بوكستان قازاقستان قۇراماسىنىڭ مۇشەلەرى ازيا چەمپيوناتىنان ورالعان بەتتە قر اۋەسقوي بوكس قاۋىمداستىعىنىڭ پرەزيدەنتى تيمۋر قۇلىباەۆ مىرزانىڭ قابىلداۋىندا بولدى.
ەلوردادا وتكەن باسقوسۋعا استانا قالاسىنىڭ اكىمى يمانعالي تاسماعامبەتوۆ، ۇلتتىق بوكس فەدەراتسياسىنىڭ ۆيتسە-پرەزيدەنتى سەرىك قوناقباەۆ، اتقارۋشى ديرەكتورى جانبولات سارسەنوۆ، قر دزيۋدو فەدەراتسياسىنىڭ پرەزيدەنتى بەكەت ماحمۇتوۆ،  قر تۋريزم جانە سپورت ءمينيسترىنىڭ بوكس جونىندەگى كەڭەسشىسى يۋري تسحاي، جاڭادان تاعايىندالعان اكىمشىلىك ديرەكتورى باقىت سارسەكباەۆ، ۇلتتىق قۇرامانىڭ باس باپكەرى دامير بۋدانبەكوۆ جانە «سارى قۇرلىق» بىرىنشىلىگىندە چەمپيون اتانىپ، جۇلدە العان سپورتشىلارىمىز بەن ولاردىڭ باپكەرلەرى قاتىستى.
ۇلتتىق فەدەراتسيا باسشىسى تيمۋر اسقارۇلى ازيا چەمپيوناتىندا توپ جارىپ، جۇلدە العاندارعا قوماقتى سىياقى تاعايىنداعاندىعىن جەتكىزدى:
– بۇگىنگى تاڭدا ۇلتتىق فەدەراتسيا باسشىلارى بوكسشىلارىمىزدىڭ الاڭسىز جاتتىعۋىنا بارلىق جاعدايدى جاساپ وتىر. قىتاي شارشى الاڭىندا قول جەتكىزگەن تابىستارىڭىز كوڭىل قۋانتارلىقتاي. دەگەنمەن دە كورسەتكىشتەرىڭىز بۇدان دا جوعارى بولعاندا تىپتەن جاقسى بولار ەدى. چەمپيونات باستالعان بەتتە سەنىم ارتقان جىگىتتەرىمىزدىڭ ءبىرازى بىرىنەن سوڭ ءبىرى بىرىنشىلىكتەن شىعىپ قالا باستاعاندا، شىنى كەرەك، قوبالجىدىق. وزدەرىڭىزبەن بىرگە قىتايدا بولعان قر مەملەكەتتىك جاتتىقتىرۋشىسى بولات ابدىراحمانوۆپەن ساعات سايىن تىلدەسىپ، ءمان-جايدى ءبىلىپ وتىردىق. بوكس ءبىزدىڭ ەلدە ءبىرىنشى ورىندا تۇرعاندىقتان، ەلباسىدان باستاپ بۇكىل قازاقستان حالقى سىزدەرگە مول سەنىم ارتادى.
وسى ماڭىزدى شارۋانى قولعا الىپ، يگىلىكتى ءىستى باستاعان سوڭ مۇنى جارتى جولدا قالدىرۋعا ءتيىستى ەمەسپىز. باپكەرلەر مەن سىزدەرگە، بوكسشىلار، قويىلاتىن باستى تالاپ – شارشى الاڭدا جاقسى ناتيجەلەرگە قول جەتكىزۋ. ال قالعانى – ءبىزدىڭ ەنشىمىزدەگى، ءبىزدىڭ موينىمىزداعى شارۋا ، – دەدى.
بۇدان كەيىن ۇلتتىق قۇرامانىڭ باس باپكەرى دامير بۋدانبەكوۆتىڭ ەسەپ بەرۋ تۇرعىسىنداعى بايانداماسى تىڭدالدى.
– ءبىز كوماندالىق ەسەپتە قىتاي مەن وزبەكستان قۇرامالارىن العا جىبەرىپ، ءۇشىنشى ورىن الدىق. بۇگىنگى تاڭدا ءAىۆا-نىڭ (حالىقارالىق اۋەسقوي بوكس فەدەراتسياسىنىڭ) تەحنيكالىق قۇرامىندا، اسىرەسە تورەشىلەر القاسىندا ءبىر ادامىمىزدىڭ بولماۋى قيىنداۋ بولىپ تۇر. بوكسشىلارىمىزعا كوپ كەدەرگى جاساپ وتىر. بۇل جولى دا قازىلار تاراپىنان بۇرا تارتۋلار، ادىلەتتىك تانىتپاۋلار كەزدەستى. وسى جاعىن ەسكەرسەڭىزدەر ەكەن. الدا – الەم چەمپيوناتى. ميلان شارشى الاڭىندا وسىنداي دەڭگەيدە ء(اىۆا ساپىندا) ارقا سۇيەر ادامىمىز بولماسا، جىگىتتەرگە قيىن سوعادى. ويتكەنى بۇل سىنعا بارلىق ەلدەر جان-جاقتى دايىندالىپ جاتقاندىعىن ەستىپ-ءبىلىپ وتىرمىز. ءتىپتى رەكوردتى كولەمدە 100-دەن استام مەملەكەتتەن تاڭداۋلى بىلعارى قولعاپ شەبەرلەرىن جاراتىپ اپارماق. باسقاداي ۇسىنىس-تالاپتارىمىز جوق. بارلىق جاعداي جاسالىپ جاتىر. بارلىعى كوڭىلدەن شىعادى. ۇلتتىق فەدەراتسيانىڭ قولداۋىنىڭ ارقاسىندا ازيا چەمپيوناتىنا الاڭسىز بارىپ قايتتىق، – دەپ تۇيىندەدى ءسوزىن.
بۇدان كەيىن استانا قالاسىنىڭ اكىمى يمانعالي تاسماعامبەتوۆ مىرزا ءسوز الىپ:
– بوكس ەلىمىزدەگى بەتكە ۇستار سپورت ءتۇرى بولعاندىقتان، قانداي دا ءبىر چەمپيونات، تۋرنير بولسىن، كوڭىلگە قونىمدى ناتيجەلەرمەن ورالۋعا تيىسسىزدەر. سىزدەر ۇلت مەرەيىن اسىرىپ، ەلدىڭ داڭقىن وسىرەسىزدەر. سوندىقتان سىزدەرگە قاتاڭ تالاپ قويىلىپ وتىر. ۇلتتىق فەدەراتسيا ازيا چەمپيوناتىنان ولجالى ورالعان بوكسشىلاردى ەرەكشە قوشەمەتكە بولەپ، بۇرىن-سوڭدى بولىپ كورمەگەن سىياقى جاساماق، – دەدى.
ازيادان ولجالى ورالعان بوكسشىلارىمىزعا ارناپ، اق تىلەكتەرىن بىلدىرگەن بەكەت ماحمۋتوۆ پەن سەرىك قوناقباەۆ تا فەدەراتسيا تاراپىنان جاسالىپ وتىرعان قامقورلىققا ريزاشىلىقتارىن ءبىلدىرىپ، الداعى ۋاقىتتا دا جىگىتتەردىڭ جەڭىسكە جەتە بەرۋلەرىنە ساتتىلىك تىلەدى. بۇدان كەيىن تيمۋر اسقارۇلى ازيا چەمپيوندارىن ورتاعا شاقىرىپ، ولارعا سىياقى تابىس ەتتى.
قىتاي شارشى الاڭىندا ءانۇرانىمىزدى شارىقتاتقان سەرىك ساپيەۆ پەن ۆاسيلي لەۆيتكە 100 مىڭ اقش دوللارى كولەمىندە سىياقى تابىس ەتتى. ال قولا جۇلدە يەمدەنگەن ءۇش سپورتشىمىزعا – ولجاس ساتتىباەۆقا، عاني جايلاۋوۆقا جانە داۋرەن ەلەۋسىنوۆكە 40 مىڭ دوللاردان سىياقى بەردى. وسى بوكسشىلاردىڭ جاتتىقتىرۋشىلارىنا دا وسىنداي كولەمدە سىياقى تابىس ەتىلدى.
بوكسشىلار اتىنان ءوز لەبىزىن بىلدىرگەن قۇراما كاپيتانى، الەم جانە ازيا چەمپيونى سەرىك ساپيەۆ:
– بۇل – بىزگە كورسەتىلىپ وتىرعان ۇلكەن قوشەمەت، قوماقتى قولداۋ. الداعى الەم چەمپيوناتىنا بارىمىزدى سالىپ دايىندالامىز. «سول سىندا بيىك مەجەدەن كورىنەمىز» دەپ، سىزدەرگە بارشا بوكسشىلاردىڭ اتىنان ءسوز بەرەمىن، – دەدى.
باسقوسۋ سوڭىندا ءوز ويىن بۇكپەسىز ورتاعا سالعان بەكەت ساپابەكۇلى «قازاق بوكسشىلارىنا بۇرىن-سوڭدى مۇنداي قوماقتى سىياقى جاسالماپتى. ازيادا جۇلدەگە ىلىككەندەرگە وسىنداي سىي-سياپات كورسەتىلىپ وتىرعاندا، الەم چەمپيونى اتانعان بوكسشىلارىمىزدى بۇدان دا جوعارى اسقاقتاتاتىنىمىزدى ىشتەرىڭىز سەزىپ وتىرعان بولار. ەندى ۇلتتىق قۇراما ساپىنداعى ءار بوكسشى الەم چەمپيوناتىندا توپ جارۋعا ۇمتىلاتىندىعى داۋسىز»، – دەدى.
بولات ءجۇمادىلوۆتىڭ، گەننادي گولوۆكين مەن گاليب جافاروۆتىڭ جەڭىستى جولدارىن جالعاستىرعان سەرىك ساپيەۆ «بيىل يتاليادا تاعى دا تەڭدەسسىز تانىلسا» دەگەن بارشا قازاق حالقىنىڭ ارمانى بار ەكەندىگى راس. تەك سەرىكتىڭ بابى مەن باعى قاتار شاپسا ەكەن دەپ تىلەيىك…

تەلجان كۇدەروۆ
“الاش ايناسى” گازەتى  18 ماۋسىم 2009 جىل