سەيسەنبى, 17 قىركۇيەك 2019
كورشىنىڭ كولەڭكەسى 1156 3 پىكىر 19 تامىز, 2019 ساعات 10:22

اتامباەۆتىڭ ۇلى: باس پروكۋراتۋرا مۇلىك جايلى مالىمەتتى بۇرمالاپ وتىر

قىرعىزستاننىڭ بۇرىنعى پرەزيدەنتى المازبەك اتامباەۆتىڭ ۇلى باس پروكۋراتۋرانىڭ اكەسىنىڭ مۇلكى جايلى مالىمەتتى بۇرمالاپ وتىر دەپ ەسەپتەيدى.

كادىربەك اتامباەۆ Facebook جەلىسىندەگى ءوزىنىڭ پاراقشاسىندا باس پروكۋراتۋرا «ءوز جانۇياسىنا تيەسىلى ەمەس مۇلىكتى تىركەپ جىبەرگەنىن» جازعان. «بيلىك وكىلدەرى ايتقان 120 مۇلىكتىڭ ىشىندەگى 101-ءى اتامباەۆقا دا، ونىڭ جانۇياسىنا دا تيەسىلى ەمەس ەكەنىن اتاپ كورسەتكىم كەلەدى. «كىرگىزاۆتوماش» بىرىككەن اكتسيونەرلىك قوعامى 2007 جىلدان بەرى بىزگە تيەسىلى ەمەس» دەيدى ول.

كادىربەك اتامباەۆتىڭ ايتۋىنشا، ولاردىڭ جانۇياسىندا «كىرگىزستان» بانكىندە 2002 جىلى اشىلعان جالعىز ەسەپ-شوت بار. ال «اپرەل» تەلەارناسىنىڭ جالال-ابادتا مۇلكى جوق. تەلەراديو ۇيىمدارى قاۋىمداستىعى دا اتامباەۆتار جانۇياسىنا تيەسىلى ەمەس.

اتامباەۆتىڭ ۇلى اكەسىنىڭ كوي-تاشتاعى ۇيدەن باسقا مۇلىكتەرى ول پرەزيدەنت بولعانعا دەيىن الىنعانىن ايتادى. ول باس پروكۋراتۋرا دەرەگىندە اتامباەۆتىڭ مۇلكى رەتىندە اتالعان 1985 جىلى قايتىس بولعان اتاسىنىڭ ءۇيى دە ەنگىزىلگەنىنە تاڭعالىپ وتىر.

«اكەمىز توقسانىنشى جىلداردىڭ باسىنا باستاپ كاسىپكەر جانە مەتسەنات رەتىندە بەلگىلى بولعانىن ەسكە سالعىم كەلەدى. ول - ءوزىنىڭ جاعدايىن مەملەكەتتىك قىزمەتتە ەمەس، بيزنەسپەن اينالىسىپ ءجۇرىپ جاساعان ادام» دەيدى كادىربەك اتامباەۆ.

قىرعىزستان باس پروكۋراتۋراسى بيىلعى 16 تامىزدا المازبەك اتامباەۆتىڭ مۇلىكتەرى، باعالى قاعازدارى، اكتسيالارى، بانكتەگى ەسەپ-شوتتارى، «كىرگىزاۆتوماش»، «اپرەل-تۆ»، «مەديا فورۋم» كومپانيالارىنىڭ مۇلىكتەرىنە تىيىم سالىنعانىن حابارلاعان.

اتامباەۆتىڭ ادۆوكاتى سلەسارەۆ تامىزدىڭ 15-ءى كۇنى ازاتتىقتىڭ قىرعىز قىزمەتىنە بەرگەن سۇحباتىندا قاماۋدا وتىرعان بۇرىنعى پرەزيدەنتكە جالپى سانى 14 ايىپ تاعىلعانى تۋرالى مالىمدەگەن. ولاردىڭ اراسىندا بيلىك وكىلدەرىنە كۇش كورسەتۋ، جاپپاي تارتىپسىزدىك ۇيىمداستىرۋ، ادام ولتىرۋگە وقتالۋ، كەپىلگە ادام الۋ، زاڭسىز قارۋ ۇستاۋ جانە جەمقورلىققا بايلانىستى تاعى بىرنەشە ايىپ بار.

بيىل مامىردا قىرعىزستان پارلامەنتى بۇرىنعى پرەزيدەنتكە تيىسپەۋشىلىك تۋرالى زاڭعا وزگەرتۋلەر ەنگىزگەن. 27 ماۋسىمدا پارلامەنت اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان.

المازبەك اتامباەۆ قىرعىزستاندى 2011-2017 جىلدارى باسقارعان. 2017 جىلعى قازاندا وتكەن سايلاۋدا ءوزىن قولدايتىن بيلىك پارتياسىنىڭ كانديداتى سوورونباي جەەنبەكوۆ پرەزيدەنت بولىپ سايلانىپ، قىزمەتىن كىرىسكەندە اتامباەۆ وعان باتاسىن بەرگەن.

Abai.kz

3 پىكىر