قازاقتاندىق ينتەرنەت-فورۋمداردا تسەنزۋراعا قارسى نارازىلىق بىلدىرۋگە ۇندەگەن بەلگى وسىلاي بەينەلەنگەن. الماتى، مامىر، 2009 ج.

ەقىۇ قازاقستان پارلامەنتى سارسەنبى كۇنى قابىلداعان زاڭ جوباسى ەلدە ينتەرنەت ەركىندىگى مەن ءسوز بوستاندىعىن شەكتەيتىنىن ەسكەرتىپ، پرەزيدەنت نۇرسۇلتان نازارباەۆتى ول زاڭعا قول قويماۋعا شاقىردى. مۇنىڭ الدىندا جۋرناليستەردى قورعاۋ كوميتەتى دە وسىنداي ۇندەۋ جاساعان بولاتىن.
ەقىۇ-نىڭ اقپارات ەركىندىگى جونىندەگى وكىلى ميكلوش حاراستي قازاقستان پرەزيدەنتى نۇرسۇلتان نازارباەۆقا جولداعان حاتىندا ەل پارلامەنتىنىڭ سارسەنبى كۇنى ماقۇلداعان ينتەرنەتكە قاتىستى زاڭ جوباسىنا سىن ايتقان.
«سەنات ەنگىزگەن ازداعان وزگەرىستەرگە قاراماستان، بۇل زاڭ جالپى العاندا ينتەرنەت پەن اقپارات ەركىندىگىن شەكتەيدى. ول زاڭنىڭ كۇشىنە ەنۋى - قازاقستاننىڭ بۇقارالىق اقپارات قۇرالدارىن رەتتەۋدى دەموكراتيالاندىرۋ ىسىندەگى كەرى قادام بولۋى مۇمكىن» دەلىنگەن ميكلوش ءحاراستيدىڭ قازاقستان پرەزيدەنتىنە جازعان حاتىندا.
ميكلوش ءحاراستيدىڭ ايتۋىنشا، ەقىۇ-نىڭ ول باسقاراتىن كەڭسەسى كەزىندە وسى زاڭ جوباسى اقپارات ەركىندىگى مەن ءسوز بوستاندىعىنىڭ تالاپتارىنا قانشالىقتى سايكەس كەلەتىندىگىنە زاڭدىق تۇرعىدا ساراپتاما جۇرگىزىپ، قازاقستان بيلىگىنە قۇقىقتىق جاردەم كورسەتكەن. ول بويىنشا ازىرلەنگەن ۇسىنىستار قازاقستان بيلىگىنە بيىلعى اقپان ايىندا بەرىلىپ، ءساۋىر ايىندا استانادا تانىستىرىلعان.
ميكلوش حاراستي قازاقستان بۇل زاڭ جوباسىنىڭ ەقىۇ-نىڭ تالاپتارى مەن مىندەتتەمەلەرىنە قاراما-قايشى كەلەتىن تۇستارىنا پرەزيدەنت نازارباەۆتىڭ نازارىن اۋدارعان:
– بلوگتار، چاتتار، فورۋمدار جانە وزگە دە ينتەرنەت-رەسۋرستاردى ءداستۇرلى بۇقارالىق اقپارات قۇرالىنا تەڭەستىرۋ ينتەرنەتتى پايدالانۋ قۇقىعىن ەش نەگىزسىز شەكتەيدى.
– كەز-كەلگەن بۇقارالىق اقپارات قۇرالىنىڭ جۇمىسىن نەمەسە حابار تاراتۋىن توقتاتۋعا نەگىز بولاتىن سەبەپتەردىڭ تىزبەسى ۇلعايادى.
– قازاقستان ازاماتتارىنىڭ شەتەلدىك بۇقارالىق اقپارات قۇرالدارىنان نەمەسە كەز-كەلگەن شەتەلدىك ينتەرنەت-رەسۋرستان اقپارات الۋ ەركىندىگى شەكتەلەدى.
نۇرسۇلتان نازارباەۆقا جازعان حاتىنىڭ سوڭىندا ەقىۇ-نىڭ وكىلى ميكلوش حاراستي ەگەر قازاقستان پرەزيدەنتى وسى زاڭ جوباسىنا ۆەتو قويسا، وندا بۇل قازاقستاننىڭ، ەقىۇ-نا توراعالىق مىندەتىنە كىرىسەر الدىندا، وسى حالىقارالىق ۇيىمنىڭ ءباسپاسوز ەركىندىگىن قامتاماسىز ەتۋ جونىندە ءوز موينىنا العان مىندەتتەمەلەرىن تولىعىمەن قۇرمەتتەيتىندىگىنىڭ ايقىن بەلگىسى رەتىندە قابىلدانۋى مۇمكىن ەكەندىگىن جازادى.
مۇنىڭ الدىندا قازاقستان باسشىلىعىنا ءدال وسىنداي ۇندەۋدى شتاب-پاتەرى نيۋ-يوركتە ورنالاسقان جۋرناليستەردى قورعاۋ كوميتەتى بەيۇكىمەتتىك ۇيىمى دا جاساپ، پرەزيدەنت نۇرسۇلتان نازارباەۆتى ينتەرنەتتى باقىلايتىن زاڭ جوباسىنا ۆەتو قويۋعا شاقىرعان بولاتىن. اتالعان كوميتەتتىڭ ەۋروپا مەن ورتالىق ازيا بويىنشا باعدارلاماسىنىڭ ۇيلەستىرۋشىسى نينا وگنيانوۆا ماۋسىمنىڭ 24-ءى كۇنى ازاتتىق راديوسىنا بەرگەن سۇحباتىندا بىلاي دەگەن ەدى:
«قازاقستان پارلامەنتى ماۋسىمنىڭ 24-ىندە ماقۇلداعان بۇل زاڭ جوباسى ەندى بىرنەشە ايدان كەيىن ەۋروپاداعى قاۋىپسىزدىك جانە ىنتىماقتاستىق ۇيىمىنا توراعا بولاتىن مەملەكەت ءۇشىن ءساتسىز قادام بولىپ تابىلادى. ءبىز بۇنى قازاقستاننىڭ ادام قۇقىقتارى مەن ءباسپاسوز ەركىندىگى جاعدايىنا قاتىستى كەرى قادام بولادى دەپ سانايمىز. ءبىز پرەزيدەنت نۇرسۇلتان نازارباەۆتى اتالعان زاڭعا ۆەتو قويۋعا شاقىرامىز».
سارسەنبى كۇنى قازاقستان پارلامەنتىنىڭ ءماجىلىسى اقپاراتتىق-كوممۋنيكاتسيالىق جەلىلەر ماسەلەلەرى جونىندەگى زاڭناماعا سەنات ۇسىنعان وزگەرىستەرمەن كەلىسىپ، تۇپكىلىكتى قابىلداعان سوڭ زاڭ جوباسى قول قويۋ ءۇشىن ەل پرەزيدەنتىنە جىبەرىلدى.
زاڭناماعا ەنگىزىلگەلى وتىرعان بۇل وزگەرىستەر بويىنشا قازاقستانداعى بارلىق ينتەرنەت-رەسۋرستار ءداستۇرلى باق-قا تەڭەستىرىلەدى. سونداي-اق بۇل قۇجات زاڭناماعا سايكەس كەلمەيتىن قازاقستاندا تارالاتىن شەتەلدىك باق ونىمدەرىنە قاتىستى شاعىمدانۋشىنىڭ مەكەنى بويىنشا جانە جاۋاپكەردىڭ قاتىسۋىنسىز سوت ءوندىرىسىنىڭ بولۋ مۇمكىندىگىن دە قاراستىرادى.

«ازاتتىق» راديوسى 25 ماۋسىم 2009 جىل