جەكسەنبى, 17 جەلتوقسان 2017
كورشىنىڭ كولەڭكەسى 3283 71 پىكىر 12 قازان, 2017 ساعات 14:59

اتامباەۆ "تۇيە-ساياساتكەر" ەمەس

قىرعىز پرەزيدەنتى المازبەك اتامباەۆتىڭ الا-ارشا رەزيدەنتسياسىندا مۇعالىمدەرگە ماراپات تاپسىرۋ كەزىندە ەموتسياعا بەرىلىپ، قازاق ەلىنىڭ كوشباسشىسىنا ءتىل تيگىزدى. جەكە ادام رەتىندە ارينە قانداي وي ايتسا دا قۇقىلى ەدى. بىراق، المازبەك اتامباەۆ كورشى ەلدىڭ پرەزيدەنتى، رەسمي مەملەكەتتىڭ ءبىرىنشى ادامى ەمەس پە؟. وسىنداي لاۋازىمدى تۇلعانىڭ ءوزىن-ءوزى ۇستاي الماۋىنىڭ استارىندا نە جاتىر؟ ساۋاتسىزدىق پا، جوق الدە سىرتقى كۇشتەردىڭ ىقپالى ما؟

المازبەك اتامباەۆتىڭ قازاقستان ەكونوميكاسىنا، ونىڭ ىشىندە ءجىو مەن زەينەتاقى مولشەرىنىڭ سايكەسسىزدىگى تۋرالى ايتقاندارى شىندىققا جاناساتىنىن جوققا شىعارعىمىز كەلمەيدى. قىرعىز باسشىسى قازاق ۇلتىن ەمەس، بيلىكتىڭ ەكونوميكالىق ساياساتىن سىنعا الدى.

بىراق، نە ءۇشىن؟ بۇل سىننىڭ ءوز ەلى ءۇشىن پايداسى بار ما؟

ارينە، نۇرسۇلتان نازارباەۆ بابانوۆقا جىلى كوزقاراس تانىتتى ەكەن دەپ، بۇكىل ەكى ەلدىڭ قارىم-قاتىناسىنا سىزات تۇسىرۋگە بولمايدى ەمەس پە؟

جالپى، المازبەك اتامباەۆ ءوزىنىڭ قالىپقا سىيمايتىن ازاماتتىق تۇلعاسىمەن الەم الدىندا تالاي كۇلكىگە قالعانىن ەسكەرسەك، بۇل جولعىسىن دا جاي ساۋاتسىزدىق دەۋگە بولار ەدى. بىراق، "سونشالىق دەڭگەيدە ساۋاتسىز بولسا، ول بىرنەشە جىل كورشى ەلدى قالاي باسقارىپ كەلدى؟" دەگەن زاڭدى ساۋال تۋىندايدى.

وزبەكستانعا بارىپ، سۋ جاڭا پرەزيدەنتپەن ءتوس قاعىستىرىپ كەلىپ، نازارباەۆقا شۇيلىگۋدىڭ، حان-كەنەنىڭ باسىن العان ەلدىڭ باسشىسى رەتىندە "جاس پرەزيدەنت بىزدەن گورى قازاقستانعا كەرەك" دەپ كوسەمسۋدىڭ استارىندا سىرتقى كۇشتەردىڭ ىقپالى بار ەكەنىن اڭعارۋعا بولادى.

جالپى، ەكى ەلدىڭ اراسىن ۋشىقتىرۋ ارقىلى، ساياسي الپاۋىتتار ءوز دەگەنىن جاساعىسى كەلەتىنى بايقالادى.

اتامباەۆ قازاق بيلىگىنە ءتىل تيگىزدى. سوسىن سوچيگە بارمايتىن سىلتاۋ ويلاپ تاپتى. سىلتاۋىنىڭ ءتۇرى "لانكەستىك پەن كوتەرىلىس بولۋى مۇمكىن" دەگەن دولبار. بۇل دولبار قازاق بيلىگىنە شەكاراداعى تەكسەرىستى كۇشەيتۋىنە تولىق مۇمكىندىك الىپ بەرىپ وتىر.

اتامباەۆ بىزدە لانكەستىك بولعالى جاتىر دەپ رەسمي مالىمدەمە جاساسا، قازاقستان تاراپى ساقتىق شارالارىن جۇرگىزۋگە قۇقىلى بولىپ شىقپاي ما؟

بۇل ساقتىق اتامباەۆقا قىمباتقا تۇسەرىن قىرعىز بيلىگى ەندى عانا تۇسىنە باستادى. قانشاما تاۋار شەكارادا قاڭتارىلىپ تۇر. قانشاما ەل شەكارادان وتە الماي، زار قاقساپ جاتىر.

بۇل كىشكەنە عانا - كيكىلجىڭ. بىراق، بۇ كيكىلجىڭ ۇلعايا بەرسە، ەكى ەل اراسىنداعى بەيبىتشىلىككە نۇقسان كەلۋى ابدەن مۇمكىن.

"ەكى تۇيە سۇيكەنسە، اراسىندا شىبىن ولەدى".

اتامباەۆ "تۇيە-ساياساتكەر" ەمەس. سوندىقتان دا "اتانعا" بارىپ سۇيكەنگەنىن ءتۇسىنىپ، ەكى ەل اراسىنداعى تۇسىنىسپەۋشىلىكتى تەز جويۋعا تىرىسۋى كەرەك.

كورشى ەلدىڭ بيلىگىن مىنبەدە تۇرىپ الىپ وتىنباەۆانى، تەكەباەۆتى سوككەندەي سوگۋ - كەشىرىلمەيتىن ءىس.

ال، ەندى ولارعا ءبىزدىڭ تاراپ كەدەندىك قىسىم كورسەتۋمەن جاۋاپ بەرسە، بۇل دا اقتايتىن قادام ەمەس.

ءشارىپحان قايسار

Abai.kz

71 پىكىر