بەيسەنبى, 28 ناۋرىز 2024
دات 4964 19 پىكىر 14 شىلدە, 2020 ساعات 13:50

زاڭ شىعارۋ ىسىنە پرەزيدەنت اكىمشىلىگى ارالاسپاعانى ءجون!

قر پرەزيدەنتى اكىمشىلىگىنىڭ باسشىسى

ە.ج.قوشانوۆتىڭ نازارىنا!

پرەزيدەنت قاسىم-جومارت توقاەۆتىڭ كارانتين رەجيمى مەرزىمىن تاعى ەكى اپتاعا سوزۋ تۋرالى شەشىمىن 100% قولدايمىن.

ءبىرىنشى, اۋىرعاندار سانىنىڭ ارتىپ، ءولىم-ءجىتىمنىڭ كوبەيىپ بارا جاتقانى، اپاتتىڭ باقىلاۋدان شىعىپ كەتە جازداعانى جاسىرىن ەمەس. وعان مەملەكەت باسشىسىنىڭ دەر كەزىندە شارا قابىلداپ، مەملەكەتتىك كوميسسيا قۇرعانىنا ەشكىم داۋ ايتا الماسا كەرەك.

بىراق، قاسىم-جومارت كەمەلۇلى سول جاۋاپتى تۇلعالارعا ءسال سەنىپ قالدى. ولار ول سەنىم مەن تاپسىرمانى ءوز دەڭگەيىندە اتقارعان جوق. مىنە، جاعداي ۋشىعىپ ەدى، پرەزيدەنت اتقا ءمىنىپ، قوس تىزگىندى شالقايا تارتىپ، جاۋاپتى ءمينيستردى اۋىستىرىپ، اكىمدەرگە سوگىس جاريالادى. ءسويتىپ، پاندەميامەن كۇرەستىڭ تامىرىنا قايتا قان جۇگىرە باستادى. كارانتين مەرزىمىن تامىزدىڭ باسىنا دەيىن ۇزارتۋ تۋرالى شىعارىلىپ وتىرعان مىنا شەشىم سونىڭ پىسىقتاماسى.

ەكىنشى، قاجەتتى ءدارى-دارمەكتىڭ باعاسى تۋرالى. ءدارى-دارمەكتىڭ جەتىسپەي جاتقانى شىن. ويتكەنى، ءدارى-دارمەك سالاسىن باسقارۋدىڭ مەحانيزمى دۇرىس جاسالماعانى بەلگىلى بولىپ قالدى.

سەناتور مۇرات باقتيارۇلىنىڭ Facebook-تاعى جەكە پاراقشاسىنداعى جازباسىنا قاراعاندا، اتالعان سالاعا قاتىستى نورماتيۆتىك قۇجاتقا (الدە زاڭعا) دەپۋتاتتار كەزىندە قارسى بولعان كورىنەدى. بىراق، ول قارسىلىقتان ناتيجە شىقپاعان. مىنە، سول شيكى زاڭنىڭ كەسىرىنەن حالقىمىزدى قىرىپ الا جازداپ وتىرمىز،

قۇرمەتتى ەرلان جاقانۇلى!

وسى جەردە تاعى ءبىر كۇدىگىم بار. ءماجىلىس پەن مينيسترلىكتەر جىبەرگەن سول زاڭ ءسىزدىڭ الدىڭىزعا بارماعان دا بولۋى مۇمكىن. تەك پا-نىڭ زاڭ ءبولىمى تاعدىرىن شەشە سالعان شىعار دەپ ويلاپ وتىرمىن، بۇگىن.

جاقىندا وتكەن ۇكىمەتتىڭ كەڭەيتىلگەن ماجىلىسىندە پرەزيدەنتتىڭ ءوزى دە بۇل ماسەلەگە ەرەكشە توقتالدى. ويتكەنى، قازىر بۇل ماسەلەنىڭ ءمان-جايىن قاسىم-جومارت كەمەلۇلى وتە جاقسى ءتۇسىنىپ وتىر. ال، مەن كوشى-قون زاڭىن تالقىلاۋعا قاتىسىپ ءجۇرىپ، زاڭ شىعارۋ جۇمىسىنا پرەزيدەنت اپپاراتىنىڭ (پا) ارالاساتىنىن بايقادىم.

ءبىراز ماڭىزدى ۇسىنىستارىمنىڭ سول جاقتان سىزىلىپ قالعانىن ەستىدىم.
مىسالى، «قازاقستان رەسپۋبليكاسىنىڭ ازاماتتىعى تۋرالى» زاڭىنىڭ 16-1-بابىندا: «1) تۇرۋ مەرزىمىنە قاراماستان، قازاقستان رەسپۋبليكاسىنىڭ اۋماعىندا زاڭدى نەگىزدەردە تۇراقتى تۇراتىن ورالماندار;» - دەپ كورسەتىلگەن.

مەن وسى نورماداعى «ورالماندار» دەگەن ءسوزدى «ەتنيكالىق قازاقتار» دەپ وزگەرتۋدى ۇسىنعانمىن. ول ەڭبەك جانە حالىقتى الەۋمەتتىك قورعاۋ مينيسترلىگى جاساعان جوباعا ەنگەن بولاتىن. ال زاڭ جوباسى ماجىلىسكە تۇسكەندە جوق بولىپ شىقتى. ىزدەۋ سالىپ تاپتىم. تۇپ-تۋرا پا سىزىپ تاستاعان. كەيىن تالقى بارىسىندا پا-عا ءماجىلىس جىبەرگەن نورمالاردىڭ دا باعى جانعان جوق.

ءتىپتى، «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ 13-بابىنداعى قر كونستيتۋتسياسىنا قايشى نورما سول كۇيىندە ءوتىپ كەتتى.

قانشا رەت ماقالا، اشىق حات جازدىم... تىڭداعان جوق. بىراق، مەن ايتىپ وتىرعان ماسەلەنىڭ دۇرىس ەكەنىن ءبىلدى. الدا تۇزەتۋ جاسالادى دەپ سەنەم.

ەڭ وكىنىشتىسى، ول جاقتا سول سالامەن ارنايى اينالىسىپ جۇرگەن تاجىريبەلى مامانداردى ەڭ قۇرىعاندا ءبىر مارتە بولسا دا شاقىرىپ، سويلەسۋ دەگەن بولمايتىن سەكىلدى.

ماجىلىستەگى جۇمىس توبىنىڭ تالقىسىنا تۇسكەن، بىراق، قارجى تالاپ ەتەتىن كەيبىر ۇسىنىستاردى ۇكىمەتپەن كەلىسە وتىرىپ قابىلداعان ءجون شىعار. بىراق، وعان پا-نىڭ كيلىككەنى مۇلدە دۇرىس ەمەس!

ماجىلىستە 107, سەناتتا 47 دەپۋتات بار. ەكەۋىن قوسساڭىز، 154!

قالاي دەگەنمەن دە، پارلامەنتتە ءار سالانىڭ بىلىكتى جانە تاجىريبەلى ماماندارى بار. ولار وسىنداي اسا ماڭىزدى ماسەلە توڭىرەگىندە تالاس-تالقى جۇرگىزبەيدى ەمەس، جۇرگىزەدى. بىراق، پارلامەنت - ۇكىمەتتىڭ، ۇكىمەت -پا-نىڭ الدىندا دارمەنسىز!

ەندى ءبىلدىم، بۇرىن دا سولاي بولعان سەكىلدى. مەن بايقۇس ۇكىمەت باسى بولىپ جۇرگەن كارىم ءماسىموۆتى سىناپ ءجۇرىپپىن عوي. ەگەر، ماسەلە ءدال وسىلاي شەشىلگەن بولسا، كارىم قاجىمقانۇلى مەنى كەشىرسىن!

مىنە، بۇگىنگى پاندەميا كەزىندە ءدارى-دارمەك سالاسىنان شىققان شۋعا سول زاڭناماداعى نەمەسە نورماتيۆتىك قۇجاتتاعى شيكىلىك سەبەپ بولىپ وتىر.

ءدارى-دارمەك ساۋداسى ءبىر ورتالىققا تاۋەلدى بولىپ قالعان. باسەكەلەستىك بولماعان جەردە، ءسوزسىز باعا شارىقتايدى... قازاقتا: «قويشى كوپ بولسا، قوي ارام ولەدى!»، دەگەن كەرەمەت اتالى ءسوز بار! سوندىقتان، بيلىكتىڭ ءار بۇتاعى ءوز شارۋاسىمەن اينالىسقانى دۇرىس. زاڭ شىعارۋ جۇمىسىنا پرەزيدەنت اپپاراتى ارالاسپاۋى كەرەك!

ءۇشىنشى، ءدارى-دارمەك باعاسىنىڭ شەكتەن تىس قىمباتتىعى جايلى. مەن الەۋمەتتىك جەلىدەگى كوپ بايبالاممەن كەلىسپەيمىن. ءدارىحانادا بار ءدارىنى قىمباتقا ساتىپ جاتقان كاسىپكەرلەر بار. بىراق، ول رەسپۋبليكانىڭ بارلىق وڭىرىندە ەمەس، ءىشىنارا ايماقتار مەن قالا، اۋدانداردا. سونى دارىگە مۇقتاج ءبىر ادام ايتىپ، بەينە جازبا جاريالاسا، بۇكىل جەلى شىرىلداپ قويا بەردى.

تۋىستار، بۇل - دۇرىس ەمەس. مەن جانە ارىپتەسىم اسقار قۇمارباي ەكەۋمىز سالتانات ماەنوۆا اتتى دارىگەرگە قاتار ەمدەلىپ شىقتىق. ءبىراز ءدارى-دارمەك قابىلدادىق. بىراق، سودان ەشقانداي قىمبات باعا كورگەن جوقپىز.

سول ءۇشىن، ءدارى-دارمەكتى قىمبات باعاعا ساتىپ العان، قولىندا تۇبىرتەگى بار ازاماتتاردىڭ ايعاي سالۋى ورىندى. ءتىپتى، اتتانداسا دا ارتىقتىق ەتپەيدى. اتتانمەن دە توقتاماي، سوتقا بەرىپ، ەسەلەپ مورالدىق تولەم ءوندىرىپ الۋى ءتيىس!

قىسقاسى، ءدارى-دارمەك پەن ازىق-تۇلىكتىڭ قولدان جاسالعان قىمباتشىلىعىمەن وسىلاي ناقتى فاكتكە سۇيەنىپ كۇرەس جۇرگىزگەن دۇرىس! ال، ءدارىحانانىڭ ەسىگىن اشپاعان، ءبىر تابلەتكا ساتىپ الىپ كورمەگەن جۇرتتىڭ سول ايعايعا اتتان قوسىپ، ەلدى دۇرلىكتىرگەنى ساۋاتتىلىق ءارى ادىلەتتىلىك ەمەس. اۋرۋ مەڭدەپ جاتقان جانداردىڭ جۇيكەسىن ودان ارى توزدىرۋ، ءۇمىتىن ءۇزدىرۋ، تىنىشتىقتى ءبۇلدىرۋ - بۇل!

ال، ءدارى-دارمەكتىڭ تاپشىلىعى تۋرالى ءسوز - بولەك ماسەلە! جەلىدە وتىرعان جۇرتتىڭ ناقتى فاكتپەن سويلەپ داعدىلانعانى دۇرىس!

قورىتا كەلگەندە، ىندەتتىڭ بار ەكەنىن بۇكىل قازاقستان حالقى مويىندادى جانە جانە پرەزيدەنت ءتيىستى شارا قابىلدادى. ەندىگى سانالىلىق وزىمىزدە، اعايىن!
تارتىپكە باعىنىپ، ساقتانىپ جۇرەيىك!

اۋىت مۇقيبەك،

قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى.

Abai.kz

19 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3505