“بۇل شىلعي وتىرىك. ءبىز مۇنداي اقپاراتتى جوققا شىعارامىز” دەگەن ەلشىلىك وكىلى اگەنتتىككە.
بۇعان دەيىن 62 جاستاعى تۇركىمەنستان پرەزيدەنتى گۋربانگۋلى بەردىمۇحامەدوۆتىڭ ءولىمى جايلى سىبىس تاراعان ەدى. بىرقاتار رەسەيلىك اقپارات قۇرالدارىندا ونىڭ "بۇيرەك اۋرۋىنان كوز جۇمعانى" جايلى حابارلاما جاريالاندى. بۇعان قوسا، بەيرەسمي ارنالار ارقىلى دا ءتۇرلى اقپارات تارادى.
ازاتتىقتىڭ تۇركىمەن قىزمەتى دە 20 شىلدەدە بەردىمۇحامەدوۆتىڭ ءولىمى جايلى حابارلاما العان. بىراق وعان بايلانىستى رەسمي ورىنداردان جاۋاپ الا المادى. تۇركىمەنستان باسشىسىنىڭ ءولىمىن قىرعىزستانداعى تۇركىمەنستان ەلشىلىگى دە جوققا شىعارعان.
ازاتتىقتىڭ تۇركىمەن قىزمەتىنىڭ حابارلاۋىنشا، تۇركىمەنستانداعى مەملەكەتتىك اقپارات قۇرالدارى قورىتىندى باعدارلاماسىندا پرەزيدەنت جۇرگەن كادرلاردى كورسەتكەن. اشعاباتتاعى ازاتتىق تىلشىلەرىنىڭ توپشىلاۋىنشا، كادرلار وسىدان بىرنەشە كۇن بۇرىن پرەزيدەنت دەمالىسقا كەتىپ بارا جاتقان كەزدە تۇسىرىلگەنگە ۇقسايدى. ولاردىڭ حابارلاۋىنشا، قازىر اشعاباتتا جاعداي قالىپتى.
21 شىلدەدە "تۇركىمەنستان حرونيكاسى" باسىلىمى پرەزيدەنتتىڭ اناسى وگۋلابات بەردىمۇحامەدوۆانىڭ گەرمانيادا ەمدەلىپ جاتقانىن، جاعدايى اۋىر ەكەنىن حابارلاعان.
بيىل 29 ماۋسىمدا 62 جاسقا تولعان گۋربانگۋلى بەردىمۇحامەدوۆ ورتالىق ازياداعى تابيعي گازعا باي تۇركىمەنستاندى 2006 جىلدىڭ جەلتوقسانىنان بەرى باسقارىپ كەلەدى. ول - ساپارمۇرات نيازوۆتان كەيىنگى ەلدىڭ ەكىنشى پرەزيدەنتى.
2017 جىلى اقپاندا وتكەن پرەزيدەنت سايلاۋىنىڭ رەسمي قورىتىندىسى بويىنشا، سايلاۋشىلاردىڭ 97 پايىزى داۋىسىن العان گۋربانگۋلى بەردىمۇحامەدوۆ ءۇشىنشى مەرزىمگە پرەزيدەنت بولىپ سايلانعان. بۇل ەلدە پرەزيدەنت جەتى جىلعا سايلانادى.
باتىس باقىلاۋشىلارى تۇركىمەنستاندا وسى كەزگە دەيىن ءبىر دە ءبىر سايلاۋ ءادىل جانە ەركىن وتكەن جوق دەپ سانايدى. تۇركىمەنستان بيلىگىن سىنايتىندار مەن قۇقىق قورعاۋشىلار بەردىمۇحامەدوۆتىڭ بيلىككە كەلگەلى وزگەشە ويلايتىنداردى قۋدالاعانىن جانە ايتارلىقتاي وزگەرىس جاساماعانىن ايتادى.
Abai.kz
