بيىلعى جىلدىڭ اقپان ايىندا رەسپۋبليكا كولەمىندە مەكتەپ وقۋشىلارىنىڭ اراسىندا «تۇلپار ءمىنىپ، تۋ العان!» بايقاۋى باستالعانى بەلگىلى. بۇگىنگى تاڭدا بايقاۋدا باق سىناۋعا قىزىلوردا وبلىسىنان 3000-عا تارتا وقۋشى نيەت بىلدىرگەن. ورەندەردى 1400 ۇستاز دايىنداۋدا، - دەپ حابارلايدى اباي-اقپارات.

«تۇلپار ءمىنىپ، تۋ العان!» اعارتۋ جوباسىنىڭ قىزىلوردا وبلىسى بويىنشا شتاب جەتەكشىسى داۋرەن وماروۆ:

– اعارتۋ جوباسىنىڭ وبلىس اۋداندارىنداعى ىرىكتەۋ كەزەڭى 16-26 قىركۇيەك ارالىعىنا جوسپارلانىپ وتىر. بۇگىندە بارلىق اۋداندارداعى دايىندىق جۇمىستارى پىسىقتالدى. ءار اۋداننان جانە قالانىڭ وزىنەن جەڭىمپاز اتانعان 3 قاتىسۋشى، ياعني، 1, 2, 3 ورىن يەگەرلەرى وبلىستىق كەزەڭگە جولداما الادى. وبلىستىق كەزەڭ اعىمداعى جىلدىڭ 2 قازانىندا وتەدى. وبلىستىق كەزەڭدە جەڭىمپاز اتانعان قاتىسۋشىعا 1 ملن تەڭگە، ال، ونى دايىنداعان ۇستازىنا 2 ملن تەڭگە بەرىلەدى. بۇگىنگى كۇننىڭ وزىندە وبلىسىمىزدا جۇزدەگەن وقۋشى «قوبىلاندى باتىر» جىرىنىڭ ماراباي نۇسقاسىن تولىق جاتتاپ العان، - دەيدى.

سونداي-اق، ول «قوبىلاندى باتىر» جىرىنىڭ ماراباي نۇسقاسى ارنايى كىتاپشا ەتىپ شىعارىلىپ، بايقاۋدىڭ بارلىق قاتىسۋشىلارىنا كومەكشى قۇرال رەتىندە تەگىن تاراتىلعاندىعىن اتاپ ءوتتى.

داۋرەن سەيتجانۇلى اعارتۋ جوباسىنا وبلىس بويىنشا بارلىق اۋدان ەرەكشە دايىندالىپ جاتقاندىعىن جەتكىزدى.

– قازالى اۋداندا قازىردىڭ وزىندە گۇلفايرۋز الىشەۆانىڭ شاكىرتتەرى، ە.بوزعۇلوۆ اتىنداعى №249 مەكتەپ-ليتسەيدىڭ وقۋشىلارى ايمەيىر ءابدراحىم، گۇلزيرا قونىسباي، مەيرامكۇل جولەكەش باپتاعان ب.مەرگەنباەۆ اتىنداعى №226 مەكتەپ-گيمنازيا وقۋشىلارى ازيزا ايداربەكوۆا، ايا سەردالى، سۇلتانعازى توماي جەتەكشىلىك ەتەتىن №88 مەكتەپتىڭ ابىرويىن ارقالاعان جازيرا نۇرقاش، ايەركە تورەمۇرات سىندى وقۋشىلار «قوبىلاندى باتىر» جىرىن تۇگەلدەي جاتتاپ العان، - دەدى ول.

سول سەكىلدى، اتالعان اۋدانداعى №238 مەكتەپتىڭ 6 سىنىپ وقۋشىلارى، ەگىزدەر نۇرتالاپ جانە ەرتالاپ امىربەكتەر دە جىردى تۇگەلدەي جاتتاپ الىپتى.

شارانى ۇيىمداستىرۋشىلار «Qazaq Epos» قوعامدىق قورىنىڭ باستاماسىمەن تۇڭعىش رەت وتكەلى وتىرعان اۋقىمدى جوبانىڭ نەگىزگى ماقساتى – جاستاردى «الپامىس»، «ەر تارعىن»، «قوبىلاندى باتىر» جىرلارى سىندى xالقىمىزدىڭ باي مۇراسى نەگىزىندە تاربيەلەپ، ەلىمىزدەگى قازاق ءتىلى مەن ادەبيەتى ءپانى مۇعالىمدەرىنىڭ بىلىكتىلىگىن ارتتىرۋ» دەيدى.

Abai.kz