سارسەنبى, 16 قازان 2019
1414 4 پىكىر 18 قىركۇيەك, 2019 ساعات 12:49

داريعا نازارباەۆا: الەمدىك كونفەسسيالار باسشىلارىنىڭ ەلوردادا كەزدەسۋى داستۇرگە اينالدى

ەلوردادا الەمدىك جانە ءداستۇرلى دىندەر ليدەرلەرى سەزى XVIII حاتشىلىعىنىڭ وتىرىسى ءوتىپ جاتىر. وتىرىسقا قر پارلامەنتى سەناتىنىڭ توراعاسى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى داريعا نازارباەۆا توراعالىق ەتۋدە.

«وسى كۇندەرى الەمدىك جانە ءداستۇرلى دىندەر ليدەرلەرىنىڭ ءبىرىنشى سەزى وتكەن كەزدەن بەرى 16 جىل ءوتىپ وتىر. سول ساتتە قوناقجاي قازاق جەرى العاش رەت بەيبىتشىل، دوستىق پەيىلدى جانە جەمىستى كونفەسسياارالىق ديالوگتى جۇرگىزۋ ءۇشىن اشىق الاڭعا اينالعان بولاتىن. قر تۇڭعىش پرەزيدەنتى – ەلباسى نۇرسۇلتان نازارباەۆ الەمدىك جانە ءداستۇرلى دىندەر ليدەرلەرىنىڭ سەزىن وتكىزۋ يدەياسىنىڭ اۆتورى بولدى. وتكەن جىلدارى قازاقستاننىڭ وراسان زور يادرولىق قارۋ ارسەنالىنان باس تارتۋىنا باستاماشى بولعان، بۇكىل الەم مويىنداعان بىتىمگەر، تاۋەلسىزدىك جىلدارى ىشىندە وڭىرلىك قاۋىپسىزدىك پەن تۇراقتىلىقتىڭ تىرەگىنە اينالعان ەلدىڭ باسشىسى نۇرسۇلتان نازارباەۆتىڭ باستاماسىن ەڭ ءىرى الەمدىك دىندەر مەن كونفەسسيالاردىڭ باسشىلارى قولدادى»، - دەدى وتىرىستى اشقان سەنات سپيكەرى.

سونىمەن قاتار، ول ەلباسىنىڭ كونفەسسياارالىق ديالوگ وتكىزۋ تۋرالى يدەياسىن سول ساتتە بارشا الەم قىزۋ قولداعانىن ەسكە سالدى.

«سودان بەرى قازاقستاننىڭ تۇڭعىش پرەزيدەنتىنىڭ ستراتەگيالىق سالماقتى ءارى كورگەن باستاماسى ءوزىنىڭ وزەكتىلىگىن جوعالتقان ەمەس. جاڭا مىڭجىلدىق باسىندا ەڭ جوعارى دەڭگەيدە كونفەسسياارالىق اشىق ديالوگ وتكىزۋ ناعىز رەۆوليۋتسيالىق ءىس ەدى. ال بۇگىنگى كۇنى ءىرى الەمدىك كونفەسسيالار باسشىلارىنىڭ ەۋرازيا كىندىگىندە كەزدەسۋى ىزگى داستۇرگە اينالدى»، - دەدى داريعا نازارباەۆا.

ايتا كەتەيىك، بۇگىنگى وتىرىستا الەمدىك جانە ءداستۇرلى دىندەر ليدەرلەرىنىڭ VI سەز قورىتىندىلارى مەن حاتشىلىق قىزمەتىنىڭ كەلەشەگى تۋرالى پىكىر الماسىلادى. سودان كەيىن 2021 جىلعى الەمدىك جانە ءداستۇرلى دىندەر ليدەرلەرىنىڭ VII سەزىن وتكىزۋ بويىنشا ۇسىنىستار تالقىلانادى.

Abai.kz

4 پىكىر