سوچيدە ءوتىپ جاتقان «ۆالداي» پىكىرتالاس كلۋبىنا قاتىسۋعا كەلگەن قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينمەن كەزدەستى.

قازاقستان پرەزيدەنتىن قۇرمەتپەن قارسى العان ۆلاديمير پۋتين قاسىم-جومارت توقاەۆتىڭ «ۆالداي» پىكىرتالاس كلۋبىنىڭ جۇمىسىنا قاتىسۋىنا رەسەي تاراپى ۇلكەن ءمان بەرىپ وتىرعانىن ايتتى.

– ءبىزدىڭ شاقىرتۋىمىزدى قابىل الىپ، «ۆالداي» پىكىرتالاس كلۋبىنىڭ جۇمىسىنا قاتىسۋعا كەلگەنىڭىز ءۇشىن ريزاشىلىعىمدى بىلدىرەمىن. ءبىزدى ۇزاق جىلدار ديپلوماتيالىق قىزمەتتە ىستەگەن ءسىز سەكىلدى ادامنىڭ پىكىرى قاتتى قىزىقتىرادى. ءسىز بۇل سالادا كاسىبي مامانسىز. بۇگىنگى حالىقارالىق ارەناداعى جاعدايعا، اسىرەسە، قاۋىپسىزدىك سالاسىنا بايلانىستى ءسىزدىڭ پىكىرىڭىز ءبىز ءۇشىن وتە پايدالى ءارى قىزىق، – دەدى رەسەي پرەزيدەنتى.

ۆلاديمير پۋتين ەاەو اياسىنداعى بىرلەسكەن جۇمىستاردىڭ بەلسەندىلىگىن اتاپ ءوتتى. ول ۇيىمدى دامىتۋ جونىندەگى بىرلەسىپ شەشىم قابىلداۋدا ءوزارا سەنىمنىڭ جوعارى دەڭگەيگە كوتەرىلگەنىن ايتتى.

رەسەي پرەزيدەنتىنىڭ ايتۋىنشا، ەكى ەل اراسىنداعى ديالوگ تا وتە جەمىستى ءجۇرىپ جاتىر.

– ءبىزدىڭ كۇن تارتىبىندەگى كەز-كەلگەن ەكى جاقتى ماسەلەلەردى تالقىلاۋعا مۇمكىندىگىمىز بار. بارلىق سالا بويىنشا تابىستى دامۋ بايقالادى. تاۋار اينالىمى دا كوڭىلگە قونىمدى. ءارتۇرلى باعىتتا بىرلەسكەن جوبالارىمىز ىسكە اسۋدا، ونىڭ ىشىندە، ءداستۇرلى جانە جوعارى تەحنولوگيالار بويىنشا ىنتىماقتاسا ارەكەت ەتۋدەمىز. ءبىز ۇنەمى زامان اعىمىنىڭ تامىرىن ءدوپ باسىپ، ءار سالاداعى ارىپتەستەرىمىزگە مينيسترلىك دەڭگەيىندە قولداۋ كورسەتىپ كەلەمىز. بۇل جۇمىس جالعاسا بەرەدى، – دەدى ۆلاديمير پۋتين.

قاسىم-جومارت توقاەۆ ۆلاديمير پۋتينگە سوچيگە شاقىرعانى ءۇشىن العىس ايتتى. ونىڭ ويىنشا، «ۆالداي» پىكىرتالاس كلۋبى وتە قىزىقتى ءارى تارتىستى فورۋم.

قازاقستان پرەزيدەنتى رەسەيلىك ارىپتەسىنە جەڭىستىڭ 75 جىلدىق مەرەيتويىنا قاتىسۋعا شاقىرعانى ءۇشىن ريزاشىلىعىن ءبىلدىردى. قاسىم-جومارت توقاەۆ مەرەيتوي كۇندەرى ماسكەۋگە بارۋعا نيەتتى ەكەنىن جەتكىزدى.

– مەن مايدانگەردىڭ ۇلىمىن. جاقىندا يۆانوۆ وبلىسىندا ۇلى وتان سوعىسى كەزىندە قازا تاپقان 73 قازاقستاندىق مايدانگەردىڭ قابىرى تابىلدى. ءبىز، قازاقستاندىقتار، ۇلى جەڭىس جولىندا جانىن قيعان جاۋىنگەرلەردىڭ ەرلىگىن ءاردايىم ەستە ساقتايمىز، – دەدى قازاقستان پرەزيدەنتى.

قاسىم-جومارت توقاەۆ ەلباسى نۇرسۇلتان نازارباەۆ نەگىزىن قالاعان قازاقستان مەن رەسەي اراسىنداعى ارىپتەستىكتىڭ جوعارى دەڭگەيى مەن دارەجەسىنىڭ ساقتالعانىن اتاپ ءوتتى.

– ءومىر ءبىر ورنىندا تۇرمايدى، سول سەبەپتى ءبىزدىڭ ءوزارا ءىس-قيمىلدارىمىزدى جاڭا مازمۇنمەن تولىقتىرىپ، كۇن تارتىبىنە شىققان ماسەلەلەردى دەر كەزىندە شەشىپ وتىرۋ كەرەك. مەن مۇنداي جۇمىسقا دايىنمىن. ءبىزدىڭ ستراتەگيالىق ارىپتەستىگىمىز بەن وداقتاستىعىمىزدى جاڭا دەڭگەيگە كوتەرەمىز دەگەن  ويدامىن، – دەپ مالىمدەدى قاسىم-جومارت توقاەۆ.

مەملەكەت باسشىسى ەۋرازيالىق ەكونوميكالىق وداق شەڭبەرىندە ينتەگراتسيالىق پروتسەستەر بويىنشا جوعارى دەڭگەيدەگى تۇسىنىستىك بارىن اتادى. ونىڭ ايتۋىنشا، ەرەۆاندا وتكەن جەەك وتىرىسىنداعىداي تۋىنداعان ماسەلەلەر بويىنشا ۋاقىتىلى شەشىمدەر قابىلدانۋى قاجەت.

Abai.kz