بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ سايلاۋ تۋرالى» جانە «ساياسي پارتيالار تۋرالى» زاڭ جوبالارى قارالدى.

بۇل زاڭ جوباسى مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ەكىنشى وتىرىسىندا بەرگەن تاپسىرمالارىن ىسكە اسىرۋ جونىندەگى ءىس-شارالار جوسپارىنا سايكەس ازىرلەنگەن بولاتىن.

ءماجىلىس توراعاسى اتاپ وتكەندەي، العاش رەت پارتيالىق سايلاۋ تىزىمىنە ايەلدەر مەن جاستارعا 30%-دىق مىندەتتى كۆوتا قارالىپ وتىر. وسى رەتتە نۇرلان نىعماتۋلين جاستار كۆوتاسىنا ەرەكشە نازار اۋداردى:

- شىنىن ايتۋ كەرەك، بۇل ماسەلە قوعامدا جانە جۇمىس توبىندا كوپ تالقىلاندى. بىرىنشىدەن، كوپتەگەن ەلدەردە سايلاۋ كەزىندە پارتيالىق تىزىمدە جاستارعا ارنالعان كۆوتا مىندەتتى تۇردە بەكىتىلگەن. ەكىنشىدەن، قاي كەزدە بولسا دا، قانداي قوعامدا بولسا دا جاستارعا دەگەن سەنىم وتە زور.

ارينە، جاستاردىڭ ومىرلىك تاجىريبەسى ازداۋ بولۋى مۇمكىن، بىراق ولاردىڭ زامانعا ساي يدەيالارى، ولاردىڭ زامانعا ساي ۇسىنىستارى وتە كوپ. قازاق حالقى وسىندايدا «اسىل – تاستان، اقىل – جاستان»، دەيدى. سوندىقتان، مەنىڭشە، جاستار كۆوتاسى پارتيالىق تىزىمدە زاڭ بويىنشا مىندەتتى تۇردە بولۋ كەرەك. ارينە، 29 جاستى بىرەۋلەر جاستاۋ دەيدى، بىرەۋلەر جاسى جەتتى دەيدى، بىراق ولاردىڭ زامانعا ساي جاڭا كرەاتيۆتى يدەيالارى بار، ۇسىنىستارى بار. سوندىقتان، مەنىڭشە، ودان قورىقپاۋىمىز كەرەك، - دەدى نۇرلان نىعماتۋلين.

سونىمەن قاتار، ءماجىلىس توراعاسى ساياسي پارتيالاردى تىركەۋ ءۇشىن  پارتيا مۇشەسiن 40 مىڭنان 20 مىڭعا دەيىن تومەندەتۋدىڭ ماڭىزدىلىعىنا توقتالىپ، بۇل نورمالار ايەلدەر مەن جاستاردىڭ ساياساتقا بەلسەندى قاتىسۋىن ىنتالاندىرىپ قانا قويماي، ەلىمىزدىڭ ساياسي جۇيەسىن جاڭعىرتۋعا جاڭا سەرپىن بەرەتىنىن اتاپ ءوتتى.

Abai.kz