پرەزيدەنت قاسىم-جومارت توقاەۆ كوروناۆيرۋس پاندەمياسىنىڭ ءالى دە قاۋىپتى ەكەنىن ەسكە سالدى. ونىڭ ايتۋىنشا، قازاقستاندىقتار توتەنشە جاعداي رەجيمى الىنعاننان كەيىن ۆيرۋسقا سالعىرت قاراي باستاعان.

«بۇگىندە بۇكىل الەمدە كوروناۆيرۋستىڭ تارالۋى قورقىنىشتى اۋقىمعا يە بولىپ كەلەدى. كوروناۆيرۋس شابۋىلىنا ۇشىراعان جالعىز ەل ءبىز ەمەسپىز. توتەنشە جاعداي رەجيمى الىنىپ تاستالعاننان كەيىن ءبىز ەركىنسىپ كەتتىك، ونى مويىنداۋ قاجەت. كەيبىر ازاماتتار مەن مەملەكەتتىك قىزمەتشىلەر «قاۋىپتى كەزەڭ ارتتا قالدى، ءوتىپ كەتتى» دەپ ويلادى. تاۋەكەلدى دۇرىس باعالاماۋ ورىن الىپ، مەديتسينالىق ەرەجەلەر مەن ۇيعارىمداردى ساقتاۋدى قويدىق. جەكەلەگەن ازاماتتار مۇنداي اۋرۋ جوق دەگەن وسەك-اياڭعا سەنە باستادى. بىراق، COVID-19 ءالى دە بولسا ۇلكەن قاتەر ءتوندىرىپ تۇر. سوندىقتان ۇكىمەت كارانتين شارالارىن قايتا كۇشەيتتى»، - دەدى مەملەكەت باسشىسى.

دەگەنمەن، قازاقستان پرەزيدەنتى كوڭىل-كۇيدى ءتۇسىرىپ، كۇيزەلىسكە بوي الدىرۋدىڭ ەش قاجەتتى جوق ەكەندىگىن، تولىق قاندى ءومىر ءسۇرۋدى جالعاستىرا بەرۋىمىز كەرەكتىگىن باسا ايتتى.

«بۇكىل الەمدە ادامدار كارانتين كەزىندە وتباسىمەن جاقىنداسا تۇسكەندىكتەرى، بالالارىنا، ولاردىڭ پروبلەمالارى مەن الاڭداۋشىلىقتارىنا كوپ كوڭىل بولە باستاعاندىقتارى تۋرالى وقيعالارىمەن بولىسۋدە. سۋرەتشىلەر، مۋزىكانتتار، جازۋشىلار، اقىندار كارانتين ۋاقىتىندا شىعارماشىلىقپەن ءونىمدى جۇمىس ىستەگەندىكتەرىن ايتۋدا», - دەدى قاسىم-جومارت توقاەۆ.

مەملەكەت باسشىسى ەڭ جامان جاعدايدا دا ءتيىمدى دۇنيە تابۋعا بولاتىندىعىن اتاپ ءوتتى.

«ءاربىر داعدارىستا جاڭا مۇمكىندىكتەر بولادى. ءبىز بىرگەمىز. ءبىز بىرگە مىندەتتى تۇردە بۇل داعدارىستى دا ەڭسەرەمىز. ودان كۇشتى رۋحمەن، دۇنيەتانىم ماسەلەلەرىنە جاڭاكوزقاراسپەن شىعامىز. ەڭ باستىسى وسىناۋ كۇردەلى سىناقتى ەڭسەرەتىندىگىمىزگە، جەڭەتىندىگىمىزگە سەنىم بولۋى كەرەك»، - دەدى قاسىم-جومارت توقاەۆ.

Abai.kz