سارسەنبى, 13 قاراشا 2019
تالقى 1555 43 پىكىر 31 قازان, 2019 ساعات 18:53

استانا مەكتەپتەرىنە اراب شەيحتارىنىڭ اتى بەرىلەدى

ءيا، استانانىڭ قوس بىردەي مەكتەبىنە اراب شەيحتارىنىڭ اتى بەرىلەدى. بۇل ۇسىنىستى باس قالانىڭ ءماسليحاتى، ونداعى داۋدەي دەپۋتاتتار ماقۇلداپتى.

اتاپ ايتقاندا، نۇر-سقلتان قالاسىنداعى №84 مەنتەپ-ليتسەيىنە شەيح حاليفا بەن زايد ءال-ناحاياننىڭ، ال № 85 مەكتەپكە شەيح تاميم بەن حامادا ءال-تانيدىڭ ەسىمى بەرىلەدى ەكەن.

استانالىق ونوماستيكالىق كوميسسيا ۇزىن-ىرعاسى 12 مەكەمەنىڭ اتاۋىن قاراپ، اقىلداسىپ، ماقۇلداسىپتى. ول مەكەمەلەرگە ەندى جۇمابەك تاشەنوۆتىڭ، احمەت بايتۇرسىنوۆتىڭ، بەيىمبەت ءمايليننىڭ، شاكارىم قۇدايبەردىۇلىنىڭ، ءماشھۇر-ءجۇسىپ كوپەيۇلىنىڭ، ءىلياس جانسۇگىروۆتىڭ، مىرجاقىپ دۋلاتوۆتىڭ، ءاليحان بوكەيحان مەن ساكەن سەيفۋلليننىڭ اتى بەرىلەدى.

سونداي-اق، نۇر-سۇلتان قالالىق وقۋشىلار سارايى ەندى ءابۋ ناسىر ءال-ءفارابيدىڭ اتىمەن اتالادى.

استانا مەكتەپتەرىنە اراب شەيحتارىنىڭ اتى بەرىلۋى تۋرالى اقپاراتقا نۇر-سۇلتان قالاسى، مۇراعات ىستەرى جانە تىلدەردى دامىتۋ باسقارماسىنىڭ باسشىسى تىلەۋگەلدى قىشقاشباەۆ (كيشكاشباەۆ) پىكىر ءبىلدىرىپتى.

"مەكتەپ - ءبىلىم بەرۋ جۇيەسىنىڭ ەڭ ماڭىزدى نىسانداردىڭ ءبىرى. قازىرگى تاڭدا استانامىزدا 87 مەكتەپ جۇمىس ىستەپ تۇر. ونىڭ ىشىندە 10 مەكەمەگە قازاقستاننىڭ داڭقتى ازاماتتارىنىڭ اتى بەرىلگەن.

ايتا كەتەيىك، استانانى دامىتۋدا شەتەلدىك ينۆەستورلاردىڭ ولشەۋلى ۇلەسى بار. مىسالى، اراب شەيحتارىنىڭ اتى بەرىلەتىن مەكتەپتەردىڭ قۇرىلىسى سول شەتەلدىك ينۆەستورلاردىڭ قارجىسىنا سالىنعان.

حاليفا بەن زايد ءال-ناحايان اتىنداعى گۋمانيتارلىق قور № 84 مەكتەپ-ليتسەيدىڭ قۇرىلىسىن تولىق قارجىلاندىرعان. 

ال № 85 مەكتەپتىڭ قۇرىلىسىنا كاتار مەملەكەتىنىڭ دامۋ قورى قارجى اۋدارعان. اتالعان ءبىلىم بەرۋ مەكەمەلەرى ينۆەستورلار ەسەبىنەن بارلىق كەرەكتى وقۋ قۇرالدارىمەن جابدىقتالعان", دەپتى قىشقاشباەۆ.

تاقىرىپقا تۇزدىق رەتىندە ايتايىق، وتكەندە عانا وسى اراب شەيحتارىنا سيرەك كەزدەسەتىن قۇستاردى اۋلاۋعا ارنايى رۇقسات بەرگەن ەدى. رۇقساتتى باسقا-باسقا ەمەس، پرەمەر-ءمينيستردىڭ ءوزى بەرگەن.

كاتار مەن اراب امىرلىگىنىڭ 4 شەيحىنا جىلىنا 300-دەي قۇس اتۋعا رۇقسات ەتىلگەن. ارابتار اتپاقشى قۇس - قىزىل كىتاپقا ەنگەن جيەك دۋاداق نەمەسە جورعا دۋاداق ەكەنى دە بەلگىلى بولعان.

الگى اتىگورلەردى ءتىپتى "وحوتزووپروم" ينسپەكتورلارى كولىكپەن الىپ جۇرەدى ەكەن تاعى. ويپىرىمويلارعا مۇنشا بايەك بولاتىنداي نە قۇدىرەت دەپ شۋلاعان جۇرت. سول كەزدە مينيستر ماعزۇم مىرزاليەۆتىڭ ءوزى تەرلەپ-تەپشىپ ءتۇسىندىرىپ ەدى.

سويتسەك، قۇسقۇمار شەيحتار قازىناعا قارجى قۇيىپتى-مىس. قر ەكولوگيا، گەولوگيا جانە تابيعي رەسۋرستار ءمينيسترى مىرزاعاليەۆتىڭ ءسوزى، بۇل: "وسى جولى بۇلارعا 273 قۇسقا رۇقسات بەردىك. دەگەنمەن قانشا شىعاتىنى بەلگىسىز. ول اڭشىلىق قوي. 270 قۇسقا 181 ميلليون تەڭگە اقشا تۇسەدى".

اراب شەيحتارىنا سيرەك كەزدەسەتىن قۇستاردى اتۋعا رۇقسات بەرەتىن قاۋلىنى قر ۇكىمەتى قابىلداعان. ساياتشىلىق 15 قاراشاعا دەيىن سوزىلعان. ءسويتىپ، قىزىل كىتاپتاعى قۇستاردى قۇمارلىق ءۇشىن قىرۋ قۇقىعى بىرنەشە ادامعا رەسمي بەرىلگەن. ولاردىڭ اراسىندا جاڭاعى حاليفا بەن زايد ءال-ناحايان دا بار.

4 شەيح دەدىك قوي. ونىڭ ءبىرى - حاليفا بەن زايد ءال-ناحايان. وعان ارىس  قالاسىنا قاراستى اۋماقتا جانە قاراتاۋ مەملەكەتتىك قورىعىندا 35 دۋاداق، سونداي-اق، وڭتۇستىك قازاقستان، جامبىل، قىزىلوردا وبلىستارىنىڭ اۋماعىنداعى قورىقتاردا 49 دۋاداقتى اۋلاۋعا رۇقسات ەتىلگەن.

حاليفا ءال-ناحايان بىرىككەن اراب امىرلىگىنىڭ پرەزيدەنتى. ەلدىڭ بۇرىنعى پرەزيدەنتى زايد يبن سۇلتان ءال-ناحاياننىڭ ۇلكەن ۇلى.

2004 جىلى اكەسى قايتىس بولعان سوڭ پرەزيدەنتتىك تاقتى يەلەنگەن. وعان دەيىن ءابۋ ءدابيدىڭ ءامىرى بولعان. الەمدەگى ەڭ داۋلەتتى ميللياردەرلەردىڭ ءبىرى. "Forbes" جۋرنالىنىڭ تۇجىرىمى بويىنشا ونىڭ بايلىعى 15 ميلليارد دوللار دەپ ەسەپتەلەدى.

ال شەيح حاما́د بەن حالي́فا ءال-تا́ني قازىرگى ۋاقىتتا كاتار ەلىنىڭ ءامىرى. بۇل شەيح تۋرالى ءتۇرلى اڭگىمەلەر بار. ول 1995 جىلى اكەسى حاليفا بەن حاماد شۆەيتساريادا دەمالىپ جاتقان كەزدە ەلدە قانسىز توڭكەرىس جاساپ، اكەسىنىڭ تاعىن باسىپ العان. اقپارات قۇرالدارىندا جاسى 65-كە جۋىقتاپ قالعان ءامىردىڭ دەنساۋلىعىنىڭ ناشار ەكەندىگى ايتىلادى. سونىمەن بىرگە ول 1996 جىلى اتاقتى «ءال-جازيرا» تەلەكانالىن قۇرعان ازامات رەتىندە اتالادى.

مىنە، جاڭاعى قۇسقۇمار اراب امىرىنە ەندى باس قالانىڭ مەكتەبىنەن ايدىكتەپ ات بەرەتىن بولدىق.

Abai.kz

43 پىكىر