سەمەي اكىمدىگى ىندەت ءورشىپ تۇرعان قازىرگىدەي قيىن كەزدە ءوز تۇرعىندارىنا، ءاربىر ادامعا ءبىر-ءبىر بەتپەردەن ۇلەستىرىپ جاتىر ەكەن. انە، كوردىڭىز بە؟!شىعىستاعى جۇرت سەمەي اكىمدىگىنىڭ بۇل «قامقورلىعى» تۋرالى جەلىدە جازىپ جاتىر.

بلوگەر ياكوۆ فەدروۆتىڭ ايتۋىنشا، قالالىق اكىمدىكتەن كەلگەن ەر ادام ونىڭ اناسىنا 1 دانا بەتپەردە (ماسكا) اكەلىپتى. ول بۇل تۋرالى الەۋمەتتىك جەلىدەگى جەكە پاراقشاسىندا جازدى.

«مەنىڭ انام سەمەي اكىمدىگىنىڭ اناۋ كوكتەمدە ايتقان كاتەگورياداعى (زەينەتكەرلەرگە) ازاماتتارعا كومەكتەسە باستاعانىن جازدى.

«سوبەستەن» ءبىر دانا بەتپەردە (ماسكا) اكەلىپتى.

وسىنداي جومارتتىعى مەن جىبەرگەن كومەگى ءۇشىن سەمەي اكىمى ەرماك سالىموۆكە راحمەت!  بانك كارتاڭىزدىڭ نومەرىن جىبەرىڭىزشى! مۇنداي كومەگىڭىز ءۇشىن 100 تەڭگە اۋدارىپ، اقشاسىن قايتارامىن. كومەكتەرىنىڭ تۇرىنە قاراسام، شىن مانىندە قازىر اقشا اكىمدىككە كەرەك سياقتى»,- دەيدى بلوگەر.

اكىمشىلىكتىڭ قامقورلىعى تۋرالى ايماقتىڭ باسقا تۇرعىندارى دا جازىپ جاتىر ەكەن.

ال، قالا باسشىلىعى Tengrinews.kz سايتىنا بەرگەن جاۋابىندا بۇل اقپاراتتى راستاپتى. اتالعان اكتسيانى وبلىس اكىمدىگى وتكىزىپ جاتقانىن ايتىپتى.

«ءيا، ءار ادامعا ءبىر ماسكادان بەرىلەدى. كوپ بالالى وتباسىلار مەن ااك الۋشىلار ءۇشىن، بارلىق وتباسى مۇشەلەرىنە بەرىلەدى. كوپ رەت پايدالانۋعا بولاتىن ماسكالاردى تەگىن تاراتتىق.

توتەنشە جاعداي كەزىندە زەينەتكەرلەر، ۇوس قاتىسۋشىلارى جانە ولارعا تەڭەستىرىلگەندەر، ااك الۋشىلار، كوپ بالالى وتباسىلار، مۇگەدەكتەر، جەتىمدەر، بالالارى مۇگەدەك اتا-انالارعا بيۋدجەتتەن تىس قاراجات ەسەبىنەن قايتا پايدالاناتىن ماسكالار بەرىلدى.

قازىر وبلىس اكىمىنىڭ تاپسىرماسى بويىنشا، بيۋدجەتتەن تىس قاراجات ەسەبىنەن بۇل كومەكتى قايتا جانداندىرىپ جاتىرمىز. بۇل ساناتقا 470 مىڭ ادام كىرەدى، ونىڭ ىشىندە سەمەي قالاسىندا - 104,8 مىڭ ادام بار. بۇل اكتسيا 7 شىلدەدە باستالدى», - دەپتى اكىمدىكتەگىلەر.

سونىمەن، شىعىس قازاقستان وبلىسى اكىمدىگىنىڭ جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى مۇقتاج ادامداردىڭ بارلىعىنا ءبىر-ءبىر دانادان بەتپەردە (ماسكا) بەرىلەتىنىن ايتقان ەكەن. اكىمدىڭتىڭ بۇل اكتسياسى الەۋمەتتىك جەلىدە قىزۋ تالقىلانۋدا. سىني پىكىر كوپ. ولاردىڭ دەنى: «بۇل نە، اشىقتان-اشىق مازاق ەتۋ مە؟» دەيدى... سوندا، سەمەي اكىمدىگى ەل-جۇرتقا ءبىر دانا بەتپەردەمەن قامقورلىق جاساماق پا؟

Abai.kz