قىزىلوردا وبلىسىندا بيىل مەكتەپ تابالدىرىعىن اتتايتىن ورەندەر بىلتىرعى جىلدان 2200 وقۋشىعا ارتىپ وتىر. 2019 جىلى 21 600 وقۋشى ءبىرىنشى سىنىپقا بارادى.

تۇڭعىش پرەزيدەنت - ەلباسى نۇرسۇلتان نازارباەۆىڭ 2018 جىلعى 5 قازانداعى جولداۋىندا مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ كەرەكتىگى ايتىلعان.

«الداعى 2019-2020 وقۋ جىلىندا ءبىرىنشى سىنىپقا 21 600 وقۋشى بارادى دەپ جوسپارلانۋدا. بۇل وتكەن جىلمەن سالىستىرعاندا 2200 وقۋشىعا ارتىق. بيىل سىر وڭىرىندەگى بارلىق 293 مەكتەپتە 164 مىڭنان استام وقۋشى ءبىلىم الادى. بيىل 1 ماۋسىمىنان باستاپ 1-سىنىپقا قابىلداۋ پروتسەسى اۆتوماتتاندىرىلعان جۇيەگە قوسىلدى. قازىرگى تاڭدا ولاردىڭ مولتەك اۋداندار بويىنشا مەكتەپتەرگە ورنالاستىرۋ كارتاسى دايىن»،-دەدى وبلىستىق ءبىلىم باسقارماسىنىڭ باسشىسى مايرا مەلدەبەكوۆا.

سوڭعى جىلداردا قىزىلوردا وبلىسىندا اپاتتىق جاعدايداعى مەكتەپتەر سانى ازايدى. قازىرگى تاڭدا جاڭاقورعان اۋدانىنداعى №169 جانە جالاعاش اۋدانىندا №34 مەكتەپتىڭ قۇرىلىسى جۇرگىزىلۋدە. جاڭا عيماراتتار الداعى جىلى اياقتالادى دەپ جوسپارلانىپ وتىر. سونداي-اق، قىزىلوردا قالاسىندا 600 ورىندىق مەكتەپ سالىنۋدا، ونى قازان ايىندا تاپسىرۋ مىندەتتەلگەن.

«اۋىل ەل بەسىگى» باعدارلاماسى بويىنشا 3 مەكتەپكە رەسپۋبليكالىق بيۋدجەت ەسەبىنەن كۇردەلى جوندەۋ جۇمىستارى جۇرگىزىلۋدە.

سونداي-اق، بۇگىنگى كۇنى وبلىستا بالاباقشالار دا جوندەلۋدە.

بيىل ارال، قازالى اۋداندارىنان 85 ورىندىق 2 جەكە بالاباقشا، قىزىلوردا قالاسىنان 140 ورىنعا ارنالعان 1 مەملەكەتتىك بالاباقشا اشىلدى.

قىزىلوردا قالاسىندا مەملەكەتتىك-جەكەمەنشىك ارىپتەستىك نەگىزىندە 320 ورىنعا ارنالعان 1 جەكە بالاباقشا قىركۇيەك ايىنا دەيىن پايدالانۋعا بەرىلەدى.

Abai.kz