الەكسەي ۆلاديميروۆيچ تسوي. قازاقستاننىڭ دەنساۋلىق ساقتاۋ ءمينيسترى. بۇگىن تاعايىندادى.

اۋەلى ونىڭ كانديداتۋراسىن ءماجىلىس, ءماجىلىستىڭ الەۋمەتتىك-مادەني دامۋ كوميتەتى ماقۇلدادى.

«ءماجىلىستىڭ الەۋمەتتىك-مادەني دامۋ كوميتەتىندە الەكسەي تسويدىڭ قر دەنساۋلىق ساقتاۋ ءمينيسترى قىزمەتىنە ۇسىنىلعان كانديداتۋراسى كەلىسىلدى. اتالعان ماسەلە «قر پارلامەنتى جانە ونىڭ دەپۋتاتتارىنىڭ ستاتۋسى تۋرالى» كونستيتۋتسيالىق زاڭىنىڭ 22-1 بابىنا سايكەس قارالدى»، - دەلىنگەن ءماجىلىس حابارلاماسىندا.

كەيىن تسويدىڭ مينيستر قىزمەتىنە تاعايىندالعانى تۋرالى اقپاراتتى اقوردا جاريالادى.

«الەكسەي ۆلاديميروۆيچ تسوي قازاقستان رەسپۋبليكاسىنىڭ دەنساۋلىق ساقتاۋ ءمينيسترى بولىپ تاعايىندالسىن»، - دەپ جازىلىپتى پرەزيدەنت جارلىعىندا.

22 ماۋسىمدا ءدال وسى الەكسەي تسوي قر دەنساۋلىق ساقتاۋ ءمينيسترىنىڭ ءبىرىنشى ورىنباسارى بولىپ تاعايىندالعان.

پرەمەر-مينيستر اسقار مامين دسم ۇجىمىنا تسويدى تانىستىرىپ، ىندەت جۇقتىرىپ، وقشاۋلانىپ جاتقان مينيستر ءبىرتانوۆتىڭ مىندەتىن ۋاقىتشا اتقارادى دەپ كەتكەن.

تسويدىڭ سالەم حاتى

باس-اياعى ءۇش كۇندە مينيستر مىندەتىن اتقاۋشى تسويدىڭ ءوزى  مينيستر بولىپ تاعايىندالدى. تسوي جاڭا قىزمەتكە كىرىسەر-كىرىسپەستەن بۇرىنعى مينيستر بىرتانوۆقا ارناپ جازبا جاريالاپتى جەلىدە.

«قۇرمەتتى ەلجان امانتايۇلى! ەل ءۇشىن ەڭ قيىن وسى ساتتە ءسىز كوروناۆيرۋسپەن كۇرەستىڭ الدىڭعى شەبىندە تۇردىڭىز. ءسىزدىڭ وڭىرلەردەگى، ىندەت وشاقتارىنداعى ەل-جۇرتپەن جانە ماماندارمەن جۇرگىزگەن جۇمىسىڭىز دەنساۋلىق ساقتاۋ جۇيەسىن ايتارلىقتاي ىلگەرىلەتتى. وكىنىشكە وراي، ىندەت ەشكىمدى ايامايدى. سىزگە شىن كوڭىلمەن تەزىرەك ساۋىعىپ، قاتارىمىزعا قوسىلۋىڭىزدى تىلەيمىن»، - دەپ جازدى ول.

تسويدىڭ ەڭبەك جولى مەن ءبىلىمى تۋرالى

الەكسەي تسوي 1977 جىلى بۇرىنعى وڭتۇستىك قازاقستان وبلىسىندا تۋعان ەكەن. لوندوندا ءبىلىم العان (Sells College). مەملەكەتتىك مەديتسينالىق اكادەميادا، وقو مەمەلەكەتتىك مەديتسينالىق اكادەمياسىندا، «دانەكەر» حالىقارالىق قۇقىق جانە بيزنەس ينستيتۋتىندا، رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىندا، ءبىلىم العان.

اقش-تا، سيناپۋردا، ماسكەۋدە، گەرمانيادا، ۇلىبريتانيادا تاجىربيەدەن وتكەن. ىسكەرلىك اكىمشىلىك دوكتورى، مەديتسينا عىلىمىنىڭ كانديداتى.

حيرۋرگ-ەندوسكوپيست. قالپىنا كەلتىرۋ حيرۋرگياسى جانە ترانسپلانتولوگيا ورتالىعىنىڭ اعا عىلىمي قىزمەتكەرى، ۇلتتىق عىلىمي مەديتسينا ورتالىعىنىڭ ىشكى مەديتسينا ورتالىعىنىڭ جەتەكشى عىلىمي قىزمەتكەرى، «ەۋروازياتتىق رەسپيراتورلىق قوعام» قوعامدىق بىرلەستىگىنىڭ باس حاتشىسى، قر پرەزيدەنتى ءىس باسقارماسىنىڭ زاماناۋي مەديتسينالىق تەحنولوگيالاردى ەنگىزۋ ورتالىعىنىڭ ديرەكتورى، قر پرەزيدەنتى ءىس باسقارماسىنىڭ مەديتسينالىق ورتالىعىنىڭ باسشىسى، استانا قالاسىنىڭ №1 قالالىق اۋرۋحاناسىنىڭ باس دارىگەرى، قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى، قر دەنساۋلىق ساقتاۋ ۆيتسە-ءمينيسترى قىزمەتتەرىن اتقارعان.

2019 جىلعى اقپاننان باستاپ 2020 جىلدىڭ 22 ماۋسىمىنا دەيىن قر پرەزيدەنتى ءىس باسقارماسىنىڭ مەديتسينالىق ورتالىعىن باسقارعان.

ءۇش كۇن بۇرىن ءبىرىنشى ۆيتسە-مينيستر، بۇگىن مينيستر بولدى.

ايتپاقشى، ءوز وتستاۆكاسى تۋرالى ەلجان ءبىرتانوۆ تا جازبا جاريالاعان. وندا قىزمەتىنەن ءوز ەركىمەن كەتكەنىن، ىندەتىنەن تولىق ايىقپاعانىن، قوسىمشا ەم قابىلدايتىنىن ايتقان.

«قۇرمەتتى ارىپتەستەر، دوستار! بۇگىن مەن ءوز ەركىممەن قىزمەتىمنەن كەتۋ تۋرالى مەملەكەت باسشىسىنا ءوتىنىش جازدىم. وكىنىشكە وراي، مەن كوروناۆيرۋسپەن اۋىرىپ قالعاندىقتان جانە پنەۆمونيانىڭ اسقىنۋىنا بايلانىستى قوسىمشا ەم قابىلداۋىم كەرەك.

ەلدە ەپيدەميولوگيالىق جاعداي اسقىنىپ تۇرعان قازىرگىدەي كەزدە، بۇل سالاعا مينيسترلىك دەڭگەيىندە دە، وڭىرلىك دەنساۋلىق ساقتاۋ باسقارمالارى دەڭگەيىندە دە تولىق كۇشپەن جۇمىس ىستەيتىن باسشى كەرەك دەپ ەسەپتەيمىن.

ءبىزدىڭ دەنساۋلىق ساقتاۋ جۇيەسى بۇل تىعىرىقتان شىعادى دەپ سەنەمىن. ارقايسىمىزدىڭ ۋاقىتىمىز بەن قاجىر-قايراتىمىز كەرەك. بارلىق ارىپتەستەرىمە مىقتى دەنساۋلىق پەن سابىر تىلەيمىن. قازاقستاننىڭ دەنساۋلىق ساقتاۋ سالاسىن دامىتۋ ىسىنە از دا بولسا ۇلەسىمدى قوسۋعا مۇمكىندىك بەرگەن مەملەكەت باسشىسىنا العىس ايتامىن»، - دەپ جازدى ءبىرتانوۆ.

ەستەرىڭىزگە سالا كەتەيىك، 14 ماۋسىم كۇنى ەلجان ءبىرتانوۆ ءوزىنىڭ كوروناۆيرۋس جۇقتىرعانىن حابارلاعان.

Abai.kz