تۇركيا اسكەرى 9 قازان كەشكىسىن سيريانىڭ سولتۇستىگىندە اسكەري وپەراتسيا باستادى. بۇل تۋرالى تۇركيا پرەزيدەنتى رەجەپ تايىپ ەردوعان مالىمدەدى.

ەردوعاننىڭ سوزىنشە، بۇل وپەراتسيانىڭ ماقساتى – "يسلام مەملەكەتى" تەررورلىق توبىمەن جانە كۇردتەرمەن كۇرەس.

انكارا اسكەري وپەراتسيا ارقىلى سيريا مەن تۇركيا شەكاراسىنىڭ ماڭىندا قاۋىپسىز ايماق قۇرىپ، سيريالىق بوسقىنداردى وسى جەرگە ورنالاستىرۋدى كوزدەيدى.

كۇرد جاساقتارى مەن اراب جاساقتارى اقش باسقاراتىن حالىقارالىق كواليتسيا مەن بۇۇ-نى سيريانىڭ سولتۇستىك-شىعىسىندا ۇشاق ۇشپايتىن ايماق قۇرۋعا شاقىردى. ولاردىڭ ايتۋىنشا، انكارانىڭ وپەراتسياسى "گۋمانيتارلىق اپاتقا" اكەلەدى.

سيريا سىرتقى ىستەر مينيسترلىگى تۇركيانىڭ "قاۋىپسىزدىك ايماعىن قۇرۋ" يدەياسىن "حالىقارالىق قۇقىقتاردى بۇزۋ" دەپ سىنادى.

ماسكەۋ بۇل وپەراتسياعا ارالاسپايتىنىن، "رەسەيلىك اسكەريلەر سيريادا باسقا ماقساتتا جۇرگەندەرىن" مالىمدەدى.

دەمالىس كۇندەرى تۇركيا پرەزيدەنتى رەجەپ تايىپ ەردوعان سيريانىڭ سولتۇستىك-شىعىسىنا اسكەر كىرگىزەتىنىن جاريالاعان.

سيريالىق كۇردتەر – اقش-تىڭ "يسلام مەملەكەتى" تەرروريستىك توبىمەن كۇرەستە نەگىزگى سەرىكتەسى. ال تۇركيا كۇرد جاساقتارىن "تەررورلىق توپ" دەپ سانايدى.

6 قازاندا اقش پرەزيدەنتى دونالد ترامپ پەن تۇركيا پرەزيدەنتى ەردوعان تەلەفونمەن سويلەسىپ، انكارانىڭ اسكەري وپەراتسياسىن تالقىلاعان. كەيىن ترامپ اكىمشىلىگى بۇل وپەراتسياعا قاتىسپايتىنىن مالىمدەپ، امەريكالىق اسكەريلەر سيريانىڭ سولتۇستىك-شىعىسىن تاستاپ كەتە باستاعان.

بىراق ترامپ "ەگەر انكارا ارتىق كەتسە، تۇركيانىڭ ەكونوميكاسىن كۇل-تالقانىن شىعاراتىنىن" ايتتى.

Abai.kz