نەمەسە قوعام پرەزيدەنتكە قارسى ەمەس، قوعام وزگەرىسكە قارسىلارعا قارسى

كارانتين بيلىكتەگى، قوعامداعى حيمەرالاردىڭ بەتپەردەسىن اياماي سىپىرىپ جاتىر. مەنىڭشە، كورونوۆيرۋس پرەزيدەنتتىڭ «قارا قۋى» (چەرنىي لەبەد) بولمايدى. ۇزاق مەرزىمگە سوزىلاتىن ەكونوميكالىق زارداپتار مەن مۇناي باعاسىنىڭ تومەندەۋى دە; كوپ بالالى انالار مەن الەۋمەتتىك جاعدايى تومەن ازاماتتار دا; كوشە پارتياسى مەن ميتينگىلەر دە; قۇرىلماعان پارتيالار مەن الەۋمەتتىك جەلىدەگى بەلسەندىلەر دە «قارا قۋ» ەمەس.

پرەزيدەنتتىڭ «قارا قۋى» - ەسكى گۆارديا - ونىڭ تاپسىرماسىنا ءبىلىپ-بىلمەي سابوتاج جاساپ وتىرعان ءامىرشىل-اكىمشىل ۇكىمەت وكىلدەرى، كارانتين ۋاقىتىندا باسىن قۇمعا تىققان جالتاق، جاعىمپاز دەپۋتاتتار، حالىقپەن اكىرەڭدەپ سويلەسۋدى ادەتىنە اينالدىرعان جاندارال كۇشتىك قۇرىلىمدار، ءالىپتىڭ ارتىن باعىپ، اۋەجايدا چارتەرلەرىن سايلاپ وتىرعان تويىمسىز، توعىشار وليگارحتار.

ءبارىمىز دە كارانتيننەن كەيىن باسقا قازاقستاندى كورگىمىز كەلەدى. بۇل ءۇشىن الدىمەن جوعارىداعى «ەسكى گۆارديا» ساياسي بيلىكتەن كەتىرىلۋى ءتيىس. كارانتين ولاردىڭ جاڭا ۋاقىتقا، جاڭا احۋال مەن جاڭا وزگەرىستەرگە بەيىمدەلۋگە مۇلدە قابىلەتسىزدىگىن، قۇلىقسىزدىعىن كورسەتىپ بەردى. توقاەۆ كارانتيننەن كەيىن وسى توپتى ساياسي ساحنادان باتىل وقشاۋلاي باستاۋى كەرەك. سوندا عانا حالىقتىڭ، قوعامنىڭ مەملەكەتتىك بيلىككە دەگەن سەنىمى قايتا ويانادى. قولداۋى كۇشەيەدى. ال، كارانتيننەن كەيىن مۇنداي قولداۋ بيلىككە اۋاداي، ءتىپتى اۋادان دا ارتىق قاجەت بولاتىنى ايتپاسا دا تۇسىنىكتى.

قوعام توقاەۆقا قارسى ەمەس، قوعام ازىرگە وزگەرىسكە قارسىلارعا قارسى بولىپ وتىر. ازىرگە...ەرتەڭ كەش بولادى.

تالعات ەشەنۇلى

Abai.kz