سەنبى, 24 تامىز 2019
ماسقارا! 4092 5 پىكىر 16 شىلدە, 2019 ساعات 12:46

اقساقالوۆ پەن باقاۋوۆ مەملەكەتتىك ءتىلدى تۇسىنبەي مە؟

كەشە، 15 شىلدە مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىن وتكىزدى. 

جيىنعا پرەمەر-مينيستر، پرەزيدەنت اكىمشىلىگىنىڭ باسشىسى، ۇكىمەت مۇشەلەرى، نۇر-سۇلتان، الماتى، شىمكەنت قالالارى مەن وبلىستاردىڭ اكىمدەرى، قازاقستان پرەزيدەنتىنە تىكەلەي باعىنىشتى ورتالىق مەملەكەتتىك ورگانداردىڭ باسشىلارى قاتىستى.

كەڭەيتىلگەن وتىرىستىڭ كوزگە ۇرىپ تۇرعان كەمشىلىگى - مەملەكەتتىك تىلدە وتكەن جوق. جينالىستا باياناداما جاساۋشىلاردىڭ كوبى مەملەكەتتىك تىلگە مۇرىن شۇيىرە قاراعانىن بايقادىق.

ودان دا سوراقىسى جينالىس بارىسىندا مەملەكەت باسشىسىنىڭ مەملەكەتتىك تىلدە سويلەگەن سوزدەرىن كەي اكىم-قارا اۋدارمامەن تىڭدادى. كەڭەيتىلگەن وتىرىس كەشكە قاراي تەلەارنالاردان كورسەتىلدى. سوندا بايقاعانىمىز بىرنەشە اكىم ارنايى اۋدارما جاسايتىن قۇلاققاپ كيىپ وتىردى.

اتاپ ايتقاندا، سولتۇستىك قازاقستان وبلىسىنىڭ اكىمى قۇمار اقساقالوۆ پەن پاۆلودار وبلىسىنىڭ اكىمى بولات باقاۋوۆتىڭ (سۋرەتتە قاتار وتىعان قوس اكىم) پرەزيدەنت ءسوزىن ارناۋلى تەحنولوگيانىڭ كومەگىمەن عانا ءتۇسىنىپ وتىرعانىن بايقاۋعا بولادى.

سولتۇستىكتەگى كورشىمىزدىڭ سالقىنى قاتتى تيگەنىنەن بولار، ەلمىزدىڭ تۇستىك ايماعى مەملەكەتتىك تىلگە بەي-جاي قارايدى. ءسوزىمىزدىڭ ايقىن دالەلى رەتىندە سولتۇستىكتەگى قوس وبلىس اكىمىنىڭ مەملەكەتتىك ءتىلدى وزدەرىنىڭ ەت قۇلاعىمەن ەستىپ، تۇسىنە المايتىنىن ايتۋعا بولادى.

Abai.kz

5 پىكىر