بۇگىن پرەزيدەنت اكىمشىلىگىنىڭ باسشىسى قىرىمبەك ەلەۋۇلى شىمكەنت قالاسىنىڭ جاڭا اكىمىن قالالىق اكتيۆكە تانىستىرا بارعان ەدى. 

پرەزيدەنت قاسىم-جومارت توقاەۆ شىمكەنت اكىمى عابيدوللا ءابدىراحىموۆتى قىزمەتىنەن الۋ تۋرالى ارنايى جارلىق شىعارىپ، ونىڭ ورنىنا تۇركىستان وبلىسىنا قاراستى وتىرار اۋدانىنىڭ اكىمى بولعان ەرلان ايتاحانوۆتى تاعايىنداعان بولاتىن.

لوندون كوشەلەرىنەن لەپىرىپ سويلەپ، بيلىكتەگى "اعالارىنا" العىسىن ايتقان ءابدىراحىموۆتىڭ بۇل وتستاۆكاسىنىڭ سەبەبىن قىرىمبەك كوشەرباەۆ ەگجەي-تەگجەيلى ءتۇسىندىرىپ بەرىپتى. "تengrinews.kz" جازدى.

"مەملەكەت باسشىسى قاسىم-جومارت كەمەلۇلى توقاەۆ اتاپ وتكەندەي، قازىر ەڭ باستىسى - حالىق پەن بيلىك اراسىنداعى ديالوگ.

عابيدوللا ءابدراحىموۆ ەلىمىزدىڭ باسشىلىعى تاراپىنان قولداۋعا يە بولىپ، سەنىمگە يە بولعانىن جاقسى بىلەسىزدەر. ول ەلىمىزدەگى ەڭ جوعارى جانە جاۋاپتى لاۋازىمدارىنا تاعايىندالدى. وكىنىشكە قاراي، ول مۇنى جەتكىلىكتى تۇردە تۇسىنبەدى", - دەدى قىرىمبەك كوشەرباەۆ.

ارىستاعى اعايىن اپات كورىپ، اڭىراپ بوسىپ شىمكەنتكە بارعاندا ءدال وسى ءابدىراحىموۆ "قاتىندارىڭا يە بولىڭدار" دەپ جەكىرە سويلەپ، جەكسۇرىن كورىنگەن ەدى. اكىم بالا ءابدىراحىموۆتىڭ كەي قىلىعى ونان كەيىن دە الەۋمەتتىك جەلىدە قىزۋ تالقى بولعان.

وتكەندە عانا لوندوننىڭ كوشەسىندە كوفە ءىشىپ جۇرگەن عابيدوللا ءابدىراحىموۆتىڭ ەرسى بەينە جازباسى  اجەپتاۋىر اڭگىمە بولدى. ازىلكەشتەر اكىمنىڭ بەينەجازباسىن ءاجۋا قىلىپ، پاروديا جاسادى. ەندى بۇگىن ءابدىراحىموۆتىڭ اكىمدىكتەن كەتۋىنىڭ دە ءبىر سەبەبى سول بەينە جازبا بولعان كورىنەدى. ءپا جەتەكشىسى قىرىمبەك كوشەرباەۆ بۇل تۋرالى دا ايتقان ەكەن.

"بۇل مەملەكەت باسشىسىنىڭ تاپسىرماسىنا قايشى كەلەدى، جالپى العاندا، بيلىكتىڭ بەدەلىنە نۇقسان كەلتىرەدى. بۇگىندە ابدىراحىموۆقا كورسەتىلگەن ساياسي سەنىم تۇگەسىلدى", - دەيدى قىرىمبەك كوشەرباەۆ.

Abai.kz