كەيبىر ءتىلمارلار حالىققا باسۋ ايتىپ، سابىرلىققا شاقىرعان بولىپ جاتىر. ءسوزدىڭ دە، مىنەزدىڭ دە ءادىلى بولادى. ادىلدىك تەك سوتقا عانا قاتىستى دۇنيە ەمەس. ءومىرىمىزدىڭ ءار ءساتى، ويىمىزدىڭ ءار ءتۇيىنى، ءىس-ارەكەتىمىزدىڭ ءبارى ادىلدىكتى تالاپ ەتەدى. قۇراندا كۇندە قايتالايتىن تۋرا جول دەگەنىمىز وسى مىنە!

حالىقتى سابىرلىققا شاقىرادى ەكەنسىزدەر، وندا ءادىل بولىپ، بيلىكتىڭ وسى ۋاقىتقا دەيىن جاساپ كەلگەن بىلىعىن دا، بارلىق سالانى جايلاعان جەمقورلىقتى دا قوسا ايتىڭدار. تالان-تاراجعا تۇسكەن بايلىعىمىزدى ايتىڭدار. توز-توز بولىپ كەتكەن اۋىلداعى، قالاداعى قازاقتىڭ مۇشكىل جاعدايىن ايتىڭدار. سايلاۋدا مۇعالىمدەردى مايمىلعا اينالدارعان ادىلەتسىز جۇيەنى ايتىڭدار! جازىقسىزدان قامالعانداردىڭ بوساتىلۋىن تالاپ ەتىڭدەر! شەنەۋنىكتەر مەن ىعاي-سىعايلاردىڭ قازاق تىلىنە پىسقىرماي، جاپپاي ورىسشا شۇلدىرلەگەنىن ايتىڭدار. كۇننەن كۇنگە ورىستانىپ بارا جاتقانىمىزدى، قىتايدىڭ ىقپالىنا ءتۇسىپ بارا جاتقانىمىزدى ايتىڭدار. سوندا سەندەردىڭ سوزدەرىڭ ءوتىمدى بولادى. سوندا ءادىل سوزدەرىڭ ءۇشىن ەل سابىرعا كەلىپ، بيلىك ءوز ساباعىن الار.

ايتپەسە ءار سوزدەرىڭدى تاپسىرىسپەن ياكي ۇپاي جيناۋ ءۇشىن جازىپ، ايتاتىندارىڭدى حالىق كورىپ تۇر. وزدەرىڭدى عانا جەكسۇرىن ەتپەي، ءدىننىڭ دە قادىرىن كەتىرمەڭدەر. ءدىن ەڭ اۋەلى شىنايىلىق پەن ادىلدىكتى بۇيىراتىنىن ۇمىتپاڭدار! ال بۇلاي ءسوزدىڭ ءادىلىن ايتا الماساڭدار، دانىشپانسىماي، قىزىل تىلگە سالىپ، ءتىلمارلانباي تىنىش وتىرىڭدار!

قوسانوۆتىڭ وزىنە سەنگەن حالىقتى الداپ كەتكەنىن كوردىك. مەن قوسانوۆقا داۋىس بەرمەسەم دە حالىقپەن بىرگە الدانىپ قالعانداي كۇيگە ءتۇستىم. حالىق وعان كىنالى ەمەس. حالىق شىنىمەن وزگەرىستى قالادى. قوسانوۆتىڭ ورنىنا باسقا بىرەۋ بولعاندا، سوعان داۋىس بەرەر ەدى. بولار نارسە بولدى. ەندى كوتەرىلىس جاساپ، ءوزى ۇتىلدىم، جەڭىلدىم دەپ تۇرعان ادامدى كۇشتەپ اپارىپ تاققا وتىرعىزبايتىنىمىز دا تۇسىنىكتى. حالىق قان توگىستى ەمەس، تىنىشتىقتى قالايدى. كەشەگى جاعدايدان كەيىن بيلىك حالىقتىڭ رەنىشى مەن تالابىن ۇقتى دەپ ويلايمىن.

ارى قاراي توقاەۆتان باتىل دا، شۇعىل تۇبەگەيلى رەفورمانى تالاپ ەتەيىك. سونى جازايىق، سونى ايتايىق. سونى جەتكىزەيىك. ءسوزى وتەتىن اتاقتى تۇلعالار، ايگىلى ونەر ادامدارى سارايدى ماداقتاعاندى قويىپ، وسى باعىتتا جۇمىلا جۇمىس ىستەۋى كەرەك. تاۋەلسىزدىگىمىزدى باياندى ەتەتىن، ۇلتىمىزدىڭ مەرەيىن ۇستەم ەتەتىن، حالقىمىزدىڭ ءال-اۋقىتىن جاقسارتاتىن رەفورما كەرەك. پوليتسيا، كنب مەملەكەتى ەمەس، قۇقىقتىق مەملەكەت جاساۋىن تالاپ ەتەيىك. توقاەۆ قازىر قالاي بولعاندا دا تاريحي اماناتتى ارقالاپ العان تۇلعا. ەگەر ول الدامشى شوۋلاردى قويىپ، شۇعىل تۇردە تۇبەگەيلى رەفورما جاساماسا، حالىقتى ەشكىم توقتاتا المايدى.

قايرات جولدىبايۇلىنىڭ facebook پاراقشاسىنان

Abai.kz