انا مەن بالا قۇقىعى قوعام ءۇشىن قاشان دا وزەكتى. بۇل ءبىزدىڭ ەلىمىز ءۇشىن دە اسا ماڭىزدى. ەلباسى قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ “قازاقستا-2050” ستراتەگياسى قالىپتاسقان مەملەكەتتىڭ جاڭا ساياسي باعىتى دەپ اتالاتىن قازاقستان حالقىنا جولداۋىندا انا مەن بالانىڭ قۇقىعىن قورعاۋ ماسەلەسىنە ايرىقشا نازار اۋدارعان بولاتىن.

وندا نۇرسۇلتان ءابىشۇلى: “مەملەكەت ءۇشىن جانە مەنىڭ جەكە ءوزىم ءۇشىن دە انانى قورعاۋ – ەرەكشە ماسەلە”،-دەدى. ودان ءارى ەلباسى جولداۋىنداعى انالارعا قاتىستى سوزدەردى قاز-قالپىندا كەلتىرسەك:

-ءبىز قازاقستان قىزدارىنىڭ ساپالى ءبىلىم الىپ، جاقسى جۇمىسقا يە بولۋى جانە تاۋەلسىز بولۋلارى ءۇشىن بارلىق جاعدايدى جاساۋىمىز قاجەت. ولار بانك كارتوچكالارىنا يە بولۋعا، كولىك جۇرگىزىپ، قىزمەت جولىن قالىپتاستىرا الۋعا، زامانعا ساي بولۋعا، ساندەنۋگە ءتيىس جانە بىزدەردە ەشقاشان كيىلمەگەن، سالتىمىزعا جات كيىمدەرگە ورانىپ-قىمتانباۋعا ءتيىس. ءبىزدىڭ حالقىمىزدىڭ ءوز مادەنيەتى، ءوز ءداستۇرى مەن سالتى بار. حالقىمىز "قىزدىڭ جولى جىڭىشكە" دەگەنگە ەرەكشە ءمان بەرىپ ايتادى. بويجەتكەننىڭ جولى، قىزدىڭ جولى – قىلداي، ونى ۇزۋگە بولمايدى. بويجەتكەن، ايەل زاتى ءاردايىم ءبىزدىڭ قوعامنىڭ تەڭقۇقىلى مۇشەسى، ال انا – ونىڭ ەڭ ارداقتى تۇلعاسى بولدى. ءبىز ايەل زاتىنا – اناعا، جارعا، قىزعا دەگەن قاپىسىز قۇرمەتتى قايتا ورالتۋعا تيىسپىز"

ال، ەلىمىزدە سول انالار مەن ولاردىڭ بالالارىنىڭ قۇقىعى قانشالىقتى قورعالىپ جاتىر. بۇل ماسەلەدە مەملەكەت بەي-جاي قالعان جوق. ماسەلەن، 2006 جىلدان بەرى ەلىمىزدە بالالار قۇقىعى جونىندەگى ۋاكىلەتتىك باستاپ جۇمىس ىستەيدى.

ال، كۇنى كەشە اتالعان ورىنعا ارۋجان ساين تاعايىندالدى. ول ەندى قازاقستاننىڭ بالا قۇقىعى جونىندەگى ومبۋدسمەنى قىزمەتىن اتقارادى.بۇل تۋرالى اقوردا سايتى حابارلادى. مۇنداي جارلىققا قازاقستان پرەزيدەنتى قاسىم-جومارت توقاەۆ قول قويعان. ال، بالا قۇقىعى جونىندەگى بۇرىنعى ۋاكىل ساۋلە ايتپاەۆا بۇل قىزمەتتەن بوساتىلدى.

ەندى ارۋجان ساين كىم دەگەنگە كەلەر بولساق...

ارۋجان ساين قىزىوردا قالاسىندا دۇنيەگە كەلگەن. 1993 جىلى ءال-فارابي اتىنداعى قازاق مەملەكەتتىك ۋنيۆەرسيتەتىنىڭ گەوگرافيا فاكۋلتەتىنە وقۋعا تۇسەدى. ناقتىراق ايتساق، ەكولوگيا جانە مانيتورينگ كافەدراسىندا وقىعان. ال، 2006 جىلى ول “مەيىرىم” ەرىكتى قوعامى” اتتى قايىرىمدىلىق قورىن قۇرادى. اتالعان قور اۋىر دەرتكە شالدىققان بالالار مەن سابيلەر ۇيلەرىنە كومەك كورسەتۋمەن اينالىسادى. سونىمەن قاتار ارۋجان ساين سول قۇرىلعان قور اياسىندا ناۋقاس بالالاردىڭ ەمىنە اقشا جينايدى.  جانە، بالاسىز وتباسىلاردىڭ بالا اسىراپ الۋىنا جاعداي جاساپ، ينكليۋزيا ماسەلەلەرىمەن اينالىسادى. ول  وسىلايشا،  ەلگە ەڭ اۋەلى اۋىر دەرتكە شالدىققان بالالاردى ەمدەتۋمەن اينالىسقان قايىرىمدىلىق ارەكەتتەرى ارقىلى تانىمال بولدى. ول وسى ماقساتتا “قايىرىمدىلىق” اتتى قوعامدىق قور قۇرىپ، قارجى جيناۋمەن اينالىستى. اتالعان قورعا مەملەكەت تاراپىنان دا ۇلكەن قولداۋلار بولدى. سەبەبى ەلىمىزدە مەملەكەت تاراپىنان انا مەن بالاعا ۇنەمى ۇلكەن كوڭىل ءبولىنىپ كەلەدى. ءسويتىپ، 2015 جىلى ارۋجان سايننىڭ “قايىرىمدىلىق” قورى ەلباسى، قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆتان 300 مىڭ دوللار جاردەم العان. ايتا كەتەيىك، ارۋجان ساين قىتاي حالىق رەسپۋبليكاسىندا “جىبەك جولى بەيبىتشىلىك سىيلىعى” اتتى جۇلدەمەن ماراپاتتالعان. ال، اتالعان قاراجات سول سىياقىنىڭ ءبىر بولىگى.

ودان بولەك، ارۋجان ساين اۋىر دەرتكە شالدىققان بالالار تۋرالى بىرنەشە تەلەجوبالار جاسادى. ول سونىمەن قاتار قوعام قايراتكەرى. ارۋجان 2012 جىلى جانە 2015 جىلدارى “جىلدىڭ قوعام قايراتكەرى” اتالىمى بويىنشا، “حالىق سۇيىكتىسى” ۇلتتىق جۇلدەسىنىڭ لاۋرەاتى اتانعان. بۇگىندە 42 جاستاعى ارۋجان حانىم ەندى بالالار قۇقىعىن قورعاۋ جونىندەگى ومبۋدسمەن قىزمەتىن  وز جاۋاپكەرشىلىگىنە الماق.

ايتا كەتەيىك، قازاقستاندا بالالار قۇقىعى جونىندەگى ۋاكىلەتتىك 2006 جىلدان باستاپ جۇمىس ىستەيدى. ول قازاقستان رەسپۋبليكاسى ۇكىمەتىنىڭ جارلىعىمەن قازاقستان رەسپۋبليكاسى ءبىلىم جانە عىلىم مينيسترلىگىنىڭ جانىنان بالالاردىڭ قۇقىقتارىن قورعاۋ كوميتەتى رەتىندە قۇرىلدى.اتالعان ۋاكىلەتىككە العاش رەت زاعيپا باليەۆا تاعايىندالدى. الايدا، 2018 جىلى ول قىزمەتىن قازىرگى سەنات دەپۋتاتى ساۋلە اتپاەۆا حانىمعا تابىستاعان بولاتىن. كوميتەت 2018-2019 وقۋ جىلىنىڭ باسىندا سەبەپسىز ساباق قالدىرعان، اتا-انا قاراۋىنىز قالعان 236 بالانى  انىقتادى. ولاردىڭ ون ءبىرى قايتادان ساباققا بارا باستاعان.

Abai.kz