ەڭبەك رەسۋرستارىن دامىتۋ ورتالىعى (WDC) COVID-19 كەزىندە الماتى، نۇر-سۇلتان جانە سولتۇستىك وڭىرلەردە جۇمىس بەرۋشىلەر بىلىكتى جۇمىسشىلاردىڭ جەتىسپەۋشىلىگىن باستان وتكەرۋدە، ال باتىس جانە وڭتۇستىك وڭىرلەردە سۇرانىستان ءوتىنىش باسىمدىعىن اتاپ ءوتتى.

ونداعى دەرەكتەرگە سۇيەنسەك، الماتىدا – 22,5 مىڭ، نۇر-سۇلتاندا – 16 مىڭ، قاراعاندى مەن قوستاناي وبلىستارىندا 17,4 مىڭ جانە 16,6 مىڭ بوس جۇمىس ورىندارى بولسا، كەرىسىنشە ەلىمىزدىڭ وڭتۇستىگىندە جاعداي مۇلدەم وزگەشە.

اتاپ ايتساق، تۇركىستان وبلسىندا 100 بوس ورىنعا – 164 تۇيىندەمە، جامبىلدا – 139 تۇيىندەمە، قىزىلوردادا – 126 تۇيىندەمەدەن كەلەدى. ەلىمىزدىڭ باتىسىنداعى اتىراۋ مەن ماڭعىستاۋدا دا تاپ وسىنداي جاعدايلار كورىنىس الۋدا.

بۇل ورايدا جاستاردى جۇمىسپەن قامتۋدا ەل بيلىگىنىڭ ەسكەرۋگە ءتيىس دۇنيەسى شيكىزاتتىق ەكسپورتتى بىرتە-بىرتە جارتىلاي شيكىزاتپەن الماستىرۋعا باعدار ۇستانۋى دەر ەدىك.

قازىر ءبىزدىڭ مەملەكەت COVID-19 كەزىندە جاڭا ەكسپورتتىق كەڭىستىكتەردى يگەرە باستادى. سونىڭ ءبىرى – ءۇندىستان. 2019 جىلدىڭ قاڭتار-مامىر ايلارىمان سالىستىرعاندا اتالعان ەلمەن ساۋدا-ساتىق 3 ەسەگە ءوسىپ، ەكسپورت – 1,4 ملرد دوللارعا، ال، يمپورت – 159,7 ملن دوللارعا جەتىپتى.

ەسكەرەتىن جايت ءبىز بيىل ۇندىلەرگە وڭدەلمەگەن كۇمىستى 18,2 ملن دوللارعا ساتساق، ەسەسىنە ولاردان 39,8 ملن دوللارعا كەرەميكالىق كىرپىش ساتىپ العانبىز.

ەلىمىزدىڭ اتالعان ەلگە وڭدەلمەگەن كۇمىستى ساتۋى – بىلتىرعى جىلعا قاراعاندا 39,8% كەمىگەندىگى بايقالادى. كۇمىستى وڭدەۋ مەن كەرەميكالىق كىرپىش جاساۋدى جولعا قويۋ ءبىراز جۇمىس ورىندارىنىڭ اشىلۋىنا مۇمكىندىك بەرەر ەدى. ءارى وسى سالالارعا مۇددەلى ءۇندى بيزنەسمەندەرىن ينۆەستور رەتىندە تارتۋ مۇمكىندىگىن قاراستىرۋ وبلىس اكىمشىلىكتەرىنىڭ نازار اۋدارار سالالارىنىڭ ءبىرى.

شيكىزاتتىق ەكسپورتتى بىرتە-بىرتە جارتىلاي شيكىزاتپەن الماستىرۋعا كوشۋ وعان ساي مامان دايىنداۋدان باستاۋ الادى. وعان وتاندىق ىسكەرلەرىمىز بەن جۇمىسسىز جاستارىمىز ءتاستۇيىن دايىن، ال قازاق بيلىگى شە؟

ءابىل-سەرىك الىاكبار

Abai.kz