بەيسەنبى, 28 ناۋرىز 2024
2564 2 پىكىر 26 مامىر, 2020 ساعات 17:19

الماتىدا ەكى پوليتسەيدىڭ قازاسىنا اكەلگەن اپات. كۇدىكتى بۇرىن پوليتسيادا جۇمىس ىستەگەن

الماتى پوليتسياسى قالاعا كىرەبەرىستەگى بلوكپوستتا پاترۋل كولىگىن سوققان جەڭىل اۆتوموبيل جۇرگىزۋشىسى بۇرىن پوليتسيادا جۇمىس ىستەگەنىن راستادى. كولىك اپاتىندا ەكى پوليتسيا قىزمەتكەرى كوز جۇمىپ، تاعى ءبىر پوليتسەي اۋرۋحانادا جاتىر.

الماتى پوليتسيا دەپارتامەنتىنىڭ باستىعى قانات تايمەردەنوۆتىڭ حابارلاۋىنشا، اۆتوكولىك يەسى بۇرىن قۇقىق قورعاۋ ورگاندارىندا قىزمەت ەتكەن، الايدا ول ءوز مىندەتىنە نەمقۇرايلىق تانىتقانى ءۇشىن جۇمىستان بوساتىلعان.

“ول پوليتسيادا التى جىل قىزمەت ەتتى، قىزمەتتىك مىندەتتەرىن تيىسىنشە ورىنداماعانى ءۇشىن ءتورت تارتىپتىك جازا الدى. بۇل ونىڭ ىشكى ىستەر ورگاندارىنان كەتۋىنە سەبەپ بولدى. بىراق ول ودان كەيىن دە ءوزى ءۇشىن دۇرىس قورىتىندى جاساي المادى. زاڭدى بۇزىپ، رولگە ماس كۇيىندە وتىرىپ، قىلمىس جاسادى”، - دەدى قانات تايمەردەنوۆ.

تايمەردەنوۆتىڭ سوزىنشە، كۇدىكتىگە قارسى "ادام ءولتىرۋ" بابى بويىنشا قىلمىستىق ءىس قوزعالعان.

وقيعا 25 مامىر كۇنى تاڭەرتەڭ الماتى وبلىسى قاراساي اۋدانى كوكساي ىقشاماۋدانىندا بولعان. پوليتسيانىڭ مالىمەتىنشە، 1992 جىلعى ازامات مىنگەن كولىك الدىمەن باقىلاۋ-وتكىزۋ بەكەتىنە سوعىسقان.

“ول الدىمەن بەتون قورشاۋعا بارىپ تيگەن، كەيىن ينەرتسيامەن پاترۋلدىك كولىككە سوعىلعان. كولىك ىشىندە بولعان ەكى پوليتسيا قىزمەتكەرىنىڭ ءبىرى 42 جاستاعى جالعاس جانعازيەۆ سول جەردە قايتىس بولدى”، - دەلىنگەن تاراتىلعان حابارلامادا.

ەكىنشى پوليتسەي - 26 جاستاعى داستان ابدىقانوۆ كەيىن اۋرۋحانادا قايتىس بولعان. پوليتسيا “كولىك جۇرگىزۋشىسى ماس بولعان” دەپ حابارلادى. كۇدىكتى قامالىپ، سوتقا دەيىنگى تەرگەۋ باستالدى.

ءباسپاسوز قىزمەتىنىڭ مالىمەتىنشە، قازا تاپقان ەكى پوليتسەيدىڭ دە ارتىندا بالا-شاعاسى قالدى.

كوروناۆيرۋس پاندەمياىنا بايلانىستى ەنگىزىلگەن كارانتين كەزىندە بلوكپوستتاردا پوليتسيا قىزمەتكەرىن كولىكپەن قاعىپ ءوتۋ وسىعان دەيىن بىرنەشە رەت بولعان. 30 ساۋىردە الماتى قالاسى مەدەۋ اۋدانىنداعى بلوكپوستتا كولىك جۇرگىزۋشىسى پوليتسيا قىزمەتكەرىن قاعىپ كەتكەن. ءدال وسىنداي جاعداي 13 مامىردا تۇركىستان وبلىسىنان شىمكەنتكە كىرەبەرىستە بولعان.

قازاقستان ۇكىمەتى ەلدىڭ ەكى ءىرى قالاسى – الماتى مەن نۇر-سۇلتاندى ناۋرىزدىڭ 19-نان كارانتينگە جاپقان. مامىردىڭ 11-ءى كۇنى توتەنشە جاعداي اياقتالدى، بىراق ەپيدەميولوگيالىق احۋالعا بايلانىستى كارانتين كۇشىندە قالىپ، بلوكپوستتار ءالى الىنعان جوق.

Abai.kz

2 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3512