستيۆالگە تۇركيا جانە ءازىربايجان جازۋشىلار وداعىنىڭ مۇشەسى مەحمەد نۋري پارماكسىز، ءازىربايجان جازۋشىلار وداعىنىڭ مۇشەسى، ءباسپاسوز حاتشىسى حايال رزا، قازاقستان جازۋشىلار وداعى توراعاسىنىڭ ورىنباسارى عالىم جايلىباي، قازاقستان جازۋشىلار وداعىنىڭ مۇشەلەرى بايبوتا قوشىم-نوعاي، قالقامان سارين جانە ت.ب. قاتىستى. سونداي-اق، شارانىڭ قۇرمەتتى قوناقتارى -فاريزا وڭعارسىنوۆانىڭ ءسىڭىلىسى الماگۇل مەن ۇلى الماس وڭعارسىنوۆتار، جاراسقان ابدىراشەۆتىڭ ۇلى رۇستەم ابدىراشەۆ پەن نەمەرەسى ءابىلحايىر ابدىراشەۆ ارنايى كەلدى.

فەستيۆال اياسىندا شاراعا قاتىسۋشىلار وبلىستىڭ بارلىق 7 اۋدانىندا بولىپ، كەزدەسۋلەر مەن پوەزيا كەشتەرى ۇيىمداستىرىلدى. سونىمەن قاتار، قىزىلوردا قالاسىنىڭ كورىكتى جەرلەرىن ارالاپ كوردى.

بۇگىن ن. بەكەجانوۆ اتىنداعى تەاتردا وتكەن شارادا وبلىس اكىمى قىرىمبەك كوشەرباەۆ سىر ءوڭىرى تالايدى تاڭداي قاقتىرعان،  سىر سۇلەيلەرى دەگەن اتاۋدى ۇلتتىق مادەنيەت تورىندە بەرىك ورنىقتىرعان جىرشى-جىراۋلاردىڭ، دارابوز اقىندار مەن شايىرلاردىڭ مەكەنى ەكەنىن اتاپ ءوتتى.

«ۇلى دالاداعى حالىقتىق داستۇردە شىعارماشىلىق ادامىنا دەگەن رياسىز ىقىلاس ەجەلدەن قالىپتاسقان. ولارعا دەگەن العاۋسىز كوڭىلى مەن قۇرمەتىنىڭ شەتى دە، شەگى دە جوق ەكەنى بارشاعا ايان. ءبىر عانا مىسال ايتايىن. قازىر ايماعىمىزدا نارتاي، ءابدىلدا، ماناپ، اسقار، قالتاي، تۇرماعامبەت، قاراساقال ەرىمبەت ەسىمدەرىمەن اتالاتىن ەلدىمەكەندەر، ءبىلىم وردالارى بار. بۇل - ونەرگە دەگەن ەلدىڭ شەكسىز ىقىلاسىنىڭ ءبىر كورىنىسى ەمەس پە؟ جالپى، ويلى ءسوز ساپتاي ءبىلۋ، ءسوز قادىرىن ءتۇسىنۋ، قۇدىرەتىن سەزىنۋ، كەستەلى سوزبەن ورنەكتەۋ - ءبىزدىڭ حالىققا بەرىلگەن ۇلكەن سىي»، - دەدى ايماق باسشىسى.

پوەزيا كەشىندە رەسپۋبليكاعا بەلگىلى اقىندار قالقامان سارين، اقبەرەن ەلگەزەك، عالىم جايلىباي، سونداي-اق سىربويىلىق ءسوز شەبەرلەرى ەلۋباي اۋەزوۆ، عازيزا ءابىلدا، نازگۇل بەردىقوجا، بيبولات ءساتجان، اقجول تۇمەنباي، اسىلزات ارىستانبەك ونەر كورسەتتى.

شارادا وتكەن جىلعى "ۇلى دالا ءۇنى" فەستيۆالى قاتىسۋشىلارىنىڭ شىعارمالار جيناعى مەن جاراسقان ءابدىراشۇلىنىڭ «دالا، سەنىڭ ۇلىڭمىن» اتتى كىتابىنىڭ تۇساۋكەسەرى ءوتتى.

ايتا كەتەيىك، بۇگىن ايماق باسشىسى ق.كوشەرباەۆ "پاراساتتى پوەزيا" فەستيۆالىنىڭ قاتىسۋشىلارىمەن كەزدەسىپ، ونەر سالاسىن قولداۋ بويىنشا وڭىردە جۇرگىزىلىپ جاتقان جۇمىستار تۋرالى اڭگىمەلەسىپ، ويلارىن ورتاعا سالعان بولاتىن.

Abai.kz