جىل سايىن ءبىزدىڭ وبلىس ورتالىعى ءبىر شابىلىپ قالادى. بۇل «قوستاناي قالاسىنىڭ كۇنى» دەگەن «اتاقتى» مەرەكە. وۋ، ونىڭ ورنى مۇلدەم بولەك. وعان مەملەكەتتىك تە، ۇلتتىق مەرەكەلەرەدىڭ دە ەشقايسىسى دا جەتپەيدى. مۇمكىن، تەك ونىمەن اناۋ اپتالاپ تويلايتىن جاڭا جىل مەيرامى عانا تالاسا الار. قالعاندارى ونىڭ قولىنa سۋ قۇيۋعا دا جارامايدى.

سونىمەن، القيسا، جىل سايىنعى بەرىك قالىپتاسقان «داستۇرمەن» قالا كۇنىن جىل بويى ەستە قالارلىقتاي ەتىپ، وتە جوعارى دەڭگەيدە وتكىزۋگە دەگەن باسەكە باستالىپ كەتتى. ول وسى ايدىڭ 16-17 كۇندەرىنە بەلگىلەنسە دە، ونىڭ داڭقى قازىردىڭ وزىندە جەر جارىپ جاتىر. وسىنداعى جەرگىلىكتى ءباسپاسوزدىڭ قۋانا حابارلاعانداي بيىل تاعى دا رەسەي «جۇلدىزدارىنىڭ» ونەرىنە تاڭ قالىپ، اۋىز اشىپ، تامسانا تامالايتىن كورىنەمىز. ال جالپى، بۇل كونتسەرتتىڭ كوركىن اشاتىن كورشى ەلدىڭ DJ-BROTHER-S ديدجەيلەرى-- ەگىزدەر رۋسلان مەن سەرگەي سميرنوۆتار كورىنەدى. بۇلاردىڭ قانشالىقتى اتاقتارى جەر جارعان «مىقتىلار» ەكەندىگىن قالامىزدىڭ باسشىلارى جاقسى بىلمەسە، ءبىزدىڭ حابارىمىز شامالى.

جارايدى، ەگىزدەر ساحنادا «ەگىلە» بەرسىن، مۇمكىن وعان وسىنداعى وزگە ۇلت وكىلدەرىنىڭ توبەلەرى كوككە ءبىر ەلى جەتپەي  قالار. الايدا كەلەسى ءبىر شەتەلدىك «جۇلدىز» ميتيا فومين دەگەننىڭ سول رەسەيدىڭ وزىندە الدەقاشان ۇمىت بولعاندىعىن وسىنداعى جەرگىلىكتى ورىس ءتىلدى ءباسپاسوزدىڭ ءوزى دە مويىندايدى. كەزىندە سوناۋ 2000 جىلدىڭ باسىندا سونداعى  Hi-Fi دەگەن توپتا ونەر كورسەتىپتى دە، سول كەتكەننەن مول كەتىپتى.

مىنە بيىلعى تويىمىزعا كەلەتىن «قادىرلى قوناقتارىمىزدىڭ» سيقى وسىنداي. وسىندايدا  «وزىمىزگە ۇنەمى تاڭسىق بولاتىن، وزگەلەردىڭ قاڭسىعىنا كەتكەن قايران بيۋدجەتتىڭ اقشاسى-اي» دەگەن وي سانامىزدان كەتپەي قويدى. ءبىر قىزىعى، مۇنداي «مىرزالىق» ءبىزدىڭ قالا باسشىلارىنىڭ قانىنا ءسىڭىپ كەتكەن «جامان اۋرۋ» ما دەپ قالاسىڭ. ويتكەنى مۇنداي مەرەكەدەن كورشىمىزدىڭ «جۇلدىزسىماقتارى» ەش ۋاقىتتا شەت قالعان ەمەس. كىم كەلمەدى دەيسىڭ، قالامىزعا. قازىر سولاردىڭ اتىن اتاپ، ءتۇسىن تۇستەۋگە شامامىز دا جوق. ويتكەنى ولاردىڭ ءتىزىمىن جاساساق، اكياعىنا جەتە الماي، شارشاپ قالارىمىز انىق. «جامان» ادەت جۇققىش كەلەدى ەمەس پە. مۇنداي «باستامانى» وبلىسىمىزدىڭ وزگە دە رۋدنىي مەن ليساكوۆ سەكىلدى قالالارى دا، قۋانا قولداپ، اتتانداپ الا جونەلەدى. ولاردا رەسەي جۇرشىلىعى الدەقاشان ۇمىتقان انشىلەرى كەشكىلىك اتويلاپ جاتادى.

ءجا، جارايدى ءبىز بۇل «داستۇردەن» قۇتىلا المايدى ەكەنبىز. ال ەندى ءوز ەلىمىزدەن كىمدەر كەلەدى ەكەن، سوعان كوز جىبەرەلىك. بۇل مەرەكەدە ءبىز Sam Cosmo دەگەن اتپەن ماقسات ءماجيتوۆتى كورەدى ەكەنبىز. ول كەزىندە «لا-لا-لا» دەگەن انمەن كوپشىلىككە تانىلىپتى. الايدا ءبىز ونى اسا تانىمادىق. سوسىن ولارعا قازاقستاندىق ديدجەيلەر Nurbergen مەن   Mirha Katova قوسىلىپ،   كورەرەندەردى Da Gudda jazz حيپ-حوپ توبى ءبىر سەرپىلتىپ تاستايتىن كورىنەدى. ايتپاقشى، مۇنداي «جۇلدىزدى توپتاردىڭ» قاتارىنا قازاقستاندىق ءانشى ديانا شاراپوۆانى دا قوسىپ، ايدى اسپانعا ءبىر-اق شىعارعان.

مىنەكەي، بىزدەگى قۋانىش وسىنداي. تەك كوڭىلگە جۇبانىش بولاتىن نارسە، بۇل جولى ەلىمىزگە عانا ەمەس، الەمگە تانىمال بولىپ قالعان، كۇمىس كومەي ءانشىمىز، وسى ولكەنىڭ ءوز تۋماسى سۇندەت بايعوجيننىڭ قايتالانباس تالانتىنان ءبىر ءلاززات الادى ەكەنبىز. بۇعان دا شۇكىر دەلىك،

جايبەرگەن بولاتوۆ

Abai.kz