قكپ وك حالىقارالىق ءبولىمىنىڭ مەڭگەرۋشىسى

سۋن تاو مىرزاعا،

قىتاي حالىق رەسپۋبليكاسىنىڭ

قازاقستان رەسپۋبليكاسىنداعى توتەنشە

 جانە وكىلەتتى ەلشىسى

چجان سياو مىرزاعا!

قۇرمەتتى سۋن تاو مىرزا!

قۇرمەتتى چجان سياو مىرزا!

قازاقستاننىڭ «اق جول» دەموكراتيالىق پارتياسى جۋىردا قىتايداعى باق-تا جاريالانعان ارانداتۋ ماقالالارعا بايلانىستى نارازىلىق بىلدىرەدى جانە قازاقستان رەسپۋبليكاسى سىرتقى ىستەر مينيسترلىگىنىڭ وسىعان بايلانىستى نوتاسىنا قوسىلادى.

اشىق اقپارات كوزدەرىنە سۇيەنسەك، كورشى ەلدە قازاقستان رەسپۋبليكاسىنىڭ تەرريتورياسى مەن تاۋەلسىزدىگىنە كوز الارتاتىن جاريالانىمدار كوبەيىپ بارادى. وسى جىلدىڭ 28 ناۋرىزىندا قىتايدىڭ تانىمال WeChat الەۋمەتتىك جەلىسىندە «قازاقستان قىتايعا قاشان ورالادى؟» دەگەن ماقالا; 8 ساۋىردە وسى ەلدىڭ ەڭ ءىرى www.sohu.com ينتەرنەت-پلاتفورماسىنىڭ سايتىندا «نەلىكتەن قازاقستان قىتايعا ورالۋعا ۇمتىلادى؟» دەگەن ماقالا جاريالانعان.

ءبىز مۇنداي اقىلعا سىيمايتىن سوزدەردى قورلاۋ دەپ قابىلدايمىز. «اق جول» دەموكراتيالىق پارتياسى مەن ەلىمىزدىڭ ميلليونداعان ازاماتتارى ءۇشىن قازاقستان رەسپۋبليكاسىنىڭ تاۋەلسىزدىگى مەن ۇلتتىق مەملەكەتتىلىگىنەن قىمبات قۇندىلىق جوق.

وسى باسىلىمدارداعى كەرجاق پىكىرلەر قوس حالىقتىڭ اراسىنداعى تاتۋ كورشىلىك پەن سەنىمگە وراسان زيانىن تيگىزەدى دەپ ەسەپتەيمىز.

ەكى ەلدىڭ مەملەكەتتەرى مەن ساياسي پارتيالارىنىڭ مىندەتى، كەرىسىنشە، ءبىر-ءبىرىمىزدىڭ ۇلتتىق مۇددەلەرىمىزدى ەسكەرە وتىرىپ، تەڭ ديالوگ پەن ىنتىماقتاستىقتى دامىتۋ دەپ سانايمىز.

سونداي-اق سىزدەن وسى باسىلىمدار تۋرالى ءبىزدىڭ پىكىرىمىزدى قىتاي كومپارتياسى ورتالىق كوميتەتىنىڭ حالىقارالىق ءبولىمىنىڭ باسشىلىعىنا جەتكىزۋدى سۇرايمىن.

ازات پەرۋاشەۆ،

پارتيا توراعاسى.               

Abai.kz