باتىس  قازاقستان وبلىسىندا جۇمىس ساپارىمەن جۇرگەن پارلامەنت سەناتىنىڭ دەپۋتاتتارى ەربولات مۇقاەۆ پەن ناريمان تورەعاليەۆ ءبورلى اۋدانىندا بولدى. پارلامەنت دەپۋتاتتارى وڭىرلەردى ارالاپ، جۇرتشىلىقتىڭ تىنىس-تىرشىلىگىمەن تانىستى جانە مۇڭ-مۇقتاجى تۋرالى حاباردار بولدى.

سەنات دەپۋتاتتارى حالىق يگىلىگى ءۇشىن سالىنىپ جاتقان 10 شاعىن اۋدانداعى 9 قاباتتى كوپ پاتەرلى ەكى تۇرعىن ءۇيدىڭ قۇرىلىس جۇمىستارىمەن تانىستى. قازىرگى تاڭدا قۇرىلىس جۇمىستارى جالعاسۋدا. اۋداندىق ساۋلەت، قالا قۇرىلىسى جانە قۇرىلىس ءبولىمى باسشىسىنىڭ مىندەتىن اتقارۋشى ا.يباسوۆ سالىنىپ جاتقان قۇرىلىستاردى دەپۋتاتتارعا تانىستىرا كەلىپ قۇرىلىسقا رەسپۋبليكالىق بيۋدجەتتەن 95 ملن تەڭگە قاراجات بولىنگەنىن، دەگەنمەن ول قارجىنىڭ ۇيلەردى تولىقتاي اياقتاپ تاپسىرۋعا جەتپەيتىنىن ايتتى جانە رەسپۋبليكالىق بيۋدجەتتەن قوسىمشا 1 ملرد 109 ملن تەڭگە قارجى بولۋگە ىقپال ەتۋدى سۇرادى.

دەپۋتاتتار اۋداندىق پوليتسيا ءبولىمىنىڭ جەدەل باسقارۋ ورتالىعىنىڭ عيماراتىمەن دە تانىستى. اۋداندىق پوليتسيا ءبولىمىنىڭ باستىعى د.وتەعۇلوۆ بۇل ورتالىقتى قاجەتتى قۇرال-جابدىقتارمەن قامتاماسىز ەتۋ ءۇشىن اۋقىمدى قاراجات كەرەك ەكەنىن ايتا كەلىپ، مەملەكەتتىك-جەكەمەنشىك ارىپتەستىك اياسىندا ورتالىق قىزمەتىن تولىققاندى قامتاماسىز ەتۋ ءۇشىن قاراجات قاراستىرۋعا كومەكتەسۋدى ءوتىندى.

ە.مۇقاەۆ پەن ن.تورەعاليەۆ اقساي قالاسىنداعى جول قۇرىلىسى جۇمىستارىمەن تانىسۋ ماقساتىندا كۇردەلى جوندەۋدەن ءوتىپ جاتقان  «ناۋرىز-1»، «ناۋرىز-2» كوشەلەرىندە قولعا الىنعان جۇمىستارىمەن تانىستى. بۇل كوشەلەردە جوندەۋ جۇمىستارى قارقىندى جۇرۋدە.

سەناتورلار اقساي قالاسىندا ورنالاسقان «جارسۋات» جانە «تاير» ساۋدا ورتالىقتارىندا بولدى جانە ازىق-تۇلىكتەردىڭ باعالارىمەن تانىسىپ،     كاسىپكەرلەرمەن جانە ساۋدا-ساتتىق جاساپ جۇرگەن اۋدان تۇرعىندارىمەن دە كەزدەستى.

جۇزدەسۋلەر بارىسىندا ءبورلى اۋدانىنىڭ باسشىلىعى جايىق وزەنى جاعالارىنىڭ جىلدان جىلعا سۋمەن شايىلىپ بارا جاتقانىن ايتا كەلىپ، وزەن ماڭىندا ورنالاسقان اۋىل تۇرعىندارىنا تاسقىن سۋدىڭ قاتەر ءتوندىرىپ تۇرعانىن جانە ول جەرگىلىكتى جەردەگى كوكەيتەستى ماسەلەلەردىڭ ءبىرى ەكەنىن اتاپ ءوتتى. جارسۋات اۋىلىنىڭ ماڭىنداعى جايىق وزەنىنىڭ جاعاسىن (1800 م) نىعايتۋ جۇمىستارىنا 2 ملرد 17 ملن تەڭگە قاجەت ەكەنىن، مۇنداي سومانىڭ جەرگىلىكتى بيۋدجەتتىڭ كوتەرە المايتىنىن ايتا وتىرىپ، رەسپۋبليكالىق بيۋدجەتتەن اتالعان سومانى قاراستىرۋعا ىقپال ەتۋىن سۇرادى.

Abai.kz