سەنبى, 8 تامىز 2020
COVID-19 قازاقستاندا. جۇقتىرعاندار — 96922. جازىلعاندار — 70680. قايتىس بولعاندار — 1058
قوعام 3332 4 پىكىر 2 شىلدە, 2020 ساعات 13:27

التاي كولگىنوۆ ەكى وتتىڭ ورتاسىندا قالدى ما؟

بۇعان دەيىن نۇر-سۇلتان قالاسىنىڭ اكىمدىگى «استانا كۇنىن» دابىرالى ءتۇرد وتكىزگىسى كەلەتىنى جايلى اقپارات تارادى. كوپشىلىك بۇل اقپاراتتاردى ويدان قۇراستىرعان جوق، اكىمدىكتىڭ توي تويلاۋ جوسپارى بولعانى شىندىق.

ماسەلەن قالالىق اكىمدىكتىڭ رەسمي سايتىندا كۇنى كەشە نۇر-سۇلتاندا اشىق اسپان استىندا كينو كورسەتىلىمى وتەتىنى حابارلانعان. بۇدان بولەك الەۋمەتتىك جەلىگە استانا كۇنىنە وراي ۇيىمداستىرىلاتىن مادەني ءىس شارالاردىڭ ءتىزىمى دە جاريالاندى. بۇل ءتىزىم ءىس-شارالار وتەدى دەپ جوسپارلانعان Nomad city hall-دىڭ ينستاگرام پاراقشاسىندا جاريالانعان. بىراق بۇل حابارلاما كەيىن رەسمي پاراقشادان جويىلعان كورىنەدى.

قازىر ەلىمىز اۋماعىندا كوروناۆيرۋستىڭ ءورشىپ تۇرعانى بەلگىلى. اتالعان ىندەتپەن اۋىرعانداردىڭ سانى 41 مىڭنان اسىپ كەتتى. 188 ادام قايتىس بولدى. مەملەكەت باسشىسىنىڭ تاپسىرماسىمەن ەل ۇكىمەتى تاعى دا كارانتيندىك شارالار ەنگىزدى. وسىنداي قيىن كەزەڭدە قالا كۇنىن تويلاۋ نە ءۇشىن كەرەك بولدى؟

بۇل جالپى حالىقتىڭ سۇراعى جانە قارسىلىعى بولاتىن. ەلوردا اكىمى التاي كولگىنوۆتىڭ اتىنا ايتىلعان نارازىلىق پىكىر از بولعان جوق. ءبارىنىڭ ايتارى: ىندەت ءورشىپ تۇرعان ساتتە كوپ حالىقتى ءبىر جەرگە جيناۋدىڭ ءجونى جوق، قارجىنى قالا كۇنىن تويلاۋعا ەمەس، ءدارى-دارمەككە جۇمساۋ كەرەك.

حالىقتىڭ نارازىلى جاۋاپسىز قالعان جوق. 1 شىلدە كەشقۇرىم ەلوردا اكىمدىگىنىڭ رەسمي سايتى ءىس-شارالاردىڭ ونلاين رەجيمدە وتەتىنىن مالىمدەدى.

- ەپيدەميولوگيالىق احۋالعا بايلانىستى بۇعان دەيىن ەلوردا كۇنىنە جوسپارلانعان بارلىق ءىس-شارالار توقتاتىلدى. شارالار تەك ونلاين رەجيمدە وتەدى. بۇل تۋرالى قالالىق مادەنيەت باسقارماسى حابارلادى. مىسالى «دومبىرا كۇنى» شاراسىن تۇرعىندار قازاقستان تەلەارناسىنان ونلاين رەجيمدە تاماشالاي الادى. ءىس-شارالاردىڭ كوپشىلىگى الەۋمەتتىك سيپاتتا بولادى – ەرەكشە قاجەتتىلىكتەرى بار بالالارعا ارنالعان رەابيليتاتسيالىق ورتالىق، جۇمىسسىز ايەلدەرگە شوب نەگىزدەرىن ۇيرەتەتىن «كاسىپكەر انا» الەۋمەتتىك ورتالىعى، جاعالاۋ اۋدانىندا جەدەل جاردەم ستانساسى مەن «دوكتور ۋ دوما» مەديتسينا ورتالىعى جانە باسقا دا الەۋمەتتىك نىسانداردىڭ اشىلۋى بولادى. شارالارعا قاتىساتىن ادامدار سانى شەكتەلگەن. سونىمەن قاتار ءۇي كەزەگىندەگىلەر مەن ۇلەسكەرلەرگە پاتەر كىلتتەرى تاپسىرىلادى – قاتىسۋشىلار سانى شەكتەۋلى جانە سانيتارلىق نورمالار قاتاڭ ساقتالادى: ماسكا تاعىپ، الەۋمەتتىك قاشىقتىق ساقتاۋ كەرەك، - دەپ جازدى اكىمدىكتىڭ ءباسپاسوز قىزمەتى.

ەندى قالا كۇنىن تويلاۋ ءۇشىن حالىق ءبىر الاڭعا جينالمايدى. بىراق «اتتان تۇسسە دە، ۇزەڭگىدەن تۇسكىسى كەلمەگەن» قالا بيلىگى توي تويلاۋ ويىنان قايتپاعان سەكىلدى. بەلگىلەنگەن ءىس-شارالاردى حالقتى جيناپ دابىرالى وتكىزە الماساق تا، ونلاين رەجيمدە مەرەكەلەيمىز دەپ بەلسەنىپ وتىر.

استانا كۇنى 2006 جىلدىڭ 6 شىلدەسىنەن بەرى تويلانىپ كەلەدى. «مەملەكەتتىك مەيرام» ستاتۋسى بەرىلگەن. ءداستۇرلى تۇردە 14 جىل بويى ءوتىپ ءجۇر (وعان دەيىن قالا كۇنى 1998 جىلى جاڭا ەلوردانىڭ تۇساۋكەسەرى وتكەن 6 ماۋسىمدا تويلاناتىن). دەمەك قازاق بيلىگى ءۇشىن «ەلوردا كۇنى» اتاپ وتپەسە بولمايتىن اسا ماڭىزدى مەرەكەلەر قاتارىندا دەگەن ءسوز.

وسىعان قاراپ التاي كولگىنوۆ مىرزا ەكى وتتىڭ ورتاسىندا قالدى ما دەگەن وي تۋىندايدى. ءبىر جاعىنان ون نەشە جىل بويى قالىپتاسقان ءداستۇردى جالعاستىرعىسى كەلەدى، ەكىنشى جاعىنان ىندەت ءورشىپ تۇرعاندا توي تويلاۋ دا وڭاي ەمەس. حالىقتىڭ قارسىلىعى دا كولگىنوۆ مىرزانىڭ ارقاسىنا ايازداي باتارى ءسوزسىز.

قالا بيلىگى «وگىزدى دە ولتىرمەي، اربانى دا سىندىرماي» ەكى وتتىڭ ورتاسىنان امان شىعۋدىڭ جالعىز جولى ونلاين تويلاۋ دەپ شەشكەن سەكىلدى. بيىلعى «ەلوردا كۇنى» ونلاين وتەدى. باستىسى اتاۋسىز قالمايدى. بىراق بۇرىنعىداي شەتەلدەن ءارتىس-ءانشى شاقىرىپ دابىرالى تويلاي المايدى...

قۋانىش قاپپاس

Abai.kz

4 پىكىر