قوستاناي وبلىسىندا اۋا رايىنىڭ قولايسىزدىعىنا بايلانىستى ءۇش قالا سۋسىز، جارىقسىز جانە جىلۋسىز قالدى.

قوستاناي، رۋدنىي، ليساكوۆسك قالالارىندا ەلەكتر بەرەتىن قۇرىلعىلار مەن اعاشتار، بيلبوردتار مەن عيماراتتاردىڭ قاپتاماسى قيراعان.

"جارىق بار كەزدە 11 حابارلاما ءتۇستى. ونىڭ ۇشەۋى ەلەكتر بەرۋ قۇرىلعىلارىنىڭ قيراعانى تۋرالى بولدى. قازىر بۇكىل قالا بويىنشا اقپارات انىقتالىپ جاتىر" - دەيدى قوستاناي وبلىسى اكىمدىگىنىڭ احۋالدىق ورتالىعى باسشىسىنىڭ مىندەتىن اتقارۋشى الىشەر باتىربەكوۆ.

ال، رۋدنىي قالالىق تۇرعىن ءۇي-كوممۋنالدىق شارۋاشىلىق ءبولىمى جاعدايدى قالپىنا كەلتىرىپ جاتقاندارىن ايتادى.

«قاتتى جەلدەن بولعان ەلەكتر جەلىلەرىندەگى اپات سالدارىنان شاحتالار سۋسىز جانە ەلەكتر جارىعىنسىز قالدى. سۋ قۇبىرىنداعى سورعىلار ەلەكترمەن جۇمىس ىستەپ جاتىر، ياعني ءبارى بايلانىستىرىلعان. قازىر قالپىنا كەلتىرۋگە تىرىسىپ جاتىرمىز.بىراق اۋا-رايىنىڭ ناشارلاۋىنا بايلانىستى جوندەۋ جۇمىستارى قيىنعا سوعادى» - دەدى رۋدنىي قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ باستىعى ولجاس ومىرزاقوۆ.

سونداي-اق، ليساكوۆسك تۇرعىندارى سۋ، ەلەكتر ەنەرگياسى مەن جىلۋدىڭ توقتاتىلاتىندىعىن حابارلايدى.

قوستانايدا اۆتوبۋس قاتىناسى توقتاتىلدى. كوپتەگەن ايماقتىق جولدار كورىنبەيدى. بىرنەشە اپات تىركەلگەن.

Abai.kz