قازاقتىڭ تەكتىلىگىنە تاڭعالام. راس ايتام. دəل وسى ءسوزىم پافوس ەمەس. پافوستى جەك كورەم.

بۇگىن ءبىر جازبامدا "قازى جەگىم كەلدى" دەپ جازعام. مəسكەۋدە تۇراتىن قازاق كەلىنشەك "ايا، سəلەمەتسىز بە! ءسىزدىڭ جازباڭىزدى وقىدىم. ەگەر مەترو مولودەجناياعا كەلە الساڭىز، مەن سىزگە قازى بەرەيىن. قوستانايدان الدىرتقانمىن، مامام ءوزى جاساعان. اۋىلدىڭ دامىنەن اۋىز ءتيىڭىز دەگەنىم عوي" دەپ جازىپتى. جەكەگە جازىلعان حاتتى جاريالاعانىما وقىرمانىم رەنجىمەس دەپ ويلايمىن. (جالپى جەكەدەگى حات جەكەدە قالۋ كەرەك دەپ سانايتىن اداممىن).

بۇل جاي حات ەمەس، بۇل - قازاقتىڭ قازاقتىعىن، ادامنىڭ ادامدىعىن كورسەتەتىن حات. بىرەۋ بولماسا، بىرەۋگە ىزگىلىكتى وي سالار، ۇيىقتاپ جاتقان ميلاردى وياتار دەگەنىم عوي.

"تەگىن الا المايمىن، اقشاسىن تولەپ الايىن" دەسەم، "جوق، سىزدەن ءبىر تيىن المايمىن" دەيدى ءۇزىلدى-كەسىلدى.

بارعاندا بايقاتپاي قالتاسىنا اقشا سالىپ جىبەرۋگە اقىلىم جەتەدى. بىراق ونىڭ تاپ-تازا سەزىمىن، كوڭىلىن تاپتايمىن عوي.

ءوزى بولسا، ەلدەن جىراقتا. كارانتين قاشان بىتەتىنى بەلگىسىز. شەكارا قاشان اشىلاتىنى بەلگىسىز.

بىراق ادامدىقتا شەكارا جوق! ادامدىقتا كارانتين جوق! راقمەت، جاقسى ادام!

اياگۇل مانتايدىڭ الەۋمەتتىك جەلىدەگى جازباسى

Abai.kz