ماۋسىمنىڭ 20-سى كۇنى الەمدە بوسقىندار كۇنى اتالىپ ءوتتى. بۇۇ-نىڭ بوسقىندار ءىسى بويىنشا جوعارعى كوميسسياسىنىڭ مالىمەتىنشە، قازىرگى تاڭدا الەمدە قۋعىن-سۇرگىنگە ۇشىراپ، ءوز وتانىنان كەتۋگە ءماجبۇر بولعان 42 ملن. بوسقىن بار.
ال قازاقستاندا حالىقارالىق كومەككە ءزارۋ ازاماتتار مەن بوسقىنداردىڭ سانى – 4800 ادام دەپ ايتىلادى.
الماتى قالاسى بويىنشا كوشى-قون دەپارتامەنتىنىڭ ديرەكتورى گۇلسارا التىنبەكوۆانىڭ مالىمەتىنشە، قازىرگى ۋاقىتتا ءبىر عانا الماتى قالاسىنىڭ وزىندە رەسمي تۇردە بوسقىن دەپ تانىلعان 510 شەتەل ازاماتى تۇرادى. بۇلار نەگىزىنەن اۋعانستان، سومالي، ەفيوپيانىڭ وكىلدەرى. باسقا شەتەلدىك ازاماتتارمەن سالىستىرعاندا، بوسقىن مارتەبەسى بار ادامداردان رەسپۋبليكا اۋماعىندا ەڭبەك ەتۋ ءۇشىن ارنايى رۇقسات تالاپ ەتىلمەيدى. سونداي-اق الماتىدا اتا-اناسى بوسقىن دەپ تانىلعاننان كەيىن دۇنيەگە كەلگەن 89 ءسابي بار.
قازاقستاندا بوسقىنداردىڭ ماسەلەسى ءالى كۇنگە دەيىن «كوشى-قون تۋرالى» زاڭعا سايكەس رەتتەلىپ كەلەدى. ارنايى مينيسترلىكتىڭ حابارلاۋىنشا، بوسقىندار تۋرالى زاڭ جوباسى وسى جىلدىڭ اياعىنا دەيىن قابىلدانۋى ءتيىس. بۇل زاڭنىڭ قابىلدانۋى ەلدەگى بوسقىنداردىڭ قۇقىقتىق مارتەبەسىن رەتتەۋگە جول اشپاق.
– قازىرگى تاڭدا بوسقىنداردىڭ بارلىعىنىڭ ءوز ەلىنە قايتۋ مۇمكىندىگى بار دەپ ايتا المايمىن. باسىم بولىگى ءۇشىن ءبىر عانا جول – قازاقستاندا قالۋ. بۇدان جەرگىلىكتى ينتەگراتسيا ماسەلەسى تۋىندايدى. سەبەبى، ازاماتتىعى جوق تۇلعاعا بەرىلەتىن كۋالىك ىقتيار حات، ازاماتتىق الۋ ماسەلەلەرى ءالى كۇنگە دەيىن شەشىمىن تاپپاي، سوزىلىپ كەلەدى. قۇقىقتىق جاعىنان بوگەتتەر كوپ. بوسقىنداردىڭ وزدەرى بۇل ماسەلەنى شەشە المايدى. بۇگىنگى تاڭدا ولار بىزدە ۋاقىتشا كەلگەن شەت ەل ازاماتتارى ەسەبىندە تۇرىپ جاتقاندىقتان، ولارعا قانداي دا ءبىر ارتىقشىلىقتار قولدانىستاعى زاڭدا قاراستىرىلماعان. ولار مۇندا قالىپ، ىقتيار حات، ازاماتتىق الا المايدى. ول ءۇشىن ەلشىلىككە ءوتىنىش بەرىپ، انىقتاما قاعاز الۋلارى كەرەك. اۋعانستان مەن وزبەكستان ازاماتتارىنان تولەم قابىلەتتىلىك تالاپ ەتىلەدى، ياعني زاڭ بويىنشا قازىرگى كەزدە ولاردىڭ بانكتەگى ەسەپشوتىندا كەمىندە 11 مىڭ اقش دوللارىنا تەڭ قاراجاتى بولۋى كەرەك. مۇنداي اقشا كەز كەلگەن ادامنىڭ قولىندا جوق. ال مۇنسىز ىقتيار حات پەن ازاماتتىق الۋ مۇمكىن ەمەس،– دەيدى الماتىداعى ادام قۇقىعىن قورعاۋ جانە زاڭدىلىقتاردىڭ ساقتالۋى جونىندەگى قازاقستاندىق بيۋرونىڭ زاڭگەرى دەنيس دجيۆا.

گۇلجانات شوناباي   
«قازاقستان زامان» گازەتى 25 ماۋسىم 2009 جىل