جۇما, 29 ناۋرىز 2024
بيلىك 2854 0 پىكىر 3 ءساۋىر, 2020 ساعات 10:40

مەملەكەت باسشىسى ەۋروپالىق كەڭەس پرەزيدەنتىمەن تەلەفون ارقىلى سويلەستى

مەملەكەت باسشىسى قاسىم-جومارت توقاەۆ ەۋروپالىق كەڭەس پرەزيدەنتى شارل ميشەلمەن تەلەفون ارقىلى سويلەستى. تاراپتار الەمدەگى كوروناۆيرۋس ىندەتىنىڭ تارالۋىنا قاتىستى قازىرگى احۋالدى جانە ونىڭ سالدارىن جويۋ جونىندەگى بىرلەسكەن شارالاردى تالقىلادى.

شارل ميشەل ەلىمىزدە COVID-19 ۆيرۋسىنىڭ ودان ءارى تارالۋىنا جول بەرمەۋ ءۇشىن قازاقستان پرەزيدەنتىنىڭ ناقتى ءىس-قيمىلدارى مەن شەشىمدەرىنە جوعارى باعا بەردى. ونىڭ ايتۋىنشا قازاقستان ورتالىق ازيا ايماعىنداعى ەۋروپالىق وداقتىڭ اسا ماڭىزدى سەرىكتەسى سانالادى. وسى رەتتە ەلىمىزدىڭ ىندەتكە قارسى كۇرەس جونىندەگى حالىقارالىق جانە وڭىرلىك ءىس-شارالارعا اتسالىسۋىنىڭ ماڭىزى زور ەكەنىن، ونىڭ بريۋسسەلدە جوعارى باعالايتىنىن جەتكىزدى.

ەۋروپالىق كەڭەستىڭ باسشىسى قازاقستان پرەزيدەنتىنىڭ شاعىن جانە ورتا بيزنەستى قولداۋ، ازاماتتاردى جۇمىسپەن قامتۋ، مەملەكەتتىڭ حالىق الدىنداعى الەۋمەتتىك مىندەتتەمەلەرىن ورىنداۋ ماقساتىندا داعدارىسقا قارسى قابىلداعان ءىس-شارالارىن ەرەكشە اتاپ ءوتتى. قاسىم-جومارت توقاەۆ مەملەكەتتىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋ ءۇشىن قازاقستاننىڭ ناقتى شەشىمدەر قابىلدايتىنىن ايتتى.

اڭگىمەلەسۋ بارىسىندا مەملەكەت باسشىسى ەۋرووداق وكىلىنە پاندەمياعا قارسى كۇرەس بويىنشا رەسەيدىڭ، قىتايدىڭ جانە ورتالىق ازياداعى بىرقاتار ەلدەردىڭ باسشىلارىمەن تەلەفون ارقىلى جۇرگىزگەن كەلىسسوزدەردىڭ قورىتىندىلارى تۋرالى اقپارات بەردى.

سونىمەن قاتار قازاقستان پرەزيدەنتى بۇۇ باس حاتشىسى انتونيۋ گۋتەرريشتىڭ كوروناۆيرۋسقا قارسى كۇرەسكە باعىتتالعان، ونىڭ ىشىندە، حالىقارالىق قارجىلاندىرۋ (5 ترلن. دوللار) ارقىلى الەمدەگى ءالسىز مەملەكەتتەرگە كومەك كورسەتۋ جونىندەگى گۋمانيتارلىق جوسپارىن ىلگەرىلەتۋ جايىنداعى باستاماسىن قولدايتىنىن ايتتى.

تاراپتار قازاقستان مەن ەۋروپالىق وداققا مۇشە ەلدەر اراسىنداعى قاتىناستاردىڭ قازىرگى جاعدايى مەن دامۋ پەرسپەكتيۆالارى، اتاپ ايتقاندا، قازاقستان مەن ەۋروپالىق وداق اراسىنداعى سەرىكتەستىك پەن ىنتىماقتاستىقتى كەڭەيتۋ تۋرالى جاڭا كەلىسىمدى جۇزەگە اسىرۋ تۋرالى پىكىر الماستى.

مەملەكەت باسشىسى اتالعان قۇجاتتىڭ ساياسي ديالوگتى ودان ءارى نىعايتۋدىڭ، قازاقستان مەن ەۋروپالىق وداق اراسىنداعى ءوزارا ءتيىمدى ساۋدا-ەكونوميكالىق جانە ينۆەستيتسيالىق ىنتىماقتاستىقتى ارتتىرۋعا بەرىك نەگىز بولاتىنىن ءمالىم ەتتى.

ءCوز سوڭىندا تاراپتار وڭىرلىك جانە جاھاندىق كۇن تارتىبىندەگى بىرقاتار وزەكتى ماسەلەگە نازار اۋداردى. اتاپ ايتقاندا، شارل ميشەل استانا فورماتى اياسىندا وتكەن سيريا كەلىسسوزدەرىنىڭ پرەسپەكتيۆاسىنا قىزىعۋشىلىق تانىتتى. قاسىم-جومارت توقاەۆ سيرياداعى قاقتىعىستى بەيبىت جولمەن رەتتەۋ جونىندەگى جەنەۆا پروتسەسىن جالعاستىراتىن كەلىسسوزدەردىڭ كەزەكتى كەزەڭىن وتكىزۋ ءۇشىن قازاقستاننىڭ ءوز الاڭىن ۇسىنۋعا دايىن ەكەنىن ناقتىلادى.

تەلەفون ارقىلى سويلەسۋگە ەۋروپالىق تاراپ باستاماشى بولدى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558