بۇگىن بەلارۋس استاناسىندا ەۋرازيالىق ۇكىمەتارالىق كەڭەستىڭ كەزەكتى جيىنى ءوتتى. سول جيىندا قازاقستاننىڭ پرەمەرى اسقار مامين رەسەي پرەمەرى ميحايل ميشۋستينمەن جۇزبە-ءجۇز جەكە كەزدەسكەن.

«Sputniknews.kz» سايتى ەكى ەل پرەمەرلەرىنىڭ ەكەۋارا اڭگىمەسىنەن از-كەم اقپارات شىعارىپتى. اڭگىمە بارىسىندا اسقار مامين كوروناۆيرۋسپەن كۇرەستە قازاقستانعا كورسەتىپ جاتقان رەسەيدىڭ كومەگى ءۇشىن، اتاپ ايتقاندا ءدارى-دارمەك، مەديتسينالىق جابدىقتار تۇرىندەگى گۋمانيتارلىق جۇك پەن قازاقستانعا جىبەرىلگەن 30 شاقتى دارىگەر ءۇشىن ميشۋستينگە العىس ايتىپتى.

«ەڭ ماڭىزدىسى ءبىز قازاقستانعا كەلىپ، ءوڭىر-وڭىرلەردە كومەكتەسىپ جۇرگەن رەسەيلىك دارىگەرلەردىڭ كەڭەسىن الدىق»، - دەپتى مامين.

ول سونداي-اق، رەسەي عالىمدارى ازىرلەپ، قازىر سىناقتان وتكىزىپ جاتقان كوروناۆيرۋسقا قارسى ۆاكتسينا تۋرالى دا ايتقان ەكەن.

«ميحايل ۆلاديميروۆيچ، وسىعان بايلانىستى، ۆاكتسينا ءوندىرىسى باستالعان كەزدە قازاقستان ول ۆاكتسينانى العاشقىلاردىڭ ءبىرى بولىپ الادى دەپ ۇمىتتەنەمىن. بۇل وتە ماڭىزدى»، - دەپتى اسقار ۇزاقبايۇلى. بۇل اقپاراتتى ورىس سايتتارى دا سۇيىنشىلەپ جازىپ، تاراتىپ جاتىر ەكەن.

ەستەرىڭىزگە سالا كەتەيىك، بۇگىن عانا قازاقستاندا كوروناۆيرۋسقا قارسى ۆاكتسينا شىعاراتىن زاۋىت قۇرىلىسى باستالعانى حابارلانعان ەدى. يمۋننوبيولوگيالىق ءدارى-دارمەك جانە باسقا دا مەديتسينالىق ونىمدەر شىعاراتىن بيوفارماتسەۆتيكالىق زاۋىت جامبىل وبلىسى، قورداي اۋدانىندا سالىناتىنى ايتىلعان. ونىڭ جوبالىق قۇجاتتارىنا ۇكىمەتتىك رەزەرۆتەن 685,8 ميلليون تەڭگە بولىنگەن.

Abai.kz