ارىسقا قالاسىنا ارنايى كەلگەن پارتيا توراعاسىنىڭ ءبىرىنشى ورىنباسارى باۋىرجان بايبەك وسىلاي دەدى.

اپاتتان زارداپ شەككەن حالىقپەن كەزدەسۋدە باۋىرجان بايبەك بۇل توتەنشە جاعدايدىڭ بۇكىل حالىقتى الاڭداتقان اۋىر وقيعا بولعانىنا نازار اۋداردى.

– قازىرگى تاڭدا بارشا قازاقستاندىقتار جۇدىرىقتاي جۇمىلىپ كومەك قولىن سوزۋدا. مەملەكەت تاراپىنان دا ناقتى شارالار قولعا الىنىپ جاتىر. وسىعان بايلانىستى ەلباسىنىڭ تاپسىرماسىمەن قالپىنا كەلتىرۋ جۇمىستارىنا پارتيا تاراپىنان قوعامدىق باقىلاۋ كۇشەيتىلەدى. بۇل جۇمىستار مەملەكەت باسشىسىنىڭ دا باستى نازارىندا، – دەدى پارتيا توراعاسىنىڭ ءبىرىنشى ورىنباسارى.

بۇگىندە ارىستى قالپىنا كەلتىرۋ جۇمىستارى قارقىندى تۇردە جۇرگىزىلۋدە. قالا 17 سەكتورعا ءبولىنىپ، ارقايسىسى ەلىمىزدىڭ ءار ايماعىنا ءبولىنىپ بەرىلگەن. باۋىرجان بايبەك بۇل جۇمىستار پارتيانىڭ باستى نازارىندا بولىپ، اپتا سايىن ايماقتاردىڭ اتقارعان جۇمىستارىنىڭ ناتيجەلەرى جاريالاناتىنىن جەتكىزدى.

– ءار اپتانىڭ سوڭىندا ارىستى قالپىنا كەلتىرۋ جۇمىستارىنىڭ بارىسى تۋرالى مالىمەتتەردى جيناقتاپ، ونىڭ ناتيجەسىن اشىق تۇردە حالىققا جاريالاپ وتىرامىز. قاي وبلىستىڭ قالاي جۇمىس ىستەپ جاتقانىن حالىق كورىپ، ءبىلۋى كەرەك. ارينە ءار ايماققا ءبولىنىپ بەرىلگەن سەكتورلاردىڭ جاعدايى بىركەلكى ەمەس. سوندىقتان ناقتى ناتيجە مەن دايەكتى دەرەكتەرگە سۇيەنىپ ارەكەت ەتەمىز، – دەدى باۋىرجان بايبەك.

سونداي-اق ول «Nur Otan» پارتياسىنىڭ گۋمانيتارلىق كومەكتەر قابىلداپ، ارىستىقتارعا جىبەرۋ جۇمىستارىن جۇيەلى تۇردە جۇرگىزگەنىن اتاپ ءوتتى.

– مۇنداي جاعدايدا ەلدىگىمىزدى كورسەتىپ، وسى قيىندىقتى بەكەم بىرلىگىمىزبەن ەڭسەرىپ شىعۋىمىز كەرەك. بۇل جۇمىستاردا پارتيا تاراپىنان تۇراقتى قولداۋ بولادى. وسى رەتتە جاسوتاندىقتاردىڭ بەلسەندىلىگىن دە ەرەكشە اتاپ وتكىم كەلەدى. ءبىزدىڭ پارتيانىڭ جاستارى ەرىكتىلەردى باستاپ، وزدەرى وسى جاققا كەلىپ، تىكەلەي ۇلەس قوسىپ جاتىر، – دەگەن باۋىرجان بايبەك بۇگىندە كەيبىر جاستاردىڭ اتقارىلىپ جاتقان جۇمىستاردى سىناپ، ەلدىڭ اراسىنا ىرىتكى سالىپ جاتقانىنا دا نازار اۋداردى.

سونىمەن قاتار ساپار بارىسىندا باۋىرجان بايبەك تۇركىستان وبلىسىنىڭ اكىمى ومىرزاق شوكەەۆپەن بىرگە اپاتتان زارداپ شەككەن الەۋمەتتىك نىسانداردى دا ارالاپ، ولاردى قالپىنا كەلتىرۋ جۇمىستارىنىڭ جاي-كۇيىمەن تانىستى. اتاپ ايتقاندا، قالاداعى «التىن تۇمار» بالاباقشاسىنا ارنايى بارىپ، جارىلىس كەزىندە بالالاردى قاۋىپسىز جەرگە كوشىرۋ جۇمىستارىن جەدەل ءارى جۇيەلى تۇردە جۇرگىزگەن تاربيەشىلەرمەن، اتا-انالارمەن، پسيحولوگ ماماندارمەن جانە جەرگىلىكتى اقساقالدارمەن كەزدەستى.

سونداي-اق الماتى قالاسىنا بەكىتىلىپ بەرىلگەن سەكتوردا ورنالاسقان ۇيلەردىڭ بىرىنە ارنايى ات باسىن بۇرىپ، تۇرعىندارىمەن تىلدەستى. قازىرگى تاڭدا اتالعان باسپانا تۇرۋعا جارامسىز دەپ تانىلعان. سوعان بايلانىستى الماتى قالاسى ءۇيدى قايتا سالىپ بەرمەك.

ودان بولەك، باۋىرجان بايبەك «ارىسقا كومەك» اكتسياسى اياسىندا الماتى قالاسىنان جىبەرىلگەن گۋمانيتارلىق كومەك كەرۋەنىن كۇتىپ الۋعا قاتىسىپ، اپاتتىڭ سالدارىن جويۋ جۇمىستارىنا بەلسەندى قاتىسىپ جۇرگەن جاسوتاندىق ەرىكتىلەرمەن كەزدەستى. ەلىمىزدەگى ەڭ ءىرى قالادان ارىسقا نەگىزىنەن قۇرىلىس ماتەريالدارى كەلگەنىن ايتا كەتكەن ءجون.

Abai.kz