قورىققان – بويعا قۇت
الەم ەلدەرى بۇل كۇندە شىبىنداي جاننىڭ ەسەندىگى ءۇشىن بارىن سالىپ ارپالىسىپ جاتىر. قىتايدان باس العان «اتى جامان» ىندەتتىڭ الەمنىڭ ءار تۇرعىنىن ۇيقى-كۇلكىدەن ايىرىپ، الاڭداۋلى كۇيگە تۇسىرەر دەپ بەس-التى اي بۇرىن ەشكىم دە ويلاعان جوق. قازاق بالاسى «كوپپەن كورگەن ۇلى توي» دەگەندى كوبىندە جاقسىلىققا جوري ايتاتىن. وكىنىشكە قاراي كوپپەن بىرگە كورەر قيىنشىلىق ءبىزدىڭ دە ەلدىڭ باسىنا تۇسكەن سىن ساعاتتا ەل پرەزيدەنتى مەن ۇكىمەت مۇشەلەرىنىڭ ۇيقى-كۇلكى كورمەي جۇرتىمىزدىڭ باس اماندىعىنا جاساپ جاتقان قيمىل-ارەكەتتەرى جۇرەگىمىزدەگى ءۇمىت شوعىن ۇرلەي تۇسكەنىنە قۋاندىق!
ارينە، ەل باسشىلارى مەن قايراتكەر تۇلعالاردىڭ تىنىمسىز ارەكەتى مەن قوسا جالپىحالىقتىڭ ىنتىماققا ىمىرالاسىپ، جۇدىرىقتاي جۇمىلعانى قاجەت! اقپاراتتىق كەڭىستىكتىڭ تىم ەركىندىگى دە «قورىققانعا قوس كورىنەتىن» ۋاقىتتا حالىقتىڭ ۇرەيىن ۇشىرۋعا بەيىل-اق. ءتارتىپتىڭ تەمىردەي قاتتىلىققا كوشكەنىنە مويىنۇسىنىپ، بەرەكەنىڭ كەلەكەگە اينالماۋىن ءار قازاقستاندىق ازامات بىلۋگە جانە ساقتاۋعا ءتيىستى ەكەنىن، ءوز دەنساۋلىعىمەن قاتار ۇلت قاۋىپسىزدىگىنىڭ كەپىلى بولارىن بىلگەن ءجون. تاعدىردىڭ تالاي اششى ءدامىن تاتقان، باسىنان وتكەرگەن اتى جامان وبا مەن تىرىسقاقتى دا جەڭىپ، اشتىق پەن قاستىقتى دا كورگەن الاش بالاسى بۇل بۇلاعاي كۇندەردى دە ارتقا تاستايتىنىنا كوڭىل سەنەر.
تۇڭعىش پرەزيدەنت – ەلباسى دا ەل-جۇرتتى بەرەكەگە شاقىرىپ، ۇلتىم دەيتىن ازاماتتارعا تاستاپ جاتقان جاۋاپتى دا ساۋاپتى ۇندەۋى – كوشەلى ۇلت كوسەمىنىڭ كورگەندى دە كورەگەن ساياساتكەرلىگى! وسى رەتتە ءبىر ادامنىڭ جاۋاپكەرشىلىگىن اتام قازاق «جالعىز قۋراي – جەل جارار» دەپ بەينەلەپ ايتقان ەكەن. مامىراجاي كۇندە ماي كەكىرىپ وتىرىپ تويلار توي-تومالاقتى دا دوعارا تۇرۋعا سابىر-شىدامىمىز جەتەتىن ەل ەمەس پە ەدىك؟! كارانتين رەجيمىن ءسال بوساڭسىتقانعا جاپاتارماعاي اشىق-شاشىقتىققا كوشۋگە ءالى ەرتە ەكەنىن ەسكەرتكەن ەل ۇكىمەتىنىڭ ءسوزىن قۇلاققا نەگە ىلمەيمىز؟! «قورىققانعا قوس كورىنەتىن» ۋاقىتتا بازبىرەۋلەردىڭ «كورشىنىڭ ورتەنگەن شوبىنە باس، سيراق ءۇيتىپ» العىسى كەلەتىن پاسىق پيعىلىنا ەرە كەتۋگە جول بەرمەسەك ەكەن.
الاڭعا شىعىپ، اتتان سالىپ ايعايلاعاننان ۇلتتىڭ تۇگەندەلەر ۇپايىن كورىپ تۇرعان جوقپىن. قىسىلتاياڭ شاقتا قۇلاق سارسىتار قاڭقۋ سوزگە ەرە كەتۋ – وركەنيەتتى قوعام وكىلىنىڭ تىرلىگى ەمەس ەكەنىن تۇسىنەر ورەمىز قايدا؟! «ەل ءبۇلىنىپ، ەرتىس بۇزىلعان جوق»! ءمان-ماعىناسىز «بەيبىت شەرۋلەتىپ»، ءدال وسى تۇستا ايعايعا سۇرەن قوسىپ، ايتاققا ۇرە جونەلەردەي ەش نەگىز جوق سەكىلدى. سول «الاڭ اڭساعان» اعايىنداردىڭ مىنا پاندەميالىق جاعدايدا جالپى كوپتىڭ دەنساۋلىعىنا كەپىلدىك بەرە المايتىنى بەس ەنەدەن بەلگىلى. تىم بولماعاندا اتىڭ وشكىر ىندەتتىڭ اۋىزدىقتالۋىنا ارقايسىمىزدىڭ جاۋاپكەرشىلىكپەن قاراۋعا سانا-سەزىمىمىز جەتپەسە سول، ەلدىگىمىزگە ۇلكەن سىن!
ءتىپتى، الەمدى ابىگەرگە تۇسىرگەن جۇقپالى دەرتكە قوعام اراسىندا ءالى كۇنگە سەنبەيتىندەردىڭ قاراسى كوبەيگەنى جانىڭدى قىنجىلتاتىنى راس. دۇنيە ءجۇزىن الاڭداتقان، شارۋاسىن شاتقاياقتاتقان پاندەميادان ساياسي استار ىزدەۋدىڭ كوكىرەك كوزى اشىق قازاق بالاسىنا ۇياتتىلاۋ دا تىرلىك ەكەنى جانىڭدى اۋىرتادى. مەملەكەتتىك شەكاراڭ شەگەندەلىپ، كوك اسپاندا قىران قاناتتى بايراعىڭ جەلبىرەپ تۇرعاندا قارا اسپاندى ءتوندىرۋ، جاڭبىر جاۋماي سۋ بولۋ – قانشالىقتى اقىلعا سىيىمدى؟!
كەيدە «ات شاپقانعا يت شاپقان» تىرلىكتى دوعارا الماي قالاتىن ەلمىز بە دەيمىن. ىنتىماقتى ىدىراماي تۇرىپ ويلاعان اتا-بابا ۇرپاعى ەمەس پە ەدىك، ساماۋرىن تاسىعانىن سامارقاندى سۋ الدى دەپ ەستيتىن ەنجار قۇلاقتىق ءدال ءبىزدىڭ ۇلت وكىلدەرىنە جاراسپاس؟! «قورىققان بويعا قۇت» دەگەن اتام قازاق! بەرەكەنىڭ بۇزىلۋىنان قورقايىق، جامان ىندەتتىڭ ەل ىشىنە كەڭ جايىلۋىنان قورقايىق! ەل پرەزيدەنتى قاسىم-جومارت كەمەلۇلى سالقىنقاندى ساياساتكەر رەتىندە الىس-جاقىن ەلدەردىڭ پاندەميالىق اپاتپەن كۇرەسۋدىڭ وزىق تاجىريبەلەرىنە سۇيەنە وتىرىپ، ەلدەگى جاعدايدى بارىنشا حالقىمىزعا ءتيىمدى جاقتا قاراستىرىپ، ءتيىستى تاپسىرمالار مەن شەكتەۋلەردى قولعا العانى كوكەيگە قونىمدى ءىس بولدى. ەندى وسى ناقتى شارالاردىڭ وڭ ناتيجەلەرىن كورۋىمىز ءۇشىن جۇدىرىقتاي جۇمىلعانىمىز ابزال بولار.
سانالى حالىق وكىلى رەتىندە ءار وتانداستىڭ ازاماتتىعى مەن ارى سىنعا تۇسكەن شاقتا تاعى دا «مالىڭ مەنەن جانىڭدى ساداعا دەپ، اردىڭ تۋىن كوتەرگەن» الاش بالاسىنىڭ بەرەكەگە ۇيىپ، تارتىپكە باعىنىپ، كەساپاتتىڭ قاقپان ءتىلىن باسپايتىندىعىنا سەنىپ، جاماندىقتى اماندىق جەڭەتىنىن جارقىن كۇندەرگە بىرگە جەتەيىك، تۇندەرىڭىز تىنىش، كۇندەرىڭىز مامىراجاي بولسىن، الاش بالاسى!
داۋلەتكەرەي كاپۇلى
قر ەڭبەك سىڭىرگەن قايراتكەرى
Abai.kz
