جۋىردا ەلىمىزدىڭ وزبەكستانداعى كونسۋلى بابۋر داۋرەنبەكوۆ نوكىستە تۇتقىندا وتىرعان 27 قازاقستاندىق ماسەلەسىنىڭ وڭ شەشىلۋى مۇمكىن ەكەنىن حابارلاعان ەدى. كونسۋلدىڭ ايتقانى كەلدى. وتكەن سارسەنبىدەن بەيسەنبىگە قاراعان ءتۇنى قاراقالپاقستان رەسپۋبليكاسى جوعارعى سوتى قر سىرتقى ىستەر مينيسترلىگىنىڭ وتىنىشىمەن وتانداستارىمىزدى ەلگە قايتارۋ تۋرالى شەشىم شىعاردى. ءسويتىپ، جارتى جىلعا سوزىلىپ، ەكى ەل اراسىن شۋ قىلعان داۋلى ماسەلەگە نۇكتە قويىلعان سىڭايلى. ەندى جازا باسىپ، تۇتقىندا وتىرعان اقتوبەلىكتەر تاياۋ كۇندەرى سارىۋايىمعا تۇسكەن وتباسى مۇشەلەرىمەن قاۋىشاتىن بولدى.
قر سىرتقى ىستەر مينيسترلىگىنىڭ ءباسپاسوز حاتشىسى ءىلياس وماروۆتىڭ ايتۋىنشا، قازىر وسى ازاماتتاردى ەلگە قايتارۋ ماسەلەسى قارالىپ، ولاردىڭ قۇجاتتارى دايىندالىپ جاتىر. وتانداستارىمىزدىڭ تۋعان جەرگە ناقتى قاي كۇنى تابان تىرەيتىنى ازىرشە بەلگىسىز. «ءبىزدىڭ ازاماتتارىمىز بۇل ىسكە وزدەرىنىڭ ايتۋىنشا، ابايسىزدا بارعان. جەرلەستەرىمىز باۋىرمال ەكى ەلدىڭ اراسىندا زاڭسىزدىق تۋعىزىپ، قولايسىزدىق جاساعىسى كەلمەگەن. وسىنى ءتۇسىنىپ، وڭ شەشىم شىعارعان وزبەكستان سوتىنا راقمەتىمىزدى ايتتىق»، – دەيدى سىرتقى ىستەر مينيسترلiگiنiڭ ءباسپاسوز حاتشىسى. ەستەرىڭىزدە بولسا، وسى جىلدىڭ اقپان ايىندا اقتوبەنىڭ 34 تۇرعىنى كورشى ماڭعىستاۋ وبلىسىنا پايدا تابۋ ماقساتىمەن بارا جاتىپ، پالەگە قالعان ەدى. «كاماز»، كران جانە بىرنەشە جەڭىل اۆتوكولىككە مىنگەن جولاۋشىلار اۋا رايىنىڭ قولايسىزدىعىنان جولدان اداسىپ، وزبەكستان جەرىنە ءوتىپ كەتەدى. وسى جەردە ولاردى وزبەك شەكارا ساقشىلارى بايقاپ قالىپ، قولعا تۇسىرۋگە ارەكەتتەنەدى.
وقيعا ورنىنان جەتى قازاقستاندىق قاشىپ ۇلگەرسە، قالعان 27 جەرلەسىمىز نوكىس قالاسىنداعى №9 تەرگەۋ يزولياتورىنا قاماۋعا الىنىپ، كەيىن ولارعا قاتىستى ءۇش بىردەي زاڭبۇزۋشىلىق فاكتىسى بويىنشا ايىپ تاعىلدى. وسىدان كەيىن تۇتقىندالعانداردىڭ تۋىسقاندارى شاراسىزدىقتان جەرگىلىكتى بيلىكتەن قولداۋ سۇراپ، داۋلى ماسەلەگە ارالاسۋدى بىرنەشە مارتە تالاپ ەتتى. وتباسىن اسىراپ وتىرعان ازاماتتارى ءىستى بولىپ، جانۇشىرعان اقتوبەلىكتەردىڭ ماسەلەسى ولار بانكتەرگە نەسيە تولەي الماي قينالعان كەزدە ءتىپتى ۋشىعا ءتۇستى. وقيعا حالىقارالىق جانجالعا اينالىپ كەتپەۋى ءۇشىن ەكى جاق تا تۇيتكىلدى ىمىرالاسىپ شەشۋگە تىرىستى. ماسەلەگە پارلامەنت دەپۋتاتتارى، قۇقىق قورعاۋشى ۇيىمدار مەن اقتوبە وبلىسىنىڭ اكىمدىگى دە ارالاستى. سوڭعىسى مازاسى كەتكەن وتباسىلاردىڭ قورعاۋشى جالداۋىنا كومەكتەسىپ، بانكتەرگە قارىز قايتارۋىن جەڭىلدەتتى. ءىلياس وماروۆتىڭ مالىمەتىنشە، قازىرگى ۋاقىتتا سوتتىڭ شەشىمىمەن قازاقستاندىقتار باس بوستاندىعىنان ايىرىلمايتىن بولدى. ولاردىڭ ارقايسىسىنا 16 ميلليون 840 مىڭ وزبەك سۋمى كولەمىندە ايىپپۇل سالىنادى. سونداي-اق اقتوبەلىكتەر مىنگەن 30 ءتۇرلى كولىك وزبەكستاندا قالادى. «ۋرگەنچترانسگاز» كاسىپورنىنا ونىڭ تەحنيكاسىن تاسىعانى ءۇشىن 5 ميلليون 4000 سۋم وتەماقى تاعى تولەنبەك.

نۇرمۇحاممەد مامىربەكوۆ
«الاش ايناسى» گازەتى 26 ماۋسىم 2009 جىل