بەيسەنبى, 21 قاراشا 2019
ساڭلاق 1195 4 پىكىر 20 ماۋسىم, 2019 ساعات 13:42

قىزىلوردالىق «قايسار» قازاقستان كۋبوگىنىڭ فينالىنا شىقتى

قازاقستان كۋبوگى جارتىلاي فينالىنىڭ قىزىلوردا قالاسىندا وتكەن قارىمتا كەزدەسۋىندە جەرگىلىكتى «قايسار» كومانداسى قوستانايلىق «توبىلدى» 3:1 ەسەبىمەن جەڭىپ، اقتىق سىنعا جولداما الدى.

22 مامىر كۇنى قوستانايدا وتكەن ءبىرىنشى ويىندا «قاسقىرلار» 1:0 ەسەبىمەن جەڭىلىپ قالعان بولاتىن. اراعا ايعا جۋىق ۋاقىت سالىپ، سىر بويىندا قايتا جولدارى ءتۇيىستى. سىرت الاڭدا ءساتسىز ونەر كورسەتكەن قىزىلوردالىقتار ءوز جەرىندە شيراق قيمىلدادى. ەسەپتى وزدەرى اشتى. «قايساردىڭ» ارمەنيالىق شابۋىلشىسى بارسەگيان 16-شى مينۋتتا ايىپ سوققىسىن تاماشا ورىندادى. ال ەكىنشى تايمدا مبومبو ەسەپتى ەسەلەي ءتۇستى. بۇعان 89-شى مينۋتتا قوناقتار ساپىنان ارتۋراس جۋلپا جاۋاپ قاتتى. ەگەر وسى ەسەپ ساقتالعاندا فينالعا «توبىل» وتەر ەدى.

بىراق، تورەشى قوسقان قوسىمشا 6 مينۋتتىڭ سوڭىنا قاراي «توبىلدىڭ» قورعاۋشىسى ءوزىنىڭ ايىپ الاڭىندا قولمەن ويناپ، قوستانايلىق كوماندانىڭ قاقپاسىنا 11 مەترلىك ايىپ دوبى بەلگىلەندى. نۇكتەگە كەلگەن بارسەگيان ءمۇلت كەتكەن جوق.

وسىلايشا، قوس ويىننىڭ قورىتىندىسىندا 3:2 ەسەبىمەن جەڭگەن «قايسار» قازاقستان كۋبوگىنىڭ فينالىنا شىقتى. ەندى ولار اقتىق سىندا شىمكەنتتىك «ورداباسىنى» جەڭگەن «اتىراۋمەن» كەزدەسەدى.

ايتا كەتەيىك، «قايسار» جاڭا عاسىردا قازاقستان كۋبوگىنىڭ فينالىندا العاش رەت ونەر كورسەتكەلى وتىر. «كاسقىرلار» بۇعان دەيىن فينالدا ەكى مارتە باق سىناعان. العاشقىسى - 1998 جىلى. الماتىداعى ورتالىق ستاديوندا «قايسار» پاۆلودارلىق «ەرتىسكە» 1:2 ەسەبىمەن ەسە جىبەرەدى. اراعا ءبىر جىل سالىپ ءدال سول ستاديوندا وسكەمەندىك «ۆوستوك-التىن» كومانداسىن ماتچ سوڭىنداعى پەنالتي سەرياسىندا ۇتىپ، كۋبوكقا قول جەتكىزەدى.

ال «اتىراۋ» فۋتبول كلۋبى ءۇشىنشى جىل قاتارىنان ەل كۋبوگىنىڭ فينالىنا شىعىپ وتىر. اتىراۋلىقتار 2018 جىلى دا، 2017 جىلى دا فينالعا دەيىن جەتىپ، الماتىلىق «قايراتقا» ەسە جىبەرگەن بولاتىن.

قر كۋبوگى. جارتىلاي فينال. قارىمتا ماتچ

«قايسار» – «توبىل» 3:1 (1:0)

گولدار: 16', 90+6' بارسەگيان، 66' مبومبو - 89' جۋلپا

«توبىل»: بالاەۆ (ق), كانكاۆا، كاسساي، جۋلپا، دميترەنكو، جارىنبەتوۆ، ۆاليۋللين، كۆەكۆەسكيري، گوردەيچۋك، سەباي، فەدين.

«قايسار»: يسلامقۇلوۆ (ق), لامانج، ماروچكين، گراف، امىرسەيىتوۆ، گۋرمان، تاعىبەرگەن، نارزىلداەۆ، دجوشۋا، بارسەگيان، مبومبو

قۋانىش قاپپاس

Abai.kz

4 پىكىر