1986 جىلعى جەلتوقسان كوتەرىلىسىن ەسكە الۋ جانعا دا باتادى، جۇرەكتى دە اۋىرتادى... جەلتوقسان كوتەرىلىسىنىڭ ماڭىزىن تۇسىنبەي، تۇسىنسە دە، ادەيى بۇرمالاپ نەمەسە وعان ءمان بەرمەگەنسىپ جۇرگەندەر دە بار. بىلە بىلسەك، كومپارتيانىڭ قۇرساۋىنداعى حالقىمىزعا ازاتتىقتىڭ قادىر-قاسيەتىن تەرەڭ تۇسىندىرگەن ناق وسى جەلتوقسان كوتەرىلىسى بولاتىن. بىراق، بيلىك مۇنى تولىق مويىنداماي وتىر. مويىنداسا، بۇل مەملەكەتتىك يدەولوگيامىزدىڭ باستى تارماعىنىڭ بىرىنە اينالۋى كەرەك. سوندا عانا ەلدىڭ رۋحى نا رۋح قوسىلار ەدى.
كوپ جاعدايدا حالىققا ەڭبەگى سىڭگەن جانداردى جۋرناليست ارىپتەستەرىم، اقىن-جازۋشىلارىمىز، «عاجاپ، كەرەمەت ەدى» دەپ ولگەننەن كەيىن ماداقتايدى. ءتىرى كەزىندە ەلەي بەرمەيمىز. سول جاعداي قازىر جەلتوقسان كوتەرىلىسشىلەرىنىڭ دە باسىندا بار.

«جەلتوقسان كوتەرىلىسى» ۋاقىت وتە كەلە ءوز باعاسىن الارى ءسوزسىز. قازىر وعان ءتيىستى ءمان بەرىلمەي وتىر. ويتكەنى، بيلىكتە وتىرعان كوپ ادامنىڭ قولدارى قان. شىندىق ەرتە مە، كەش پە ءبارىبىر اشىلادى. بالكىم سول كەزدە جەلتوقساندىقتاردىڭ ستاتۋستارى دا قارالۋى عاجاپ ەمەس. قاي مەملەكەتتىك مەرەكە بولماسىن، ەڭبەك ارداگەرلەرى، سوعىس ارداگەرلەرى اتالىپ وتەدى دە، جەلتوقسانشىلار تاسادا قالىپ جاتادى. جەلتوقسانشىلاردىڭ ەل تاۋەلسىزدىگىنە قوسقان ۇلەسى ولشەۋسىز. ءبىر عانا مىسال: كەز كەلگەن سوعىسقا قاتىسۋشى بۇيرىقپەن بارسا، بىزدەر، جەلتوقسانشىلار الاڭعا بۇيرىقسىز، ءوز ەركىمىزبەن شىقتىق.

سوندىقتان، ەلىنىڭ كەلەشەگى ءۇشىن، كۇرەسكە شىققانداردى مويىنداماۋ – قياناتتىڭ ەڭ ۇلكەنى.

«جەلتوقسان كوتەرىلىسىن» مويىنداپ، ءتيىستى باعاسىن بەرىپ، «جەلتوقساندىقتاردى» وتان، اۋعان سوعىسىنا قاتىسقاندارمەن تەڭەستىرسە دەگەن تىلەك بار.

ءبارىبىر «جەلتوقسان كوتەرىلىسىن» ەشكىم تاريحتان وشىرە المايدى. ءبىز ماڭدايىمىزعا جازىلعانىن كوردىك، ەلىمىز الدىنداعى ازاماتتىق، پەرزەنتتىك بورىشىمىزدى ادال اتقاردىق.

ال، جەل­توقسان كوتەرىلىسى – تاۋەلسىزدىككە جول اشقان ۇلت تاريحىنداعى شەشۋشى كوتەرىلىس بولدى دەۋگە تولىق حاقىمىز بار.