«اق جول» پارتياسى ەۋرازيالىق ەكونوميكالىق وداقتاعى باسەكەلەستەرگە قازاقستاننىڭ مەملەكەتتىك ساتىپ الۋلارىنىڭ جابىق بولۋىن تالاپ ەتەدى. بۇگىن فراكتسيا دەپۋتاتى ەرلان بارلىباەۆ ءتيىستى دەپۋتاتتىق ساۋال جاسادى.  

قر پرەمەر-ءمينيسترى
ا.ۇ.مامينگە 

2015 جىلى «مەملەكەتتىك ساتىپ الۋ تۋرالى» قازاقستان رەسپۋبليكاسىنىڭ زاڭىنا ەاەو ەلدەرىنىڭ شەتەلدىك بيزنەسىنە قازاقستاندىق كاسىپكەرلەرمەن تەڭ نەگىزدە مەملەكەتتىك ساتىپ الۋعا قاتىسۋعا رۇقسات بەرەتىن ۇلتتىق رەجيم تۇجىرىمداماسى ەنگىزىلگەن بولاتىن. 

الايدا، كوروناۆيرۋستىق پاندەميا الەمدىك ەكونوميكاعا، ونىڭ ىشىندە ءبىزدىڭ ەلىمىزگە دە زاردابىن تيگىزۋدە. ۇكىمەت ەكونوميكالىق ءوسۋدى قالپىنا كەلتىرۋ ءۇشىن بىرقاتار شارالار قابىلداعانىنا قاراماستان، بۇگىندە وتاندىق بيزنەستى قولداۋ ەرەكشە ماڭىزدى بولىپ وتىر. قازىرگى تاڭدا قازاقستاندىق بيزنەس مەملەكەت تاراپىنان ەرەكشە نازار مەن قورعاۋدى قاجەت ەتەدى.

سول 2015 جىلى ۇكىمەتتىڭ ەرەكشە جاعدايلاردا ۇلتتىق رەجيمنەن ەكى جىلدان اسپايتىن مەرزىمگە تاركىلەۋ قۇقىعى بەكىتىلدى.

2018 جىلى اتالعان زاڭ «ەرەكشە جاعدايلار» مەن كونستيتۋتسيالىق قۇرىلىستىڭ نەگىزدەرىن قورعاۋ، ەلدىڭ قورعانىسى مەن مەملەكەت قاۋىپسىزدىگىن قامتاماسىز ەتۋ، ىشكى نارىقتى قورعاۋ، ۇلتتىق ەكونوميكانى دامىتۋ جانە وتاندىق تاۋار وندىرۋشىلەردى قولداۋ ماقساتىندا تاركىلەۋ جۇزەگە اسىرىلاتىندىعىن ناقتىلادى. 

«اق جول» دەموكراتيالىق پارتياسى ۇلتتىق بيزنەستىڭ پوزيتسياسىن بىلدىرە وتىرىپ، «ەرەكشە جاعداي» كەلدى دەپ مالىمدەيدى.

ءىس جۇزىندە مۇنى مەملەكەت باسشىسى ق.توقاەۆ توتەنشە جاعدايلار جونىندەگى مەملەكەتتىك كوميسسيانىڭ قورىتىندى وتىرىسىندا مەملەكەتتىك ساتىپ الۋلار مەن كۆازيمەملەكەتتىك سەكتوردى ساتىپ الۋدا ۇلتتىق مۇددەلەردىڭ باسىمدىلىعى قاجەتتىلىگى تۋرالى ايتقان كەزدە اتاپ ءوتتى.

ايتا كەتۋ كەرەك، مەملەكەتتىك ساتىپ الۋلار، كۆازيمەملەكەتتىك سەكتور مەن جەر قويناۋىن پايدالانۋشىلار نارىعى شامامەن 14 تريلليون تەڭگەنى قۇرايدى!

بۇل الىپ نارىق ۇلتتىق مۇددەگە قىزمەت ەتسە قازىرگى داعدارىس جاعدايىندا مىڭداعان وتاندىق كاسىپكەرلەر ءۇشىن وتە ءتيىمدى بولا الادى. 

ال، وتاندىق بيزنەستى قورعاۋ شارالارىن جۇزەگە اسىرۋدى كەيىنگە قالدىرۋ، كەرىسىنشە، قازاقستاندىق كاسىپورىنداردى قاجەتتى قولداۋسىز قالدىرادى. 

وسى نارىقتىڭ كوپ بولىگىن قۇرايتىن ءىرى شەتەلدىك جەر قويناۋىن پايدالانۋشىلارمەن كەلىسسوزدەر دە وسى جۇمىستىڭ ءبىر بولىگى بولۋى كەرەك. سونىمەن بىرگە شيكىزات سالاسىندا شاعىن جانە ورتا كاسىپكەرلىكتىڭ ۇلەسى رەسپۋبليكالىق دەڭگەيدەن ورتاشا ەسەپپەن 2 ەسە تومەن ەكەندىگىن كورسەتەدى. بۇل شەتەلدىك ينۆەستورلار قازاقستاننىڭ تابيعي رەسۋرستارىن پايدالانۋدان تۇسەتىن كىرىستى ينۆەتورلاردىڭ  ءبىزدىڭ ەلىمىزدە شىعارىلاتىن تاۋارلار مەن ماتەريالداردى شەتەلدە ساتىپ الۋعا جۇمسايتىنىن بىلدىرەدى. 

يندۋستريانى دامىتۋ قورىن قارجىلاندىرۋ ءۇشىن پرەزيدەنت ۇسىنعان سەرپىندى وندىرىستىك جوبالار ءدال وسى الەۋەتتى تاپسىرىس بەرۋشىلەرگە ارنالۋى كەرەك. ءبىزدىڭ ويىمىزشا، قازاقستاننىڭ تابيعي رەسۋرستارىن وندىرەتىن شيكىزات الپاۋىتتارى وسى قور جوبالارىنىڭ باستاپقى جانە ۇزاق مەرزىمدى تۇتىنۋشىلارى بولۋى كەرەك. 

وسىعان بايلانىستى «اق جول» دەپۋتاتتىق فراكتسياسى داعدارىستان كەيىنگى ەكونوميكالىق قالپىنا كەلتىرۋ ءۇشىن:

1) مەملەكەتتىك ساتىپ الۋدىڭ ۇلتتىق رەجيمىنەن شەتەلەدىك، سونىڭ ىشىندە ەاەو ەلدەرىنىڭ وندىرۋشىلەرىن شىعارۋ مۇمكىندىگىن قاراستىرۋ; 

2) كۆازيمەملەكەتتىك سەكتور سۋبەكتىلەرىن جانە ءىرى شەتەلدىك جەر قويناۋىن پايدالانۋشىلاردى وتاندىق ونىمدەرگە باسىمدىق بەرۋگە مىندەتتەۋ قاجەت دەپ سانايدى. 

قازىرگى جاعدايدا ەلدەردىڭ بارلىعى دەرلىك وسىنداي شەشىمدەر قابىلداعانىن اتاپ ءوتۋ قاجەت دەپ سانايمىز.

قازاقستان تاۋەلسىزدىكتىڭ وتىز جىلدىعى قارساڭىندا شەتەلدىك سەرىكتەستەردىڭ ۇلتتىق مۇددەمىزدىڭ قورعاۋىن تالاپ ەتۋگە قۇقىلى. 

قۇرمەتپەن،

«اق جول» فراكتسياسىنىڭ دەپۋتاتتارى

Abai.kz