كەشەگى تالايلاردىڭ جانىنا تەرەڭ جارا سالعان، قاسىرەتىن سوزبەن جەتكىزە المايتىن، دۇنيەجۇزىن سانسىراتقان ءىى-ءشى دۇنيەجۇزىلىك سوعىس ءورتى شارپىماعان وتباسى ەلىمىزدى قويىپ، الەمدە كەمدە-كەم شىعار.

مۇقاعالي اتامىز ايتقانداي «بىزدەر جەڭدىك جوق بولىپ، جارالى بوپ. ءبىز قۋاندىق الدىمەن قارالى بوپ». اۋىلىنان شىعىپ ەۋروپانىڭ تورىنە قان مايداندى جاياۋ كوكتەي ءوتىپ بارعان (بارماي قالعاندارى ودان كوپ), بەيبىت كۇندى جاقىنداتقان كەشەگى مايدانگەرلەر قاتارى ەلىمىزدە ءورت شالعان ورمانداي سەلدىرەپ-اق قالدى. ال، ءبىزدىڭ اۋىلىمىزداعى ەتىگىمەن قان كەشكەن ەرلەردىڭ ءبارى باقيلىق بولدى.  دەگەنمەن، ۋىزداي بالا بولسا دا، بۇعاناسى قاتپاعان قىز-جىگىتتەر بولسا دا ناردىڭ جۇگىن كوتەرىپ، تىلدا ەرەن ەڭبەك ەتىپ جەڭىسكە ولشەۋسىز ۇلەس قوسقان قازىنالى قارتتارىمىز بار. سوعىستان كەيىنگى قيراعان شارۋاشىلىقتى قالپىنا كەلتىرۋگە، قارالى جىلداردا جارالى جانداردىڭ قولتىعىنان دەمەۋ بولىپ، ەل ەڭسەسىن كوتەرۋگە قاباق شىتپاستان ەرەكشە ەڭبەك سىڭىرگەن اتا-اجەلەرىمىزدىڭ ءجۇرىپ وتكەن جولى بىزدەر ءۇشىن ونەگە. بۇل دا بولسا ەلىن، جەرىن ءسۇيۋدىڭ ەرەن ۇلگىسى شىعار.

سول ونەگەلى ءومىر جولىنان وسكەلەڭ ۇرپاق ۇلگى السىن دەگەن نيەتپەن جىل سايىن شوشاناي ورتا مەكتەبىندە تىل ارداگەرلەرىمەن ارنايى كەزدەسۋ ۇيىمداستىرىلاتىن. الايدا  بۇكىل الەمدە ورىن الىپ وتىرعان COVID-19  ىندەتىنىڭ كەسىرىنەن بيىلعا جوسپارلانعان ءبىرشاما ءىس-شارالار قاتارىندا بۇل كەزدەسۋلەر دە وتپەيتىن بولدى.

الايدا، شوشاناي اۋىلىنان تۇلەپ ۇشىپ، بۇگىندەرى وتانىمىزدىڭ تۇكپىر-تۇكپىرىندە جەمىستە دە ابىرويلى قىزمەت ەتىپ جۇرگەن ازاماتتار بيىلعى ۇلى جەڭىستىڭ 75 جىلدىعىن ەلەۋسىز قالدىرماي اۋىلمىزداعى ارداگەر قارتتارعا، سونىمەن قاتار توتەنشە جاعدايعا وراي ءارى، قاسيەتتى رامازان ايىندا اۋىلىمىزداعى كوپ بالالى انالاردى، از قامتىلعان وتباسىلاردى جانە باسقا دا الەۋمەتتىك كومەك الۋعا ءتيىستى وتباسىلاردى قۋانتۋ ءۇشىن  قىسقا ۋاقىتتىڭ ىشىندە ءبىر جاعادان قول، ءبىر جەڭنەن باس شىعارىپ ۇيىمداسا كەتىپ، قارجىلاي كومەك كورسەتتى. ەجەلدەن ۇلكەنىن سىيلاعان، جىلاعانىن جۇباتقان، سۇرىنگەندى دەمەگەن قازاقپىز. اتادان بالاعا مۇرا بوپ كەلە جاتقان يگى ءداستۇردىڭ جەلىسىن ۇزبەي ونى بولاشاققا دا جالعاۋ ەلدىڭ مۇراتى، ەردىڭ ۇستانىمى.  قازاقتى وسى كۇنگە دەيىن قازاق ەتىپ كەلگەن، سان ءتۇرلى اپاتتاردان ساقتاپ، سۇرىنسە دە جىعىلتپاي الىپ كەلە جاتقان قۇداي سۇيەر قىلىعى – باۋىرمالدىعى، جومارتتىعى مەن دارقاندىعى بولسا كەرەك. كۇللى الەمدى سىناققا الىپ وتىرعان وسىناۋ قيىن كۇندەردە بۇل ءبىزدىڭ بىرلىگىمىزدىڭ سيمۆولى بولعانداي.

وسى ۇستانىمدى نىق ۇستانعان، اقىل توقتاتقان اعاسىنان جاس جىگىتىنە دەيىن ۇيىمداسا بىلگەن شوشاناي پەرزەنتتەرىنىڭ يگىلىكتى ىستەرىنە كوڭىلى تولعان قارتتارىمىز ازاماتتارىمىزعا اق باتاسىن بەرە كەلىپ «قاز تويعانىنا ەمەس، ورعانىنا سەمىرەدى. ءبىز سياقتى قارتتارعا كەيىنگىلەردىڭ ۇلكەن دەپ سالەم بەرۋى، ەلەپ-ەسكەرۋىنەن اسقان سىي-قۇرمەت بار ما؟ بۇگىنگى بالالارىمىزدىڭ وسىناۋ ءىسى ءبىزدى ەرەكشە قۋانىشقا بولەدى. دەمەك، ءبىز تەكتى ۇرپاق تاربيەلەپپىز. جاقسى اي، جاقسى كۇندە ىستەگەن قايىرىمدى ىستەرىڭە اللا رازى بولسىن! اۋىلىمىز ءۇشىن الداعى ۋاقىتتا دا اتقارماقشى بولىپ وتىرعان ىستەرىڭە قۇداي بەرەكە بەرسىن! ەندىگى ۇرپاق ءبىز كورگەن قيىندىقتى كورمەسىن! ەلىمىز امان، جۇرتىمىز – تىنىش بولسىن! ەندى قۇداي ونداي سۇمدىقتى كورسەتپەسىن!»، - دەگەن تىلەكتەرىن دە جەتكىزدى.

وت ىشىندە، ءورت ىشىندە كۇيگەندە،

باسىڭدى يمە، تىزە بۇكپە، يمەنبە!

ەر ەڭكەيسە ەڭكەيەدى تەك قانا،

تۋعان جەردىڭ توپىراعىن سۇيگەندە!، - دەپ قادىر مىرزا-ءالى اعامىز جىرلاعانداي اۋلىمىزدىڭ ازاماتتارى كوبى بۇگىن اۋىلىمىزدان شالعايدا سان ءتۇرلى قىزمەت اتقارىپ جۇرسە دە وسى ارەكەتتەرى ارقىلى تۋعان جەرلەرىنە تاعزىم جاسادى! الداعى ۋاقىتتا دا اۋىلدى قولداۋ ماقساتىندا كوپتەگەن يگى ىستەردى جوسپارلاپ وتىر.

اۋىلىم دەپ ىستىق ىقىلاستارىمەن كومەك كورسەتكەن، ادال ءسۇت ەمگەن ازاماتتارىمىزدىڭ بارىنە مىڭ العىس!

تورتەۋ تۇگەل بولسا توبەدەگى كەلەدى!

بىرلىگى بەكەم ەلدىڭ ىرگەسى ءبۇتىن! ونداي ەل قانداي قيىندىق بولسا دا جەڭىپ شىعادى! وتانىمىز امان بولسىن! اسپانىمىزدى بۇلت شالماسىن!

ءبىز بىرگەمىز!

ايگۇل مارۋانقىزى ۇزاقوۆا، شوشاناي ورتا مەكتەبى تاريح ءپانىنىڭ مۇعالىمى، الەۋمەتتىك پەداگوگ       

Abai.kz