سەنبى, 21 قىركۇيەك 2019
ساڭلاق 2672 15 پىكىر 23 تامىز, 2019 ساعات 12:26

قازاق كۇرەسىن مەكتەپ باعدارلاماسىنا ەنگىزۋ قاجەت

«قازاق كۇرەسىن مەكتەپ باعدارلاماسىنا ەنگىزۋ قاجەت، كوپتەگەن مەكتەپارالىق سايىستار، كلۋبتاردا چەمپيوناتتار ۇيىمداستىرعان ءجون. بۇل ۇلتتىق سپورتىمىزدىڭ دامۋىنا ىقپال ەتەدى. ويتكەنى، قازاق كۇرەسى ۇلتىمىزدىڭ ابىرويى، حالقىمىزدىڭ قازىناسى، ءبىزدىڭ ماقتان تۇتار بايلىعىمىز. دەمەك، ءبىزدىڭ الدىمىزداعى ماقسات – ونى جوعالتىپ الماي، كەرىسىنشە ودان ءارى دامىتۋ. بۇل رەتتە، قازاق كۇرەسىن دامىتۋدى «رۋحاني جاڭعىرۋ» باعدارلاماسىنا قوسسا يگى» - دەيدى حالىقارالىق Qazaq kuresi فەدەراتسياسىنىڭ باس حاتشى كەڭەسشىسى ۇلان رىسقۇل.

ايتا كەتۋ كەرەك، جۋىردا عانا موڭعوليانىڭ ۇلان-باتور قالاسىندا قازاق كۇرەسىنەن ازيا چەمپيوناتى ءوتتى. چەمپيوناتتىڭ باستى ۇيىمداستىرۋشىسى حالىقارالىق Qazaq kuresi فەدەراتسياسى بولسا، وعان تەنگيزشەۆرويل كومپانياسى قولداۋ كورسەتكەن بولاتىن.

چەمپيونات قورىتىندىسى بويىشا جالپى ەسەپتە قازاقستان قۇراماسى ەكىنشى ورىندى يەلەندى. ءبىرىنشى ورىن 16 مەدالمەن موڭعوليا قۇراماسىندا.

جالپى، حالىقارالىق قازاق كۇرەسى فەدەراتسياسى – ۇلتتىق سپورت ءتۇرىن الەمدىك دەڭگەيدە دامىتىپ، حالىقارالىق سەرىكتەستەر مەن سپورتشىلاردىڭ باسىن بىرىكتىرىپ جۇرگەن بىرلەستىك. حالىقارالىق فەدەراتسيانىڭ قۇرىلعانىنا از بولسا دا، وسى ۋاقىت  ارالىعىندا اۋقىمدى شارالار مەن ناتيجەلى جۇمىستار اتقارىلدى. ونىڭ ۇستىنە، الەم بويىنشا دا ۇلتتىق سپورتىمىزعا قىزىعۋشىلىق تانىتقاندار سانى كۇن ساناپ ارتۋدا.

ۇستىمىزدەگى جىلى قازاق كۇرەسىنەن حالىقارالىق فەدەراتسيانىڭ قۇرىلعانىنا 2 جىل تولدى. وسى كۇنى فەدەراتسيا الەم بويىنشا ءوز وداقتاستارىن جيناي الاتىن، شەتەلدە ۇلتتىق كۇرەستەن بەدەلدى تۋرنيرلەردى وتكىزەتىن جالعىز سپورت فەدەراتسياسى اتانعان. فەدەراتسيا قۇرامىنا 29 شەت ەل جانە ەكى حالىقارالىق سپورت ۇيىمدارى كىردى. جاقىن ارادا تاعى 10 شەتەلدىك مەملەكەت قوسىلادى دەگەن سەنىم بار.

ەۋروپا جانە الەم چەمپيوناتتارىن ءساتتى ۇيىمداستىرعاننان كەيىن، حالىقارالىق فەدەراتسيا جازعى وليمپيادا ويىندارىنىڭ باعدارلاماسىنا قازاق كۇرەسىن قوسۋعا ىنتالى.

Abai.kz

15 پىكىر