سارسەنبى, 1 اقپان 2023
3178 0 پىكىر 1 مامىر, 2020 ساعات 11:35

تاجىكستان بيلىگى ەلدە كوروناۆيرۋس بارىن مويىندادى

كوروناۆيرۋس ىندەتىنە بايلانىستى قۇرىلعان تاجىكستاننىڭ مەملەكەتتىك كوميسسياسى 30 ساۋىردە ەلدە كوروناۆيرۋس جۇققان كەمىندە 15 ادام بار دەپ مالىمدەدى. بۇل تۋرالى ازاتتىقتىڭ تاجىك قىزمەتى حابارلادى. مەملەكەتتىك كوميسسياعا پرەمەر-مينيستر كوحير راسۋلزودا جەتەكشىلىك ەتەدى.

اقپارات بويىنشا، تاجىكستاننىڭ دەنساۋلىق ساقتاۋ جانە حالىقتى قورعاۋ مينيسترلىگى 29 ساۋىردە حۋدجاندتا - 10, دۋشانبەدە 5 ادامعا ۆيرۋس جۇققانىن انىقتاعان.

COVID-19 ىندەتى شىققان قىتايمەن شەكارالاس تاجىكستان باسشىلىعى ەپيدەميا باستالعان ۋاقىتتان بەرى العاش رەت كوروناۆيرۋس بارىن مويىنداپ وتىر.

بۇعان دەيىن ەلدە رەسمي تۇردە كوروناۆيرۋس تابىلماعان. دەگەنمەن ەلدە اۋرۋحانا قىزمەتكەرلەرى مەن باسقا دا ادامداردىڭ تۇسىنىكسىز پنەۆمونيا مەن تىنىس جولدارى اۋرۋلارىنان كوز جۇمىپ جاتقانى تۋرالى حابار ءجيى تاراي باستاعان.

وتكەن اپتادا حالىقارالىق Human Rights Watch (HRW) ادام قۇقىعىن قورعاۋ ۇيىمى كوروناۆيرۋستىڭ بارىن جوققا شىعارىپ وتىرعان تۇركىمەنستان مەن تاجىكستان بيلىگى وسىلايشا ازاماتتارىنىڭ ومىرىنە قاۋىپ ءتوندىرىپ وتىر دەپ مالىمدەگەن.

Abai.kz

0 پىكىر