سەنات توراعاسى داريعا نازارباەۆا باتىس قازاقستان وبلىسىنا جۇمىس ساپارى بارىسىندا ءماسليحات دەپۋتاتتارىمەن، ءماسليحات جانىنداعى قوعامدىق كەڭەس مۇشەلەرىمەن جانە كاسىپكەر ايەلدەر اسسوتسياتسياسىنىڭ وكىلدەرىمەن بىرقاتار كەزدەسۋلەر وتكىزدى.

ءماسليحات دەپۋتاتتارى ايماقتىڭ دامۋىنا قاتىستى جايىق وزەنىندەگى ەكولوگيالىق جاعداي، كاسىپكەرلىكتى دامىتۋ، اگروونەركاسىپ كەشەنىن قولداۋ تۋرالى ەڭ ماڭىزدى ماسەلەلەردى ورتاعا سالدى.

«مۇمكىن، ءبىز ءار وبلىسقا ارنالعان پارلامەنتتىك تىڭداۋلار جوسپارلاۋىمىز كەرەك شىعار. سوندا ءبىز جەرگىلىكتى جەرلەردەگى ادامداردى نە تولعاندىراتىنىن، شەشىلمەي جاتقان قانداي جۇيەلى پروبلەمالار بارىن بىردەن بىلەتىن بولامىز. بۇل جەردە رەتتەۋدىڭ جوقتىعىنان نەمەسە ونىڭ جەتكىلىكسىزدىگىنەن، بولماسا زاڭنامالىق بازانىڭ السىزدىگىنەن شەشىلمەيتىن ماسەلەلەر تۋرالى ءسوز بولىپ وتىر»، - دەدى د.نازارباەۆا ءماسليحات دەپۋتاتتارىمەن كەزدەسۋدە.

د.نازارباەۆا ءماسليحات جانىنداعى قوعامدىق كەڭەس مۇشەلەرىمەن كەزدەسۋدە قازىرگى كەزدە ەلىمىزدە 4 مىڭعا تارتا ادام جۇمىس ىستەيتىن 200-دەن استام كەڭەس قۇرىلعانىن ەسكە سالدى. سەنات باسشىسىنىڭ ايتۋىنشا، قوعامدىق كەڭەستەردىڭ مىندەتى – قابىلداناتىن شەشىمدەرگە تۇراقتى ساراپتاما جاساۋدىڭ ەسەبىنەن اتقارۋشى جانە زاڭ شىعارۋشى بيلىكتىڭ وڭىرلىك ورگاندارى جۇمىسىنىڭ ساپاسىن ارتتىرۋ، مەملەكەتتىك بيلىك ورگاندارىنىڭ الدىنا ايماق حالقىن بارىنشا الاڭداتاتىن وزەكتى ماسەلەلەردى قويا ءبىلۋ.

د.نازارباەۆا كاسىپكەر ايەلدەر اسسوتسياتسياسىنىڭ وكىلدەرىمەن كەزدەسۋ كەزىندە مەملەكەتتىك باسقارۋ مەن ەلىمىزدىڭ ساياسي ومىرىنە ايەلدەردىڭ قاتىسۋىن كەڭەيتۋگە نازار اۋداردى. ونىڭ پىكىرىنشە، قازاقستان حالقىنىڭ 50 پايىزىنان استامىن ايەلدەر قۇرايتىندىعىنا قاراماستان، ولار مەملەكەتتىك قۇرىلىمداردا از.

«مەملەكەتتىك ورگاندار نەمەسە كومپانيالاردىڭ باسشىلارىمەن قوسا، كوپتەگەن جۇمىس بەرۋشىلەر باسشىلىق لاۋازىمعا ايەلدەرگە قاراعاندا ەر ادامدى كوبىرەك الاتىنى قۇپيا ەمەس. بۇل جاعدايدى رەسپۋبليكالىق تا، ايماقتىق دەڭگەيدە دە وزگەرتۋ كەرەك»، - دەدى د.نازارباەۆا.

Abai.kz